Jenesis 41 - Biblia Tetun Dili

José siik liurai Ejitu nia mehi

¹ Liu tiha tinan rua, liurai Ejitu mos mehi. Nia mehi dehan nia hamriik hela iha mota Nil nia ibun.

² Derepenti, nia haree karau vaka hitu. Karau nee bokur loos too isin nabilan. Sira sai hosi mota laran, baa haan duut iha mota ibun.

³ Depois, iha tan karau vaka hitu sai hosi mota laran. Maibee sira nia isin krekas maran loos. Sira hamriik bes-besik karau sira bokur nee.

⁴ I karau krekas hitu nee, tolan tiha hotu karau bokur hitu nee. Liurai hakfodak hadeer tiha.

⁵ La kleur nia toba fali, nia mehi fali tan. Nia haree hare fulin hitu sai hosi huun ida. Hare nee isin nakonu i fulin kapaas.

⁶ I nia haree tan hare fulin hitu, maibee isin la iha, i namlaik tiha ona tanba anin bailoro.

⁷ I fulin namlaik hitu nee tolan tiha hotu fulin isin nakonu hitu nee. Depois liurai hakfodak tiha, mak foin hatene katak buat nee mehi.

⁸ Iha dadeer-saan, liurai laran susar. Nunee nia haruka baa bolu ema matan dook sira ho matenek nain sira hotu iha rai Ejitu. I nia konta nia mehi nee ba sira, maibee la iha ema ida mak bele siik.

⁹ Depois mak foin ema ida nebee toma konta liurai nia hemu nee, hanoin hetan José. Nia mos foo hatene ba liurai dehan, “Amu liurai, hau tenki foo sai hau nia sala.

¹⁰ Uluk, bainhira amu hirus hau ho hau nia kolega, amu hatama tiha ami ba kadeia,

¹¹ iha kalan ida, ami nain rua mehi. Ida-idak nia mehi ho nia signifikadu keta-ketak.

¹² Iha kadeia laran nee iha mos mane klosan Ebreu ida. Xefi kadeia foti nia hodi toma konta serbisu hotu-hotu iha kadeia. Ami konta ami nia mehi ba nia. I nia mak siik kona.

¹³ Amu liurai foti fali hau ata, tau fali iha hau nia serbisu ida uluk, maibee hau nia maluk nee, amu haruka tara mate tiha. Buat sira nee hotu sai tuir loloos ema Ebreu nee nia koalia.”

¹⁴ Rona nunee, liurai mos haruka ema baa lalais hasai José hosi kadeia. Depois José prepara aan, koi tiha nia hasarahun, troka tiha nia ropa, hodi baa hasoru liurai.

¹⁵ Bainhira nia too, liurai dehan, “José! Hau iha mehi ida. Maibee la iha ema ida mak bele siik. Maibee ema hatete mai hau dehan o mak bele.”

¹⁶ José hataan, “Nai liurai, hau la hatene buat ida. So Nai Maromak deit mak bele foo sai loloos mehi nia signifikadu. I Nia sei hatudu duni buat diak ba amu.”

¹⁷ Entaun liurai komesa konta ona nia mehi nee dehan, “Hau hamriik hela iha mota Nil nia ibun.

¹⁸ Iha karau vaka hitu, sira nia isin bokur loos too nabilan. Sira sai hosi mota laran baa haan duut iha mota ibun.

¹⁹ Iha mos karau vaka hitu tan mak sai mai. Maibee karau sira nee mesak krekas maran deit. Hau nunka haree karau krekas hanesan nee iha rai Ejitu.

²⁰ Maibee hau admira teb-tebes! Tanba derepenti deit, karau krekas hitu nee, tolan tiha hotu karau bokur hitu nee.

²¹ Sira tolan tiha hotu, maibee karau sira nee isin krekas nafatin. Depois hau hakfodak hadeer tiha.

²² Tuir mai hau toba fali, la kleur, hau mehi fali tan. Hau haree hare fulin hitu ho isin nakonu sai hosi huun ida.

²³ I hau haree tan hare fulin hitu maibee isin la iha i namlaik hela, tanba anin bailoro.

²⁴ Hare fulin isin la iha sira nee tolan tiha hare fulin diak sira nee hotu. Depois hau hakfodak tiha. Hau konta tiha ona mehi nee ba ema matenek sira, maibee la iha ema ida mak bele siik.”

²⁵ I José foo hatene dehan, “Nai liurai, mehi rua nee nia signifikadu ida deit. Nai Maromak foo sai ona ba amu liurai, saida mak Nia atu halo.

²⁶ Mehi nee dehan nunee: karau bokur hitu nee, ho hare fulin hitu nebee isin nakonu nee, dehan katak rai sei bosu durante tinan hitu nia laran. Liu hosi mehi rua nee, Nai Maromak hatoo lia ida deit.

²⁷ I karau krekas maran hitu nee, ho hare fulin hitu nebee isin la iha nee, dehan katak rai sei hamlaha iha tinan hitu nia laran.

²⁸ Nunee Nai Maromak foo hatene kedas saida mak Nia atu halo, hanesan ohin hau dehan ona.

²⁹ Ita sei hetan hahaan barak durante tinan hitu nia laran, iha rai Ejitu tomak.

