Jenesis 44 - Biblia Tetun Dili

José nia kopu osan mutin lakon

¹ Sira haan tiha hotu, José foo orden ba nia ema nebee toma konta iha uma nee dehan, “O enxe hare ba ema sira nee nia karoon halo nakonu. Tau fali sira nia osan ba ida-idak nia karoon ibun.

² I o foti hau nia kopu osan mutin, tau iha sira nia alin ikun nia karoon.” Nia mos halo tuir José nia orden nee.

³ Iha aban dadeer-saan nakukun, José husik sira tula hahaan ba sira nia kuda buru, hodi fila ba sira nia rain.

⁴ Sira sai seidauk dook hosi sidade, José dehan ba nia ema nee, “O duni ema sira nee lalais. Bainhira o toman sira, o dehan nunee: ‘Senhor visi halo diak ba imi, nusaa mak imi selu fali ho aat?

⁵ Nusaa mak imi bele naok fali hau nia xefi nia kopu osan mutin? Nee laos xefi nia kopu hodi hemu deit! Maibee nia uza mos hodi buka hatene ema nia destinu. Imi nia hahalok nee aat duni.’ ”

⁶ Entaun José nia ema nee baa duni tuir kedas sira too toman. Nia mos hatete ba sira tuir José nia liafuan ohin.

⁷ I sira hataan, “Lae, senhor! Ami ata nunka halo buat aat ida nee! Senhor koalia saida mak nee?

⁸ Ita boot rasik hatene, osan sira uluk iha ami nia karoon, ami foo fila fali ba ita ona. Nunee, halo nusaa mak ami bele naok fali xefi nia osan mean ho osan mutin iha nia uma?!

⁹ Senhor revista deit baa! Hetan iha see nia karoon, kastigu mate nia! I halo ami seluk sai xefi nia atan deit.”

¹⁰ Maibee José nia ema nee dehan, “Laos nunee! Se hetan kopu iha ema nebee, nia mak sai hau nia atan, sira seluk bele fila.”

¹¹ Sira mos hatuun lalais sira nia karoon, hodi kore kedas.

¹² I José nia ema nee revista didiak sira nia karoon ida-idak, komesa hosi maun boot nian too iha alin ikun. Nia hetan kopu osan mutin nee iha Benjamim nia karoon.

¹³ Haree nunee, Benjamim nia maun sira laran susar teb-tebes too lees tiha hena iha sira nia isin. I sira tula fali naha ba kuda, hodi fila fali ba sidade.

¹⁴ Bainhira sira too iha José nia uma, nia sei iha hela nebaa. Sira hakneak iha José nia oin.

¹⁵ I José hakilar sira, “Nusaa mak imi halo fali nunee mai hau?! Imi la hatene katak ema boot hanesan hau nee, iha kbiit bele siik see mak halo aat hau?”

¹⁶ I Judá hataan, “Senhor, ami atu koalia saida? Nai Maromak foo sai ona ami nia sala. Ami atu defende aan oinsaa tan? Se ita boot atu kaer ami nia alin nee, diak liu senhor kaer ami hotu. Halo ami hotu sai senhor nia atan deit.”

¹⁷ Maibee José hataan, “Laos nunee! Hetan kopu nee iha see, nia deit mak sai hau nia atan! Imi sira seluk bele fila ba imi nia aman deit.”

Judá husu atu troka Benjamim

¹⁸ Depois Judá baa besik José, hodi dehan, “Senhor visi! Hau hatene ita boot nia poder hanesan ho liurai. Nunee keta hirus lai hau. Hau husu lisensa atu koalia ituan ho ita boot.

¹⁹ Uluk ita husu ba ami dehan, ‘Imi sei iha aman ho alin tan ka?’

²⁰ Ami hataan, ‘Ami nia aman katuas ona, i ami iha tan alin ikun ida. Apaa katuas ona mak foin hetan nia. Alin ikun nee iha maun ida, maibee nia la iha tiha ona. Sira nain rua nia inan mos mate tiha ona. Agora, hela alin ikun nee deit. I ami nia aman hadomi loos nia.’

²¹ Maibee senhor haruka ami lori nia mai, atu ita boot haree.

²² I ami hataan dehan, ‘Labarik nee nunka husik nia aman. Se nia sai hosi nia aman nia sorin, ami nia aman bele mate.’

²³ Depois senhor hataan dehan, ‘Se imi la lori imi nia alin nee mai, imi la bele haree tan hau nia oin.’

²⁴ Nunee ami mos fila. Too iha apaa, ami foo hatene hotu ita boot nia liafuan sira nee.

²⁵ Kleur-kleur, ami nia hahaan mos hotu. I apaa haruka ami mai fali iha Ejitu hola tan hahaan.

²⁶ Maibee ami hataan nunee, ‘Apaa! Ami la bele baa tan nebaa. Tanba liurai nia visi hatete ona, se ami la lori ami nia alin ikun baa, ami la bele haree tan nia oin. Nunee ami nia alin ikun nee tenki akompanha ami, foin ami bele lao.’

²⁷ Ami nia aman dehan, ‘Imi hatene hau nia kaben Raquel, nia oan rua deit.

²⁸ Oan primeiru la iha tiha ona. Animal siak haan tiha ona karik, tanba too agora hau la haree tan nia.

²⁹ Se imi hasai tan labarik nee hosi hau, i depois nia hetan dezastre, imi amenta tan susar mai hau katuas nee, too hau mate.’

^30-31 Nee mak senhor visi, se hau fila ba apaa i la lori alin ikun nee, apaa bele mate. Tan nia klamar iha deit labarik nee, i nia mos katuas liu ona.

³² Hau mos promete tiha ona ba apaa katak, hau mak foo garantia ba labarik nee. Hau dehan, se hau la lori fali labarik nee ba nia, hau mak sei lori sala nee too mate.

³³ Nee duni, senhor visi, hau husu nunee deit: Biar hau mak hela fali iha labarik nee nia fatin, hau deit mak sai ita boot nia atan. Husik nia fila baa ho nia maun sira.

³⁴ Se labarik nee la fila, hau mos la fila. Tanba hau la aguenta haree apaa nia terus.”