Jenesis 5 - Biblia Tetun Dili

Adão nia jerasaun too Noé

¹ Momentu Nai Maromak halo ema, Nia halo sira hanesan Nia Aan rasik.

² Nia halo sira, mane ho feto. I Nia bolu sira ‘ema’, i Nia foo bensaun ba sira. Ema primeiru nee naran Adão. Adão nia jerasaun sira nia naran hanesan tuir mai nee:

³ Bainhira Adão tinan 130, nia hetan oan mane ida, oin hanesan nia aman. Nia tau naran ba labarik nee, Sete.

⁴ Nee liu tiha, Adão sei moris tan tinan 800, i nia hetan tan oan mane ho oan feto sira seluk.

⁵ Adão mate ho tinan 930.

⁶ Bainhira Sete tinan 105, nia hetan oan mane ida, naran Enos.

⁷ Sete sei moris tan tinan 807, i nia hetan tan oan mane ho oan feto sira seluk.

⁸ Sete mate ho tinan 912.

⁹ Bainhira Enos tinan 90, nia hetan oan mane ida, naran Kenán.

¹⁰ Nee liu tiha, Enos sei moris tan tinan 815, i nia hetan tan oan mane ho oan feto sira seluk.

¹¹ Enos mate ho tinan 905.

¹² Bainhira Kenán tinan 70, nia hetan oan mane ida, naran Maalalel.

¹³ Liu tiha nee, Kenán sei moris tan tinan 840, i nia hetan tan oan mane ho oan feto sira seluk.

¹⁴ Kenán mate ho tinan 910.

¹⁵ Bainhira Maalalel tinan 65, nia hetan oan mane ida, naran Jarede.

¹⁶ Liu tiha nee, Maalalel sei moris tan tinan 830, i nia hetan tan oan mane ho oan feto sira seluk.

¹⁷ Maalalel mate ho tinan 895.

¹⁸ Bainhira Jarede tinan 162, nia hetan oan mane ida, naran Enoke.

¹⁹ Liu tiha nee, Jarede sei moris tan tinan 800, i nia sei hetan tan oan mane ho oan feto sira seluk.

²⁰ Jarede mate ho tinan 962.

²¹ Bainhira Enoke tinan 65, nia hetan oan mane ida, naran Metuselá.

²² Tuir mai, Enoke moris hamtauk ba Nai Maromak too tinan 300 tan. Nia mos hetan tan oan mane ho oan feto sira seluk.

^23-24 Enoke moris laran ida nafatin ho Nai Maromak. I bainhira nia tinan 365, nia la iha tiha, tanba Nai Maromak lori tiha nia.

²⁵ Bainhira Metuselá tinan 187, nia hetan oan mane ida, naran Lameke.

²⁶ Liu tiha nee, Metuselá sei moris tan tinan 782, i nia hetan tan oan mane ho oan feto sira seluk.

²⁷ Metuselá mate ho tinan 969.

²⁸ Bainhira Lameke tinan 182, nia hetan oan mane ida.

²⁹ Lameke tau labarik nee nia naran Noé, tanba nia dehan, “Labarik nee sei halo haksolok ita nia laran maski ita nia serbisu todan iha rai nee, nebee NAI Naromak foo tiha ona malisan.”

³⁰ Lameke sei moris tan tinan 595, i nia hetan tan oan mane ho oan feto sira seluk.

³¹ Lameke mate ho tinan 777.

³² Bainhira Noé tinan 500, nia hetan oan mane nain tolu, mak nee: Sem, Kam ho Jafé.