^30-31 Nee liu tiha, ita sei hetan rai hamlaha durante tinan hitu nia laran. Rai sei hamlaha boot, too la iha tan hahaan iha rai nee. I ema hotu-hotu sei hamlaha atu-mate, too sira la hanoin tan tempu hahaan barak nee.

³² Entaun, amu liurai hetan mehi too dala rua nee, hodi hatudu katak Nai Maromak hakotu tiha ona i la kleur tan, buat nee sei sai duni.

³³ Tanba nee, tuir hau nia hanoin, diak liu amu buka ema matenek ida, hodi foti nia para toma konta nasaun nee.

³⁴ Iha tinan hitu nebee hahaan barak nee, diak liu amu mos foti funsionariu balu tan, para aruma hahaan nee. Povu nia hahaan tenki fahe ba parte lima, parte haat bele haan, parte ida tenki entrega ba funsionariu sira hodi rai.

³⁵ Haruka sira halibur hahaan hosi Ejitu tomak, rai hamutuk iha liurai nia armazen, i hein halo didiak.

³⁶ Nunee, bainhira rai hamlaha tinan hitu nee too, ita sei iha hahaan. Ita halo nunee, mak la iha ema ida mate hamlaha.”

Liurai foti José hodi ukun rai Ejitu

³⁷ Rona José koalia nunee, liurai ho nia funsionariu boot sira konkorda ho José nia ideia nee.

³⁸ I liurai dehan, “José nee, Nai Maromak nia Espiritu mak foo poder ba nia. Nee mak la iha tan ema seluk mak matenek liu nia.”

³⁹ Depois liurai hatete ba José dehan, “Nai Maromak foo hatene buat sira nee hotu ba o. Nunee mak o matenek, i o nia hanoin liu ema hotu-hotu.

⁴⁰ Entaun agora hau foti o sai hau nia visi. Hau nia reinu tomak sei kumpri o nia orden. So hau mesak deit mak boot liu o.”

^41-42 Nunee liurai hasai nia kadeli nebee iha karimbu liurai nian, tau ba José nia liman. I nia dehan, “ho kadeli nee, hau foti o sai hau nia visi iha rai Ejitu tomak.” Depois nia foo batina kapaas ida ba José hatais, ho tara korenti mean ida ba nia kakorok.

⁴³ Nia foo mos nia kuda kareta segundu ba José sae. Iha ema halai iha kareta nia oin hodi hakilar fila-fila dehan, “Loke dalan! Foo respeitu! Iha ema boot atu liu!” Hanesan nee mak liurai foti José sai nia visi iha rai Ejitu.

⁴⁴ Liurai dehan ba José nunee, “Hau mak liurai. Maibee iha Ejitu tomak, ema hotu-hotu la bele halo buat ida, se o foo lisensa.”

⁴⁵ I liurai foo naran foun ba José, Safnat-Panea, tuir ema Ejitu nia naran. Nia mos foo kaben José ho feto ida naran Asenat. José nia banin mane naran Potifera. Nia mak toma konta relijiaun iha sidade On. Nunee José sai ema boot iha rai Ejitu.

⁴⁶ José komesa nia serbisu nudar visi ho idade tinan tolu-nulu. Depois nia baa haree fatin hotu-hotu iha rai Ejitu.

⁴⁷ Durante tinan hitu nia laran, toos iha rai nee tomak foo hahaan barak teb-tebes.

⁴⁸ I José halibur hahaan resin nee, hodi haloot. Hahaan hosi toos besik sidade ida-idak, nia rai iha sidade nee.

⁴⁹ Hahaan nebee nia haruka rai nee barak teb-tebes. Hanesan rai henek iha tasi ibun, too ema sukat la bele.

⁵⁰ Tempu hamlaha seidauk too, José nia kaben Asenat hetan oan mane nain rua.

⁵¹ José hatete, “Nai Maromak halo hau haluha tiha terus uluk bainhira hau sai hosi hau nia aman nia uma.” Nee mak nia tau naran ba nia oan primeiru nee, naran Manassés.

⁵² Bainhira nia hetan oan segundu, nia hatete tan, “Hau hetan terus barak ona iha fatin ida nee. Maibee Nai Maromak foo bensaun mai hau, nee duni hau hetan tan oan ida iha nee.” Nia mos tau naran ba labarik nee, Efraim.

⁵³ Liu tiha nee, rai bosu tinan hitu nee ramata.

⁵⁴ Depois rai komesa hamlaha ona, tuir loloos buat nebee uluk José koalia. Iha rai seluk ema hamlaha tiha ona, maibee iha rai Ejitu laran tomak, hahaan sei iha.

⁵⁵ Kleur-kleur, ema iha Ejitu mos komesa hamlaha. I sira baa husu hahaan iha liurai. Liurai haruka sira baa iha José, para halo tuir José nia orden.

⁵⁶ Tempu nee, hamlaha amenta liu tan, too ema iha Ejitu laran tomak hamlaha. Entaun José haruka loke armazen hotu-hotu hodi faan hahaan ba povu Ejitu.

⁵⁷ Depois ema hosi nasaun selu-seluk mos mai hola hahaan hosi José iha Ejitu, tanba tempu nee, rai hamlaha boot.