Jenesis 38 - Biblia Tetun Dili

Judá ho nia feto foun Tamar

¹ Nee hotu tiha, Judá lao husik hela nia maun-alin sira, baa hela ho nia kolega ida naran Hirah iha aldeia Adulam.

² Iha fatin nee iha ema Kanaán ida naran Sua. Judá gosta Sua nia oan feto ida, i sira nain rua kaben. Liu tiha nee, sira hetan oan mane, moris tutuir malu.

³ Oan primeiru, sira tau naran Er.

⁴ Oan segundu, sira tau naran Onan.

⁵ Tuir fali terseiru, naran Sela. Bainhira Sela moris mai, sira muda tiha ona ba aldeia seluk, naran Kesibe.

⁶ Bainhira oan primeiru Er boot ona, Judá baa husu feto ida ba nia. Feto nee naran Tamar. I sira nain rua kaben.

⁷ Maibee Er nee ema hahalok aat teb-tebes. Tanba nee, Nai Maromak kastigu mate tiha nia. Nee mak Er mate la iha oan.

⁸ Entaun Judá dehan ba nia oan segundu, “Onan! O nia maun mate la iha oan. Tuir ita nia lisan, o tenki kaben fali ho o nia maun nia feen, para o bele foo jerasaun ba o nia maun.”

⁹ Onan hatene ona lisan nee. Maibee nia lakohi foo jerasaun ba nia maun Er. Nunee bainhira nia halo relasaun ho Tamar, nia soe ba rai nia fini, para Tamar la bele hetan oan.

¹⁰ Onan sempre halo nunee, halo Nai Maromak hirus teb-tebes. Nee mak Nai Maromak kastigu mate nia.

¹¹ Bainhira Judá haree nia oan rua nebee kaben ho Tamar nee mate hotu, nia mos tauk ona. Nia hanoin, keta halo be nia oan ikun Sela kaben tan ho Tamar, nia mos bele mate tan. Nee mak Judá baa foo hatene ba nia feto foun dehan, “Tamar, diak liu o fila ba o nia inan-aman deit. Bainhira hau nia oan Sela boot ona, foin o fila mai kaben ho nia.” I Tamar fila.

¹² Depois Judá nia kaben mos mate. Bainhira tempu lutu liu tiha ona, nia bolu nia kolega Hirah, i sira nain rua baa iha aldeia ida naran Timna. Iha fatin nee, ema halibur malu hodi tesi Judá nia bibi malae nia fulun, hodi halo faru manas.

¹³ Iha ema foo hatene ba Tamar dehan, “O nia banin mane baa iha Timna hodi tesi bibi malae nia fulun.”

¹⁴ Iha tempu nee, Judá nia oan ikun Sela boot ona. Maibee Tamar hatene ona nia banin mane la hataan nia kaben ho Sela. Entaun Tamar buka dalan hodi reklama nia direitu. Nia hasai nia ropa faluk nian, i hatais fali ropa kapaas. Nia uza veo hodi taka nia oin. I nia baa tuur iha dalan Timna nian, iha portaun aldeia Enaim nian.

¹⁵ Bainhira Judá liu hosi portaun, nia haree Tamar. Maibee nia hanoin feto luroon, tanba Tamar hatais vestidu kapaas, i taka tiha nia oin.

¹⁶ Judá la hatene katak, feto nee nia feto foun. Nunee nia baa besik hodi husu atu toba ho nia. Tamar husu, “Senhor sei foo saida?”

¹⁷ Judá hataan, “Oinsaa se hau foo bibi ida ba o?” Tamar hataan, “Diak senhor. Naran katak senhor pinoor netik buat ruma mai hau kaer, too ita haruka bibi nee mai.”

^18-19 Judá husu tan, “O hakarak hau pinoor hela saida?” Tamar hataan, “Hau hakarak senhor nia karimbu nebee tara hela iha ita nia kakorok nee. Ho mos ai-tonka iha ita nia liman nee.” Rona nunee, Judá foo kedas sasaan sira nee ba nia. Depois sira nain rua baa toba hamutuk hanesan feen ho laen. Hotu tiha, Tamar fila ona. Depois nia hasai tiha nia vestidu kapaas ho veo, hodi hatais fali ropa faluk nian. Hakfodak mai, ema hatene katak Tamar isin rua ona.

²⁰ Judá fila tiha, nia husu tulun ba nia kolega Hirah dehan, “O lori bibi nee foo ba feto luroon iha Enaim, hodi hola fali hau nia sasaan nebee pinoor hela iha nebaa.” Hirah too iha nebaa, nia husu baa-mai, maibee la hetan feto nee.

²¹ Nia husu ba ema sira iha nebaa dehan, “Imi haree feto luroon ida nebee sempre tuur iha portaun nee ka? Nia iha nebee?” Sira hataan, “Senhor, iha nee feto luroon la iha.”

²² Nunee Hirah fila fali ba Judá. Nia foo hatene dehan, “Hau la hetan feto nee. Hau buka baa-mai, maibee ema iha nebaa hatete mai hau dehan, iha fatin nee feto luroon la iha.”

²³ Judá hataan, “Husik hela sasaan sira nee ba nia baa. Naran katak ema keta halo moe ita! Hau atu selu nia, maibee ita buka nia la hetan.”

²⁴ Liu tiha fulan tolu, ema baa hatete ba Judá dehan, “O nia feto foun Tamar halo aan hanesan feto luron. Agora nia isin rua.” Rona nunee, Judá hirus atu-mate. I nia foo orden dehan, “Baa lori feto nee mai, para sunu mate nia!”

²⁵ I sira baa atu lori Tamar mai. Maibee nia hasai karimbu ho ai-tonka. Nia haruka sira baa foo hatene ba nia banin mane dehan, “Senhor revista took sasaan sira nee. Karimbu ho ai-tonka nee nia nain mak halo hau isin rua.”

²⁶ Haree tiha sasaan sira nee, Judá hatene kedas katak, sasaan sira nee ninian. I nia foo sai dehan, “Loos duni! Feto nee la sala. Hau mak sala. Tuir loloos, hau tenki foo kaben nia ho hau nia oan Sela. Maibee hau lakohi.” Depois nia la toba hamutuk tan ho Tamar ona.

²⁷ Too tempu atu partus ona, Tamar tuur ahi oan mane kaduak.

²⁸ Momentu nia tuur ahi, oan ida nia liman sai uluk mai liur. Parteira kesi kabas mean ida ba nia liman, hodi dehan, “Nee mak oan primeiru.”

²⁹ Maibee bebee nee dada fila fali nia liman. I ida seluk mak moris uluk fali. Parteira dehan ba bebee nee, “O nee forti duni! Tanba o sena malu too o sai uluk.” Nunee bebee nee hetan naran, Peres (nee katak, ‘sena malu sai ba liur’).

³⁰ Nee foin nia alin ho kabas mean iha liman nee moris mai. Sira tau nia naran, Sera (nee katak ‘mean lakan’).