Jenesis 40 - Biblia Tetun Dili

José siik ema dadur nia mehi

^1-3 Iha kadeia nee, iha ema nain rua mak uluk kaer serbisu iha liurai Ejitu nia palasiu. Ida toma konta liurai nia hemu, ida tan toma konta liurai nia paun. Sira nain rua halo sala hasoru liurai. Nee mak liurai hirus, too nia hatama sira nain rua ba kadeia. Nunee sira nain rua hamutuk ho José.

⁴ I xefi kadeia foo orden ba José para toma konta ema nain rua nee. Sira kleur iha kadeia nee.

⁵ Depois, iha kalan ida, ema nain rua nee mehi. Ida-idak ho nia mehi rasik. I mehi nee nia signifikadu keta-ketak.

⁶ Dadeer-saan fali, José haree sira nain rua oin muroon hela.

⁷ Nia mos husu ba sira, “Tanba saa mak ohin loron nee, imi nia oin tristi nunee?”

⁸ Sira hataan, “Hori-kalan ami mehi, maibee ami la hatene mehi nee dehan saida.” José hataan, “La iha ema ida mak bele hatene, so Nai Maromak deit. Imi konta took. Depois mak hau husu Nai Maromak atu esplika imi nia mehi.”

⁹ Entaun, ema ida toma konta liurai nia hemu nee, komesa konta ona nunee: “Hau mehi, hau haree ai uvas huun ida,

¹⁰ sanak tolu. Ai huun nee komesa moris, nia tahan, nia funan, nia fuan tasak kedas.

¹¹ I hau haree, hau kaer hela liurai nia kopu. Hau foti uvas hodi buti ba kopu nee. Depois hau foo ba liurai hemu.”

¹² Rona nunee, José foo hatene, “Irmaun, mehi nee dehan nunee: sanak tolu nee katak loron tolu.

¹³ Iha loron tolu mai, liurai sei hasai irmaun hosi kadeia. Depois nia sei foti fali irmaun, para hodi toma konta fali nia hemu hanesan uluk.

¹⁴ Bainhira senhor moris diak ona, senhor keta haluha hau. Se ita hadomi duni hau, favor ida foo sai ba liurai, para nia hasai hau hosi kadeia nee.

¹⁵ Tanba ema obriga lori hau hosi Ebreu sira nia rain. Iha Ejitu nee mos, hau la halo sala ida. Maski nunee derepenti ema hatama hau ba kadeia, hanesan ema aat.”

¹⁶ Rona mehi nia signifikadu diak nunee, ema ida toma konta liurai nia paun nee mos komesa konta ona nia mehi ba José, “Alin, hau nia mehi nunee: iha luhu tolu hada malu, hau tutur hela.

¹⁷ Luhu ida iha leten liu, iha liurai nia dosi oi-oin. Maibee manu fuik sira mai haan tiha hotu dosi nee iha hau nia ulun.”

¹⁸ Rona nunee, José hataan, “Irmaun nia mehi nee dehan nunee: Luhu tolu nee katak loron tolu.

¹⁹ Iha loron tolu mai nee, liurai sei haruka ema mai tesi tiha irmaun nia kakorok. Depois sira tara irmaun nia isin ba ai riin. I manu fuik sira sei mai haan hotu irmaun nia mate isin.”

²⁰ Liu tiha loron tolu, liurai halo tinan, i nia halo festa boot ba nia funsionariu sira. Nia foo orden atu hasai nia ema nain rua nee hosi kadeia.

²¹ Depois liurai foti fali nia ema ida toma konta nia hemu nee, ba fali iha nia serbisu ida uluk.

²² Maibee ema ida toma konta liurai nia paun nee, sira tara mate tiha nia, tuir loloos José nia koalia.

²³ Too ikus, ema ida toma konta liurai nia hemu nee la hanoin tan José, maibee nia haluha tiha.