Jenesis 48 - Biblia Tetun Dili

Jacó husu Nai Maromak foo bensaun ba José nia oan sira

¹ La kleur tan, ema mai foo hatene ba José katak nia aman moras todan. Nunee nia lori nia oan nain rua, Manassés ho Efraim, baa haree sira nia avoo Jacó.

² Bainhira Jacó rona José sira mai ona, nia hakaas aan ba tuur tiha.

³ Jacó hatete ba José dehan, “Nai Maromak, ida forsa teb-tebes nee, uluk hatudu Aan mai hau iha aldeia Lus iha rai Kanaán. Iha nebaa, Nia promete mai hau,

⁴ dehan, ‘Hau sei foo ba o, jerasaun bara-barak, i sira sei sai nasaun barak. Hau mos sei foo rai ida nee ba o nia jerasaun sira, para sai sira nian too mundu nee ramata.’ ”

⁵ I Jacó hatutan tan, “O nia oan Efraim ho Manassés nee moris iha Ejitu antes hau mai iha nee. Agora hau foti sira nain rua sai hau nia oan rasik. Nunee, bainhira hau mate, sira mos simu hau nia rai ho rikusoin, hanesan Ruben ho Simeão.

⁶ Maibee se o iha oan tan, nee o nian ona. Hau la foti tan sira hanesan hau nia oan. Nunee, kona ba sira nia rikusoin, sira simu deit hosi sira nia maun Efraim ho Manassés.

⁷ Hau halo nunee, hodi hanoin o nia inan Raquel. Bainhira ita sai hosi Mezopotámia ba Kanaán, o nia inan mate iha dalan klaran besik aldeia Efrata iha rai Kanaán. Loron nee, hau nia laran tristi teb-tebes! Hau hakoi nia iha dalan ibun atu tama ba aldeia Efrata.” (Aldeia nee agora, sira tau naran Belém.)

⁸ Jacó koalia tiha hotu, nia foti oin, haree José nia oan sira. I nia husu ba José, “Sira nee see?”

⁹ José hataan, “Nee hau nia oan, nebee Nai Maromak foo mai hau iha Ejitu nee.” I Jacó dehan, “O lori sira mai besik hau, para hau halo orasaun husu Nai Maromak foo bensaun ba sira.”

¹⁰ Jacó katuas ona, nia matan mos malahuk ona, i nia haree laduun moos ona. José lori nia oan sira baa besik Jacó, i Jacó hakuak ho rei sira.

¹¹ Nia hatete ba José, “Durante nee, hau hanoin, hau la hasoru tan o ona. Maibee agora, Nai Maromak halo liu tan, too hau mos sei bele haree o nia oan sira.”

¹² Depois José dada tiha nia oan rua nee hosi Jacó nia hiti, i nia mos hakneak i hakruuk too rai iha Jacó nia oin.

¹³ Nia hamriik fali, i nia tau nia oan sira hamriik besik ba nia aman. Nia tau nia oan boot, Manassés, iha Jacó nia liman loos, i nia oan segundu, Efraim, iha Jacó nia liman karuk.

¹⁴ Maibee, bainhira Jacó atu tau liman hodi husu bensaun ba sira nain rua, Jacó muda tiha nia liman loos tau fali ba alin Efraim nia ulun, i nia tau nia liman karuk ba maun Manassés nia ulun.

¹⁵ Depois nia halo orasaun ba Nai Maromak para foo bensaun ba José dehan, “Hau nia avoo Abraão, ho hau nia aman Isac sempre moris tuir Nai Maromak nia hakarak. Nai Maromak mos sempre kuidadu hau dezde kiik too agora.

¹⁶ I Nia hasai ona hau hosi perigu hotu. Agora hau mos husu ba Nai Maromak foo bensaun ba labarik sira nee. Nunee ema la bele haluha temi avoo Abraão, aman Isac ho hau nia naran. Hau mos husu para labarik sira nee bele iha jerasaun barak teb-tebes.”

¹⁷ Maibee, bainhira José haree nia aman tau fali nia liman loos iha alin Efraim nia ulun, nia la gosta. Nunee José kaer tiha nia aman nia liman atu foti baa tau fali iha maun Manassés nia ulun.

¹⁸ Nia hatete ba nia aman, “Apaa, keta nunee! Ida nee mak oan boot. Tenki tau liman loos ba nia ulun.”

¹⁹ Maibee nia aman Jacó lakohi. Nia dehan, “Oan, hau hatene! Manassés sei iha poder boot duni, i nia jerasaun sei amenta barak too sai nasaun boot ida. Maibee nia alin Efraim sei iha poder boot liu nia maun, i nia jerasaun mos sei barak liu too sai nasaun boot barak.”

²⁰ Depois nia foo bensaun ba labarik nain rua nee dehan, “Bainhira ema Israel husu Nai Maromak foo bensaun ba ema, sira sei temi mos imi nain rua nia naran. Sira sei husu nunee: ‘Nai Maromak foo bensaun ba o, hanesan uluk Nia foo bensaun ba Efraim ho Manassés.’ ” Nunee Jacó temi alin Efraim nia naran uluk, mak foin temi nia maun Manassés.

²¹ Tuir mai, Jacó dehan ba José, “Hau besik atu mate ona. Maibee Nai Maromak sei tulun imi, i lori imi fila fali ba imi nia bei-ala sira nia rain.

²² Agora, hau foo ba o foho iha rai Kanaán nebee uluk hau hadau hosi ema Amori, bainhira hau funu ho sira. Rai nebee hau foo ba o nee, luan liu duke hau foo ba o nia maun sira.”