Jenesis 47 - Biblia Tetun Dili

Liurai foo rai ba José nia familia

^1-2 Depois José lori nia maun nain lima baa aprezenta ba liurai. José hatete dehan, “Amu liurai! Hau nia aman ho hau nia maun-alin sira mai ona hosi rai Kanaán. Sira mai ho sira nia bibi, sira nia bibi malae, sira nia karau vaka, ho sira nia sasaan hotu-hotu. Agora sira iha ona rai Gosen.”

³ I liurai husu, “Imi nia serbisu saida?” Sira hataan ba liurai dehan, “Ami karau atan ho bibi atan, hanesan ami nia bei-ala sira.

⁴ Agora iha rai Kanaán hamlaha boot. Udan la mai, too duut mos la iha ba ami nia bibi ho karau haan. Nee mak ami mai atu hela iha rai Ejitu. Ami mos lori ami nia animal sira. Agora ami ata husu lisensa ba amu liurai, para ami bele hela iha rai Gosen.”

⁵ I liurai foo sai nia hakarak ba José dehan, “Agora o nia aman ho o nia maun-alin sira iha nee.

⁶ Sira bele halo rai Ejitu nee hanesan sira nia rain rasik. Rai Gosen mak rai diak liu iha Ejitu tomak. Nunee diak liu sira hela iha nebaa deit ona. I se iha sira balu mak hein animal diak, sira mos bele hein ho hau nian iha nebaa.”

⁷ Tuir mai, José aprezenta nia aman ba liurai. Jacó mos harohan ba Nai Maromak para foo bensaun ba liurai nee.

⁸ I liurai husu ba Jacó, “Ita tinan hira ona?”

⁹ Jacó hataan, “Hau lao baa-mai iha mundu nee durante tinan atus ida tolu-nulu ona, i hau nia vida nakonu ho terus. Se kompara ho hau nia bei-ala sira, hau nia tinan badak liu.”

¹⁰ Jacó sei husu tan ba Nai Maromak para foo bensaun ba liurai, mak foin fila.

¹¹ Depois José halo tuir liurai nia koalia. Nia foo rai ba sira iha distritu ida nebee diak liu iha Ejitu tomak. Iha fatin nee mak José nia aman ho nia maun-alin sira hela baa. (Fatin nee, ikus mai, ema tau naran “Rameses”.)

¹² I José mos foo hahaan ba nia aman, ba nia maun-alin sira, ho familia uma laran tomak, hosi boot too kiik.

Rai hamlaha iha Ejitu

¹³ Iha tempu nee, rai hamlaha boot, too iha fatin-fatin la iha tan hahaan ona. Hosi Ejitu too Kanaán ema isin krekas ho fraku hotu tanba hamlaha atu-mate.

¹⁴ Ema mai hosi fatin hotu-hotu iha Ejitu ho fatin hotu-hotu hosi Kanaán, mai hola hahaan iha José. Osan nebee nia simu, hodi baa rai hotu iha liurai nia uma.

¹⁵ Too ema Ejitu ho ema Kanaán sira nia osan mos hotu ona. Entaun sira baa hasoru José, hodi husu, “Senhor visi! Foo hahaan mai ami lai, para ami keta mate hamlaha. Tanba ami nia osan hotu ona.”

¹⁶ I José hataan, “Se imi nia osan la iha tan ona, entaun foo imi nia animal, hau troka ho hahaan.”

¹⁷ Nunee tinan nee sira lori sira nia animal ba José, hodi troka hahaan. Hanesan sira nia kuda, bibi malae, bibi, karau ho sira nia kuda buru.

¹⁸ Liu tiha tinan ida, sira baa hasoru tan José dehan, “Senhor visi, ami koalia loos deit. Ami nia osan ho ami nia animal, ita boot troka tiha hotu ona. Agora ami la iha tan buat ida ona. Hela deit ami nia isin lolon ho ami nia rai deit.

¹⁹ Keta husik ami mate. Se ami mate, see mak haree rai sira nee? Diak liu senhor visi halo ami sai liurai nia atan. I senhor hola hotu ami nia rai ba liurai nian. Ita boot foo fini para ami kuda ba ita. Kona ba ami nia kolen ho ami nia rai, senhor lalika selu, foo mak hahaan deit. Naran katak ami keta mate hamlaha.”

²⁰ Tanba rai hamlaha boot, maka ema Ejitu sira faan hotu sira nia rai. Nunee José hola hotu rai iha Ejitu, foo ba liurai,

²¹ i ema hotu iha Ejitu tomak sai liurai nia atan.

²² So xefi relijiaun sira nia rai deit mak José la hola, tanba liurai foo nafatin hahaan ba sira. Nee mak sira la presiza faan sira nia rai.

²³ Tempu nee, José mos hatete ba povu, “Agora imi hotu sai ona liurai nia atan. I imi nia rai hau hola hotu ona foo ba liurai. Nee duni imi lori fini nee baa kuda.

²⁴ Bainhira foo ona isin, imi fahe ba parte lima. Parte ida foo ba liurai. Sei hela parte haat, balu ba imi uza ba fini, balu ba imi nia familia haan.”

²⁵ Sira hataan, “Ita boot foo moris ona ba ami, tanba nee ami foo agradese. Ami sai amu liurai nia atan deit.”

²⁶ Depois José halo lei ida ba nasaun Ejitu, hanesan tuir mai. Hare nebee povu koa, sira tenki fahe ba parte lima. Parte ida sira tenki foo ba liurai. Parte haat sira bele uza ba sira nia aan rasik. Lei nee halao nafatin. So xefi relijiaun sira deit mak la tuir, tanba liurai la hola sira nia rai.

José promete atu hakoi Jacó iha nia bei-ala sira nia rate

²⁷ Komesa iha tempu nee, ema Israel sira hela nafatin iha Ejitu iha rai Gosen. Sira sai ema riku, i sira nia jerasaun mos amenta barak.

²⁸ Jacó sei moris tan tinan sanulu resin hitu iha Ejitu, too nia tinan hamutuk atus ida haat-nulu resin hitu.

²⁹ Bainhira nia besik atu mate, nia bolu nia oan José hodi hatete, “Oan, se o hadomi tebes hau, o jura para o la bele hakoi hau iha rai Ejitu nee.

³⁰ O tenki lori fila hau nia mate isin ba hakoi iha ita nia bei-ala sira nia rate. Ida nee mak apaa husu.” José hataan, “Diak, apaa! Se apaa hakarak nunee, hau sei halo tuir duni.”

³¹ I Jacó koalia tan, “Se nunee, agora o jura lai katak, o sei tuir apaa nia hakarak.” Entaun José mos jura. Depois Jacó hakruuk tiha iha kama leten hodi halo orasaun foo agradese ba Nai Maromak.