Jenesis 43 - Biblia Tetun Dili

José nia maun sira fila fali ba Ejitu, ho sira nia alin Benjamim

¹ Iha tempu nee, rai hamlaha iha rai Kanaán amenta liu tan.

² Hahaan nebee Jacó nia oan sira hola hosi Ejitu nee, sira haan hotu ona. Entaun Jacó hatete ba sira dehan, “Oan sira! Diak liu imi fila fali ba Ejitu, hola hahaan ba ita.”

³ Maibee Judá hataan, “Apaa! Liurai Ejitu nia visi foo hatene tiha ona ba ami dehan, ami la bele hatudu tan ami nia oin ba nia, se ami la lori ami nia alin ikun.

⁴ Nunee apaa tenki husik alin Benjamim baa ho ami, foin ami bele baa hola hahaan ba apaa.

⁵ Se apaa la foo Benjamim baa ho ami, ami lakohi baa. Tanba ema Ejitu nee dehan tiha ona nunee.”

⁶ I Jacó hirus sira dehan, “Nusaa mak imi hatete ba ema nee katak, imi sei iha alin ida tan?! Imi halo susar deit hau.”

⁷ I sira hamaus nia dehan, “Apaa! Ema nee husu bebeik, atu hatene ita ho ita nia familia sira hotu. Nia husu nunee, ‘Oinsaa? Imi nia aman sei moris ka? Imi sei iha alin mane seluk tan ka?’ Hotu, ami atu dehan saida?! Ami tenki koalia loloos deit ona. See mak hatene dehan nia atu haruka ami lori ami nia alin baa iha nebaa?”

^8-9 Judá mos hatutan tan dehan, “Apaa! Husik labarik nee baa ho ami. Se iha buat ruma ho nia, hau mak simu todan. Se hau la lori nia moris fila mai apaa, apaa bele foo sala nee mai hau too mate. Entaun, apaa foo labarik nee mai ona, tanba ami tenki baa lalais ona. Se lae, ita balu mate hamlaha.

¹⁰ Se ami la hein kleur hanesan nee, ami fila tiha dala rua ona.”

¹¹ I sira nia aman hataan, “Se nunee, imi halo hanesan nee deit. Lori ita nia riku rai nian hanesan bani been, temperus, ai been morin, ai-moruk pomada, kiar ho fore oi-oin. Hodi baa foo ba liurai nia visi nee, dehan, ‘Nee, hanesan ami nia prezenti ba ita boot.’

¹² Imi mos lori osan hodi hola hahaan, ho tan osan nebee uluk imi hetan iha imi nia karoon laran nee hodi baa foo fali. Karik sira tau sala.

¹³ Imi lori ho imi nia alin. Maibee tenki lori fila mai lalais!

¹⁴ Hau harohan ba Nai Maromak forsa teb-tebes, para halo liurai Ejitu nia visi nee bele hadomi imi. Para nia bele foo fila Benjamim ho Simeão mai hamutuk ho imi. Maibee, se hau nia oan sira tenki lakon, biar hau lori nafatin terus nee.”

¹⁵ Depois sira lori prezenti ho osan, baa ona Ejitu. Sira lori mos Benjamim. Too iha nebaa, sira aprezenta aan ba José.

¹⁶ Bainhira José haree Benjamim ho nia maun sira, nia hatete ba nia ema nebee toma konta nia uma dehan, “Lori sira ba iha hau nia uma! Oho animal ida, i tein halo didiak, tanba orsida sira haan meiudia ho hau.”

¹⁷ I nia ema nee halo tuir hodi lori sira ba iha José nia uma.

¹⁸ Bainhira sira lao ba José nia uma, sira tauk atu-mate. Iha dalan klaran sira koalia ba malu dehan, “Tanba saa mak nia haruka lori ita mai iha nee? Keta halo be nia atu halo terus ita, tanba uluk sira tau fali osan iha ita nia karoon laran. Sira finji lori ita mai iha nee, para hodi kaer ita, halo ita sai nia atan, i hadau hotu ita nia kuda buru sira nee.”

¹⁹ Nee mak sira besik ona José nia uma, sira koalia ba José nia ema nee dehan,

²⁰ “Senhor! Ami husu deskulpa. Tanba uluk ami mai hola hahaan iha nee.

^21-22 Bainhira ami fila ba ami nia rain, ami kalan deskansa iha dalan. Depois ami kore naha para hodi foo haan kuda. I ami haree fali ida-idak nia osan hodi hola hare nee, iha hela karoon laran. Ami la hatene see mak tau! Maibee agora ami lori fali osan nee mai hotu. Ami mos lori ho osan hodi hola tan hahaan. Tanba nee, senhor keta hirus.”

²³ I José nia ema nee hataan, “Imi kalma tiha! Lalika tauk! Karik imi nia Maromak mak foo bensaun ba imi iha imi nia karoon laran. Iha loron nebaa hau simu duni imi nia osan. Entaun imi la iha deve iha nee.” Nia mos hasai Simeão lori ba sira.

²⁴ Depois sira hotu tama ba iha José nia uma. I José nia ema nee tau bee ba sira hodi fasi sira nia ain. Nia mos foo haan ba sira nia kuda buru.

²⁵ I nia foo hatene dehan, “Orsida imi haan meiudia ho xefi.” Nunee sira mos prepara kedas sira nia prezenti.

²⁶ José too iha uma, sira hotu hakneak hodi hakruuk too rai iha José nia oin. Depois sira mos foo sira nia prezenti ba nia.

²⁷ I José husu ba sira, “Oinsaa? Imi hotu diak ka lae? Uluk imi dehan imi nia aman katuas ona. Nia oinsaa? Nia sei moris ka?”

²⁸ Sira hataan, “Ita boot nia atan, ami nia aman, diak hela.” Sira mos hakruuk dala ida tan hodi hatudu respeitu ba nia.

²⁹ Depois José foti matan, i haree nia alin Benjamim. Sira nain rua, aman ida, inan ida. Nia dehan, “Nee mak imi nia alin ikun uluk imi konta nee ka?” I nia hatete ba Benjamim, “Alin! Hau harohan ba Nai Maromak para Nia haraik bensaun barak ba o.”

³⁰ Haree tiha Benjamim, José hanoin teb-tebes, too nia atu tanis deit ona. Nia mos sai lalais husik hela sira, baa iha nia kuartu. I nia tanis iha nebaa.

³¹ Tanis tiha hotu, nia baa fasi nia oin. Nia halo kontenti nia laran, i nia sai baa hasoru fali sira. Nia haruka nia ema sira tau meza.

³² I sira tau meza ida ba José hodi haan mesak. Nia maun-alin sira haan iha meza seluk. Nia funsionariu ema Ejitu sira mos haan iha sira nia meza ketak, tanba ema Ejitu hakribit haan hamutuk ho ema Ebreu.

³³ José nia ema sira prepara ona meza ba José nia maun-alin sira tuur hateke oin ba José. Nia tau sira tuur tuir ida-idak nia tinan, komesa hosi maun boot too alin ikun. Haree nunee, sira mos admira.

³⁴ I José haruka nia ema sira foti hahaan hosi nia meza rasik tau ba iha nia maun-alin sira nia meza. Sira hotu simu hahaan hanesan, maibee Benjamim simu barak liu dala lima. I sira hotu haan-hemu too bosu didiak.