Jenesis 6 - Biblia Tetun Dili

Ema nia hahalok aat

¹ Iha tempu nee, ema amenta barak ona. I sira moris namkari lemo rai iha mundu nee. Sira mos hetan oan feto sira.

² Nai Maromak nia oan mane sira haree ema nia oan feto sira nee oin mesak bonita-bonita deit. Nunee sira baa kaben ho feto raan sira nebee sira hakarak.

³ NAI Maromak hatete, “Hau nia Espiritu nebee foo moris ba sira nee lakohi hela taan iha sira ona, tanba sira nee ema deit, sira tenki mate. Nunee, komesa agora, sira so bele moris too deit tinan 120.”

⁴ Iha tempu nee, iha ona ema rasa boot iha mundu. Bainhira Maromak nia oan mane sira kaben ho ema nia oan feto sira, sira hetan oan, nebee sai asuwain iha istoria uluk nian.

⁵ Iha tempu nee, NAI Maromak haree ema iha mundu nia hahalok aat demais ona. Sira nia laran hanoin deit mak buat aat.

⁶ NAI Maromak mos arepende halo ona ema hodi hela iha mundu. Nee halo Nia laran susar teb-tebes.

⁷ Nee mak Maromak hatete, “Hau sei halo rahun tiha ema nebee Hau halo ona iha mundu. Manu fuik ho animal sira mos, Hau sei halo rahun tiha hotu. Tanba Hau arepende halo tiha ona sira.”

⁸ So Noé deit mak hetan grasa hosi NAI Maromak.

Noé nia istoria

^9-10 Noé nia istoria nunee. Nia iha oan mane nain tolu. Sira nia naran mak : Sem, Jafé ho Kam. Noé nee moris loos, i la halo buat aat. Iha tempu nee, nia mesak deit mak ema diak. Nia moris hamtauk ba NAI Maromak.

^11-12 Maibee Nai Maromak haree ema sira seluk mesak ema aat hotu. Iha fatin-fatin sira halo mak violensia. Nai Maromak haree ema iha mundu, so halo buat aat deit.

¹³ I Nai Maromak foo hatene ba Noé dehan, “Iha fatin-fatin Hau so haree ema nia hahalok aat deit. Nunee, Hau desidi ona katak Hau atu halo rahun tiha hotu mundu nee ho buat hotu-hotu iha nia laran.

¹⁴ Noé! Agora o halo roo boot ida ho ai diak. Nia laran, fahe ba kuartu-kuartu. I roo nia laran ho liur, taka ho alkatraun.

¹⁵ Halo nia naruk metru 130, nia luan metru 22, ho nia aas metru 13.

¹⁶ Roo nee halo mos ho nia kakuluk, i halo janela haleu iha kakuluk nia okos. Janela nee nia aas metru sorin balu. Fahe roo nee ba andar tolu. I halo odamatan ida iha roo nia sorin.

¹⁷ Hanoin didiak! Tanba Hau sei halo rai nabeen para halo mate buat hotu-hotu nebee moris iha mundu, too restu ida mos la iha.

¹⁸ Maibee Hau sei halo aliansa ho o. Nunee o sei tama iha roo nee nia laran, hamutuk ho o nia kaben, ho o nia oan sira, ho o nia feto foun sira.

^19-20 Hosi animal sira hotu, o tenki lori par ida-idak, aman ida ho inan ida, hodi baa hatama ba iha roo nee nia laran, para sira bele moris hamutuk ho o. Hanesan animal hakiak ho animal fuik, ho mos manu fuik, para sira hotu bele moris.

²¹ O tenki lori tama ba roo nee, hahaan oi-oin ba imi, ho mos ba animal sira.”

²² I Noé halo tuir buat hotu nebee mak Nai Maromak haruka.