Jenesis 49 - Biblia Tetun Dili

Jacó foo nia lia menon ba nia oan ida-idak

¹ Tuir mai, Jacó haruka bolu nia oan sira hotu. Nia hatete nunee, “Oan sira! Imi hotu mai besik hodi rona. Hau atu foo hatene ba imi, ida-idak nia moris iha loron aban-bainrua.”

² I Jacó komesa foo hatene kedas ba nia oan sira dehan, “Imi mai hamriik haleu hau. Rona imi nia aman Israel nia koalia.

³ Ruben! O mak hau nia oan mane boot! O hau nia ai tonka ho hau nia liman loos. Ema respeita liu mak o.

⁴ Maibee o nia laran fasil nakdoko, la hatene saida mak o hakarak, hanesan laloran tasi baku baa-mai. Uluk o baa toba hamutuk halo sala fali ho hau nia kaben Bila. O halo foer o nia aman nia toba fatin. Nee mak o nia direitu hanesan oan mane boot lakon kedas.

⁵ Simeão ho Levi! Imi nain rua hanesan! Imi sempre kaer kroat, atu halo terus ema.

⁶ Imi gosta mak tesi karau nia ain uat halo kotu, too karau monu hela iha fatin. I imi nia aat ida tan mak nee: bainhira imi hirus ema, imi tenki oho. Nee mak hau lakohi rona imi nia koalia. Hau mos lakohi mete ho imi nia problema.

⁷ Nee duni, agora, hau foo malisan ba imi nia hahalok aat sira nee, tan demais liu ona! Ho tan imi nia hirus, nebee la iha hadomi ituan ba ema. Aban-bainrua imi sei lori rasik todan ida nee. Nai Maromak mos sei soe namkari imi nia jerasaun iha Israel laran tomak, too sira la hela hamutuk iha fatin ida ona.

⁸ Judá! O nia naran dehan ‘gaba’. O nia maun-alin sira sei gaba o i hakruuk ba o. I o nia liman sei hanehan o nia inimigu sira, too sira la foti ulun.

⁹ O nee hanesan leaun. O hanesan leaun forti foin sae, nebee buka rasik hahaan. O hanesan leaun aman nebee hafuhu animal hodi tata, haan bosu, depois toba. O hanesan leaun inan hein hela nia oan. La iha ema ida brani baa book. O mos nunee. Ema sei tauk o, i sira la brani halo buat ida ba o.

¹⁰ O nee sei kaer ukun. O nia jerasaun sira mos sei kaer ukun tutuir malu, too iha ida mak iha direitu liu hodi tuur kaer ukun nee. I nasaun sira hotu sei hakruuk i rona ba Nia.

¹¹ O sei kesi o nia kuda buru ba o nia uvas huun, too kuda buru haan balu mos, la iha buat ida. O sei fasi o nia ropa ho uvas been. Uvas been barak teb-tebes, too fakar resi-resin” .

¹² O nia tua tintu ho o nia susu been resin too fak-fakar.

¹³ Zebulón! O nia rai besik tasi, i sei amenta boot too baliza ho sidade Sidon. Roo boot mai hosi fatin-fatin, hodi para ho hakmatek iha o nia pontikais.

^14-15 Isakar! O forti hanesan kuda buru, maibee o nia ulun fatuk toos. O toba ona iha dalan klaran; see mak bele obriga fanu o, para lao nafatin? Bainhira o haree ona fatin diak ida, o prontu atu sai ema rai nain nia atan, para bele hela iha fatin nee. O mak nunee ona!

¹⁶ Dan! O nia naran nee dehan ‘juis’. O ho o nia jerasaun mak sei tesi o nia povu nia lia. Imi tesi, sei la todan hosi sorin, maibee tuir lia loos.

¹⁷ O nee mos matenek hanesan samea nebee toba hela iha dalan ibun. Bainhira inimigu ida sae kuda liu hosi fatin nee, antes hakfodak, o tata tiha ona kuda nia ain kotuk, too kuda nee soe tiha ema nee.

¹⁸ Oh, NAI Maromak! Hau harohan atu Ita Boot salva ami hotu.

¹⁹ Gade! O nia naran rona atu hanesan ‘ataka’. Ema naok-teen sei ataka o, maibee o ataka fali sira hosi kotuk, too o manaan.

²⁰ Asér! O nia toos sei foo hahaan diak liu, too o bele halo dosi furak oi-oin, i liurai sira mos mai hola dosi iha o.

²¹ Naftali! O hanesan bibi rusa nebee halai makaas, la iha ema ida bele manda o. O nia oan sira mesak oin kapaas-kapaas deit.

²² José! O hanesan ai buras ida, moris besik bee matan. O nia sanak nani sae too muru leten.

²³ Uluk iha ema odi o, hanesan inimigu hana o ho rama.

²⁴ Maibee Nai Maromak, ida nebee hau adora, tulun o. Nia halo forti o nia liman, para o hana fali sira, biar hosi dook. O mak manaan sira, tanba Nai Maromak ida forsa teb-tebes mak tulun o. Nee mak hau sadere ba Nia, tan Nia mak hein hau too agora.

²⁵ Nia mak sei kuidadu o. I Nia foo bensaun ba o, bensaun hosi lalehan, bensaun hosi rai, ho bensaun foo oan barak mesak isin didiak deit.

²⁶ Hau nia bensaun nebee hau foo ba o, boot liu foho sira! Hau harohan para Nai Maromak fakar bensaun sira nee hotu ba o, tanba o mak liu o nia maun-alin sira hotu.

²⁷ Benjamim! O hanesan asu fuik siak nebee hamlaha. Sei dadeer-saan hela, nia baa tata tiha ona animal ba nia haan. Bainhira kalan ona, nia baa fahe hahaan restu ba nia oan sira. O nia jerasaun mos sei sai nunee.”

²⁸ Too iha nee, Jacó foo hatene kona ba nia oan sira nia moris iha aban-bainrua, ida-idak ho nia jerasaun. Sira nee hotu mak forma suku sanulu resin rua iha Israel.

Jacó mate

^29-30 Nee liu tiha, Jacó haruka nia oan sira dehan, “Hau atu mate ona. Bainhira hau mate, imi tenki lori hau baa hakoi hamutuk ho hau nia aman sira iha fatuk kuak nebee besik iha aldeia Makpela ho Manre, iha rai Kanaán. Uluk avoo Abraão hola rai ho fatuk kuak nee hodi halo sai rate. Nia hola kotu hosi ema Ete ida naran Efron.

³¹ Iha fatin nee mak sira hakoi avoo Abraão ho avoo feto Sara, ho mos hau nia aman Isac, ho hau nia inan Rebeca. I hau mos hakoi hau nia kaben Lea iha nebaa.

³² Entaun, imi keta haluha hakoi hau iha fatuk kuak nebee avoo Abraão hola ona hosi ema Ete nee.”

³³ Jacó hameno liafuan sira nee hotu ba nia oan sira, nia toba fali iha nia fatin, nia iis mos kotu, i nia baa hamutuk ho nia bei-ala sira.