Jenesis 45 - Biblia Tetun Dili

José foo sai nia aan, i husu nia aman sira muda ba Ejitu

¹ Rona nunee, José nia laran susar too nia la aguenta tan iha nia funsionariu sira nia oin. Nee mak nia haruka sira sai tiha, atu nia hela mesak ho nia maun-alin sira hodi foo sai, nia nee see.

² Funsionariu sira hotu sai tiha, José mos tanis hakilar. Too ema Ejitu sira iha liur rona. I ema sira iha liurai nia uma mos rona.

³ I José foo sai ba nia maun-alin sira dehan, “Hau nee José, imi nia alin! Apaa sei moris ka?” Rona nunee, nia maun-alin sira tauk atu-mate too sira la koalia liafuan ida.

⁴ Depois José bolu sira baa besik, i sira mos halo tuir. Nia koalia tan dehan, “Hau mak José, ida nebee uluk imi faan tiha ba ema Ejitu.

⁵ Maibee imi keta tauk, i la bele foo sala ba imi nia aan tanba imi faan hau. Afinal Nai Maromak mak lori hau uluk mai iha nee. Ho nunee, Nia uza hau para bele salva ema barak hosi hamlaha boot nia laran.

⁶ Agora rai hamlaha foin tinan rua, sei hela tinan lima tan. Iha tempu naruk nee, ema la fila rai, la kuda rai, i la hetan hahaan.

⁷ Nai Maromak lori hau mai uluk, para hau bele tau matan ba imi, i imi nia jerasaun sira bele hetan moris.

⁸ Hau mai too iha nee, laos tanba imi. Maibee nee Nai Maromak nia serbisu. Nia mak foti hau sai liurai nia visi. Hau sai xefi iha liurai nia palasiu hodi ukun povu Ejitu tomak.

⁹ Agora, imi fila lalais ona ba apaa, hodi foo sai dehan nia oan José sei moris hela. I hatoo hau nia lia tatoli nunee: ‘Nai Maromak foti ona hau sai ema boot iha rai Ejitu, i hau husu apaa atu mai lalais iha nee.

¹⁰ Apaa bele hela iha rai Gosen besik ho hau, hamutuk ho ita nia oan ho bei oan sira, ho familia uma laran tomak. Lori mos apaa nia bibi, bibi malae ho karau vaka sira, ho rikusoin hotu.

¹¹ Se apaa hela iha Gosen, hau bele tau matan ba apaa. Tanba rai hamlaha sei tinan lima tan, i hau lakohi para apaa ho ita nia familia sira kiak too rabat rai.’ ”

¹² José hatoo tiha nia lia menon, nia dehan tan, “Agora imi haree rasik baa. Alin Benjamim mos bele haree katak hau mak José duni.

¹³ Nunee imi baa foo hatene ba ita nia apaa dehan, iha rai Ejitu hau nia naran boot teb-tebes. Imi mos tenki konta buat hotu-hotu nebee mak imi haree ona. Depois imi lori apaa mai lalais ona iha nee!”

¹⁴ Depois nia hakuak nia alin Benjamim, i sira nain rua tanis.

¹⁵ Nia mos tanis hodi rei nia maun sira ida-idak. Liu tiha nee, foin sira komesa koalia ho nia.

Liurai Ejitu simu José nia maun-alin sira

¹⁶ Bainhira liurai ho nia funsionariu sira rona dehan José nia maun-alin sira mai, sira hotu kontenti.

¹⁷ Depois liurai hatete ba José dehan, “Foo hatene ba o nia maun-alin sira, para sira tula hahaan iha sira nia kuda buru, hodi fila ba Kanaán.

¹⁸ I hatete ba sira, para sira lori o nia aman ho o nia familia hotu, muda ona mai iha nee. Depois hau foo rai diak liu iha Ejitu ba sira, para sira bele moris iha nebaa i haan hahaan hosi rai nee.

¹⁹ Hatete mos ba sira, para sira lori kuda kareta boot balu hosi nee, hodi tula feto ho labarik oan sira ho mos o nia aman.

²⁰ Keta hanoin rikusoin nebee mak lori la diak, tanba buat diak hotu iha Ejitu, sei sai sira nian hotu.”

²¹ Rona nunee, sira mos halo tuir liurai nia orden. José foo kuda kareta boot ho bukae ba sira.

²² José mos foo ropa foun par ida ba sira ida-idak. Maibee nia foo ba Benjamim osan mutin atus tolu, ho ropa foun par lima.

²³ José haruka mos sasaan nebee diak liu iha Ejitu ba nia aman, tula iha kuda buru sanulu. Nia amenta tan foos, paun, ho hahaan oi-oin, tula iha kuda buru inan sanulu tan, hanesan bukae hodi haan tuir dalan.

²⁴ Tuir mai nia haruka sira fila ona, i nia foo hanoin ba sira dehan, “Imi la bele istori malu iha dalan!”

Jacó rona José sei moris

²⁵ Depois sira fila ona ba sira nia aman iha Kanaán.

²⁶ Too iha nebaa, sira konta ba sira nia aman dehan, “Apaa! Apaa nia oan José sei moris hela. Nia sai ona ema boot, ukun rai Ejitu tomak.” Jacó rona nunee, nia sai bilaan tiha, i nia la fiar sira nia koalia nee.

²⁷ Sira foo sai tiha hotu José nia lia tatoli, i nia haree rasik kuda kareta nebee José haruka baa hodi tula sira, foin nia fiar.

²⁸ Nia dehan, “Hau nia oan José sei moris duni! Hau tenki baa haree lai nia, foin hau bele mate ho hakmatek.”