Jenesis 46 - Biblia Tetun Dili

Jacó ho nia familia sira sai baa Ejitu

¹ Nunee Jacó haloot nia sasaan hotu, atu baa ona Ejitu, i sira husik hela rai Kanaán. Too iha aldeia Berseba, nia oho animal hodi halo sakrifisiu ba Nai Maromak, ida nebee nia aman Isac adora hori uluk liu.

² Iha kalan nee, nia mehi, iha mehi nee nia rona Nai Maromak bolu dehan, “Jacó! Jacó!” Nia hataan, “Nai!”

³ I Nai Maromak dehan, “Hau nee Nai Maromak, ida nebee o nia aman adora kedas hori uluk. O keta tauk baa iha Ejitu. Tanba Hau sei halo o nia jerasaun sira sai nasaun boot ida iha nebaa.

⁴ Hau sei akompanha o ba iha Ejitu. I Hau sei lori o nia jerasaun fila fali ba Kanaán. I bainhira o atu mate, o nia oan José sei hamriik iha o nia sorin.”

⁵ Jacó ho nia oan sira, husik hela aldeia Berseba nee. Sira tula Jacó, ho sira nia kaben ho oan sira, ba kuda kareta nebee liurai Ejitu haruka baa nee.

^6-7 I sira lori sira nia riku ho sira nia animal hotu, nebee sira hetan iha rai Kanaán. Jacó ho nia oan mane, ho nia oan feto, ho nia bei-oan sira hotu, lao ona ba Ejitu.

Lista Jacó nia familia nebee baa Ejitu

⁸ Jacó nia familia nebee baa iha Ejitu mak nee: Ruben, oan primeiru.

⁹ Ruben nia oan sira mak nee: Enok, Palu, Hesron ho Karmi.

¹⁰ Simeão, ho nia oan sira mak nee: Jemuel, Jamin, Oad, Jakin, Soar. Iha mos oan ida naran Saul, hosi nia kaben ema Kanaán.

¹¹ Levi, ho nia oan sira mak nee: Gerson, Keat, ho Merari.

¹² Judá, ho nia oan sira mak nee: Sela, Peres ho Zerá. Judá nia oan seluk naran Er ho Onan mate tiha ona iha Kanaán. Nia mos lori Peres nia oan sira, Hesron ho Hamul.

¹³ Isakar ho nia oan sira mak nee: Tola, Puva, Job ho Simeron.

¹⁴ Zebulón ho nia oan sira: Sered, Elon, ho Jaliel.

¹⁵ Sira hotu nee Jacó ho nia kaben Lea nia oan, nebee moris iha Mezopotámia. Sira nain rua mos iha oan feto ida naran Diná. Nunee Jacó ho Lea nia jerasaun hamutuk ema nain tolu-nulu resin tolu.

¹⁶ Depois Jacó sei iha mos oan hosi nia kaben seluk, mak nee: Gad ho nia oan sira: Sifion, Hagi, Suni, Esbon, Eri, Arodi ho Areli.

¹⁷ Asér, ho nia oan sira mak nee: Jimna, Jisva, Jisvi, Beria, ho nia alin feto Sera. Iha mos Beria nia oan: Heber ho Malkiel.

¹⁸ Sira nee hotu, ema sanulu resin neen. Nee mak Jacó ho nia kaben Zilpa nia oan ho bei-oan. Zilpa nee Jacó nia kaben boot Lea nia atan, nebee Lea nia aman Labão foo ba nia.

¹⁹ Depois Jacó iha tan kaben seluk, naran Raquel. Nia oan rua, José ho Benjamim.

²⁰ Tempu nee, José kaben tiha ona ho Asenat iha Ejitu. Nia banin mane, xefi relijiaun iha sidade On, nia naran Potifera. I José ho Asenat nia oan mak Efraim ho Manassés.

²¹ Benjamim mos baa iha Ejitu ho nia oan sira, mak nee: Bela, Beker, Asbel, Gera, Naaman, Ei, Ros, Mupim, Hupim, ho Arde.

²² Jacó ho nia kaben Raquel sira nia jerasaun, hamutuk ema sanulu resin haat.

²³ Iha tan Jacó nia kaben seluk, naran Bila. Sira nia oan mak Dan ho Naftali. Dan nia oan naran Husim.

²⁴ Naftali nia oan sira mak Jasiel, Guni, Jeser ho Silem.

²⁵ Jacó ho nia kaben Bila nia jerasaun, hamutuk ema nain hitu. Bila nee Raquel nia atan, nebee nia aman Labão foo ba nia.

²⁶ Nunee, Jacó nia jerasaun hotu mak baa iha Ejitu hamutuk ema neen-nulu resin neen. Seidauk sura nia feto foun sira.

²⁷ Amenta tan José nia oan rua nebee moris iha Ejitu. Nunee Jacó ho nia familia nebee hela iha Ejitu, hamutuk ema nain hitu-nulu.

Jacó hasoru malu fali ho nia oan José

²⁸ Bainhira sira besik too ona iha Ejitu, Jacó haruka nia oan Judá baa uluk, foo hatene ba José, para José mai hasoru nia aman iha Gosen. Bainhira sira too iha Gosen,

²⁹ José mos prepara nia kuda kareta, hodi baa hasoru nia aman iha nebaa. Bainhira sira hasoru malu, José hakuak nia aman hodi tanis kleur teb-tebes.

³⁰ I Jacó dehan ba José, “Oan, agora hau rasik hetan ona o, i hau hatene o sei moris. Hau mate agora mos, la buat ida.”

³¹ Depois José hatete ba nia maun-alin sira hotu dehan, “Hau tenki baa foo hatene ba liurai katak, hau nia familia sira mai ona hosi Kanaán.

³² I hau sei foo hatene dehan imi nia moris mak hakiak bibi ho karau, i imi mos lori imi nia animal barak ho imi nia rikusoin hotu hosi Kanaán.

³³ Se liurai bolu imi, i nia husu imi nia serbisu saida,

³⁴ imi hataan ba nia dehan, imi hotu hakiak animal dezde kiik, hanesan imi nia bei-ala sira. Nunee nia sei haruka imi hela iha rai Gosen.” José foo sai nunee, tanba ema Ejitu hakribit atu moris hamutuk ho ema nebee hakiak animal.