Jenesis 8 - Biblia Tetun Dili

Rai komesa maran

¹ Maibee Nai Maromak la haluha Noé sira ho animal hotu-hotu nebee hamutuk ho nia iha roo laran nee. Entaun Nia haruka anin boot mai huu halo tuun tiha bee nee.

² Nia taka bee matan hotu-hotu iha rai, i halo udan para.

³ Entaun bee komesa menus dadauk. Liu tiha loron 150, bee laduun aas ona.

⁴ Natoon iha loron 17, fulan hitu, roo nee para iha foho aas ida, naran Ararat.

⁵ Bee tuun bebeik, too iha loron primeiru, fulan sanulu, foho sira nia tutun komesa sai.

⁶ Liu tiha loron haat-nulu tan, Noé loke roo nia janela.

⁷ Nia husik manu metan ida. Manu nee la fila mai roo, maibee semo baa-mai, too bee nee maran.

⁸ Nia husik tan manu pombu ida, para atu hatene bee nee tuun ona ka seidauk.

⁹ Maibee tanba bee sei nakonu hela iha mundu tomak, manu nee la hetan fatin hodi sae. Entaun nia fila fali ba roo. Noé lolo nia liman, hodi simu manu nee ba roo laran.

¹⁰ Noé hein loron hitu tan, depois nia husik fali manu pombu nee.

¹¹ Iha lokraik, manu nee fila fali ba Noé, lori oliveira tahan ida iha nia ibun. Entaun Noé hatene katak bee tuun duni ona.

¹² Nia hein loron hitu tan, depois nia husik fali manu pombu nee. Maibee dala ida nee, manu pombu nee la fila ona.

¹³ Bainhira Noé tinan 601, natoon iha loron ida fulan ida, bee tuun tiha ona. Nia loke roo nia janela, hodi haree baa-mai, rai maran ona!

¹⁴ Too iha loron 17, fulan rua, rai maran duni ona.

¹⁵ Entaun NAI Maromak hatete ba Noé,

¹⁶ “Noé! Agora tuun ona hosi roo, hamutuk ho o nia feen, o nia oan sira ho o nia feto foun sira.

¹⁷ Hasai animal ho manu sira nee hotu! Husik tiha sira para amenta barak hodi halo nakonu mundu nee.”

^18-19 Nunee Noé ho nia kaben, nia oan sira, ho nia feto foun sira sai hosi roo. Animal hotu-hotu mos sai, ida-idak tuir nia grupu.

Noé halo sakrifisiu ba Nai Maromak

²⁰ Tuir mai Noé hada fatuk hodi halo altar ida ba NAI Maromak. Hosi animal hotu-hotu no manu hotu-hotu nebee bele haan, nia uza hodi halo sakrifisiu, nia hasai balu, i nia oho para tunu iha altar nee, hodi agradese ba NAI Maromak.

²¹ Bainhira NAI Maromak horon sakrifisiu nee nia morin, Nia laran haksolok. Nia hanoin dehan, “Hau la foo tan malisan ba mundu. Maski ema hanoin deit buat aat dezde sira kiik, maibee Hau sei la halo rahun tan buat hotu nebee moris, hanesan Hau halo tiha ona.

²² Durante mundu nee sei iha, iha tempu kuda ho tempu kuu, tempu malirin ho tempu manas, tempu bailoro ho tempu udan, loron ho kalan.”