Jenesis 39 - Biblia Tetun Dili

José ho Potifar nia kaben

^1-2 Depois ema Ismael sira lori tiha José ba iha rai Ejitu. Iha nebaa iha ema boot ida naran Potifar. Nia liurai nia xefi seguransa iha palasiu. Potifar nee mak sosa José hosi ema kontratu nain sira, para sai atan iha nia uma. NAI Maromak tulun José iha nebaa, too nia serbisu hotu lao ho diak.

³ Nia xefi haree José nia serbisu hotu-hotu lao ho diak, i nia hatene katak NAI Maromak mak tulun.

⁴ Nee mak nia xefi gosta José, i foo ona fiar ba nia. I nia mos foti José sai nia mandór hodi toma konta nia uma ho nia sasaan sira hotu.

⁵ Tanba José hela iha uma nee, mak Nai Maromak foo bensaun ba nia xefi ema Ejitu nee. Nunee xefi nia uma laran, nia rikusoin, nia toos i nia serbisu hotu-hotu lao ho diak.

⁶ Bainhira Potifar haree José halo serbisu hotu ho diak, nia la hanoin tan buat ida; nia so hatene mak haan deit. José nee mane bonitu ida.

⁷ Nia hela iha nebaa seidauk kleur, Potifar nia kaben gosta fali nia. Nia sempre hamaus José atu toba hamutuk ho nia.

⁸ Maibee José lakohi. Nia hataan dehan, “Keta halo nunee, senhora! Tanba hau nia xefi Potifar foo ona responsabilidade mai hau hodi toma konta buat hotu-hotu iha nee.

⁹ Iha uma nee, la iha tan ema seluk boot liu hau. Tanba xefi foo ona fiar mai hau hodi toma konta buat hotu-hotu. So senhora deit mak lae. Nusaa mak hau bele halo fali buat aat ida nunee! Nee kontra Nai Maromak nia hakarak!”

¹⁰ Maibee bele nunee mos, xefi nia kaben nee loro-loron hamaus bebeik José, para toba hamutuk ho nia. Maibee José la interese ba nia.

¹¹ Iha loron ida, José tama ba uma laran, atu halo nia serbisu. Iha loron nee, la iha ema seluk iha uma.

¹² Nia xefi nia kaben mai kaer José nia faru i dada nia hodi dehan, “Mai ona! Agora ita nain rua mesak deit. Mai ita baa toba ona.” Maibee José lakohi. Nia dada aan halai sai ba liur, husik feto nee kaer nafatin nia faru iha uma laran.

¹³ Bainhira Potifar nia kaben haree José halai sai tiha ba liur husik hela nia faru,

^14-15 nia bolu ema nebee serbisu ho sira, hodi foo hatene, “Imi mai haree lai! Ohin ema Ebreu nee tama iha hau nia kuartu. Nia obriga atu toba hamutuk ho hau, maibee hau hakilar makaas. Nunee maka nia halai sai ba liur, husik hela nia faru nee. Hau nia kaben lori ema malkriadu nee mai, para halo moe deit ita.”

¹⁶ Potifar nia kaben mos kaer hela faru nee too nia laen fila.

¹⁷ Bainhira Potifar fila, nia kaben konta kedas, dehan “Ema Ebreu ita lori mai nee, ohin tama hau nia kuartu atu halo abusu seksual mai hau.

¹⁸ Hau hakilar makaas hodi bolu ema mai, mak nia foin halai sai ba liur, husik hela nia faru nee.”

¹⁹ Rona nia kaben konta nunee, Potifar hirus atu mate.

²⁰ Nia haruka ema kaer José lori baa hatama iha kadeia, hamutuk ho liurai nia ema dadur sira seluk.

²¹ Maibee NAI Maromak la haluha José, i tulun nia nafatin, too xefi iha kadeia gosta teb-tebes José,

²² i foo fiar ba nia. Nee mak nia entrega ema hotu iha kadeia ba José nia liman, i foti nia hodi toma konta serbisu tomak iha nebaa.

²³ Tanba nee, xefi kadeia la ulun moras tan ho serbisu iha kadeia. NAI Maromak tulun nafatin José, too serbisu hotu-hotu iha kadeia lao ho diak.