Jenesis 50 - Biblia Tetun Dili

¹ I José hakuak nia aman, hodi tanis hakilar. I nia rei nia aman fila-fila.

² Depois José foo orden para tau ai-moruk ba Jacó nia isin para bele rai kleur.

³ I sira tau bebeik ai-moruk too loron haat-nulu, hanesan baibain. Ema Ejitu sira mos tanis ba Jacó nia mate. Sira tanis too loron hitu-nulu, hanesan sira nia nai ulun boot ida mak mate.

⁴ Liu tiha loron hitu-nulu nee, José foo sai ba liurai nia funsionariu sira dehan, “Favor ida, hatoo hela hau nia lia menon nee ba liurai:

⁵ ‘Tempu hau nia aman atu besik mate, nia husu hau promete atu lori nia mate isin baa hakoi iha rate nebee nia prepara tiha ona iha rai Kanaán. Tanba nee, hau husu lisensa ba liurai para hau baa hakoi hau nia aman. Depois hau fila fali mai.’ ”

⁶ Rona nunee, liurai hataan dehan, “Se o promete ona ba o nia aman nunee, lori ona nia baa hakoi iha nebaa.”

⁷ Depois José lori ona nia aman baa hakoi. Ema barak mak akompanha nia, hanesan liurai nia funsionariu sira, ho ema boot sira hotu iha Ejitu.

⁸ José nia maun-alin sira, ho sira nia ema serbisu hotu mos baa hakoi Jacó nia mate isin. So sira nia oan nurak ho sira nia animal mak la baa.

⁹ Tropa barak mos tuir. Balu baa ho kuda kareta, i balu sae kuda. Ema sira akompanha mate nee barak teb-tebes.

¹⁰ Sira hotu lao too fatin ida naran Atad, besik mota Jordaun. Iha fatin nee, ema sempre mai sama hare. José sira tanis lelir nia aman nia mate iha nebaa, i hadeer mate nee durante kalan hitu tan.

¹¹ Bainhira ema Kanaán sira iha fatin nee haree sira tristi nunee, sira mos dehan ba malu, “Imi rona took. Ema Ejitu sira nee tanis ho lelir, halo ita mos tristi!” Nee mak sira tau fatin nee naran Abel-Misraim. Nee katak ‘ema Ejitu laran tristi’.

¹² Depois Jacó nia oan sira halo tuir buat nebee mak sira promete tiha ona.

¹³ Sira lori Jacó nia mate isin baa hakoi iha fatuk kuak besik aldeia Makpela ho Manre. Abraão uluk hola fatin nee hosi ema Ete ida naran Efron, hodi halo rate.

José halo hakmatek nia maun sira nia laran

¹⁴ José hakoi tiha nia aman, nia ho nia maun-alin sira fila fali ba Ejitu, hamutuk ho ema hotu nebee baa hakoi mate nee.

¹⁵ Too iha Ejitu, José nia maun sira komesa tauk ona. Tanba sira nia aman la iha tiha ona, sira mos koalia ba malu dehan, “Imi hanoin lai! Se José sei rai odi ba ita i hakarak selu ita nia aat nebee uluk ita halo ba nia, halo nusaa loos?”

¹⁶ Entaun sira lia ida haruka mensajen ba José dehan, “Senhor visi! Ami sei hanoin uluk ita nia aman sei moris, nia haruka ami

¹⁷ foo hatene ba senhor dehan, ‘José tenki foo perdaun ba nia maun sira nia sala, nebee uluk sira halo ba nia.’ Nee mak agora ami mai husu perdaun. Tanba ami Maromak nia atan, hanesan uluk ita nia aman.” Rona nunee José mos tanis.

¹⁸ Depois nia maun sira mai rasik hakneak iha José nia oin, hodi dehan, “Senhor, halo ami sai senhor nia atan deit.”

¹⁹ Maibee José dehan, “Maun sira! Imi lalika tauk tan ona! So Nai Maromak deit mak iha direitu foo kastigu ba ema. Maibee hau, lae.

²⁰ Uluk imi kombina hodi halo aat mai hau. Maibee Nai Maromak halo buat nee sai diak fali. Nia foti hau sai ema boot, para bele salva ema barak hosi rai hamlaha.

²¹ Nee duni, agora, keta tauk tan. Hau sei tau matan ba imi, ho imi nia oan sira hotu.” Ho liafuan sira nee, José halo hakmatek nia maun sira nia laran.

José mate

²² José hela nafatin iha Ejitu ho nia maun-alin sira hotu. Nia moris too tinan atus ida sanulu.

²³ Nia sei haree Efraim nia bei oan nia oan sira. I nia mos kous nia bei oan Makhir nia oan sira, hodi hatudu katak nia hakiak sira nudar nia oan rasik; Makhir nee Manassés nia oan.

²⁴ José foo hatene ba nia maun sira dehan, “Hau senti hau nia loron mate besik ona. Maibee hau fiar, Nai Maromak sei tulun imi. Nia sei lori imi nia jerasaun sai hosi rai ida nee, baa fali iha rai nebee Nia promete ona ba avoo Abraão, avoo Isac ho apaa Jacó.”

²⁵ Depois José husu ba nia maun-alin sira halo juramentu dehan, “Imi tenki promete mai hau. Bainhira Nai Maromak lori fila fali imi nia jerasaun ba iha rai nee, sira tenki lori hau nia mate isin.”

²⁶ Nunee José mate iha Ejitu ho tinan atus ida sanulu. Depois sira tau ai-moruk ba nia mate isin, i tau nia ba kaixaun laran.