Jenesis 37 - Biblia Tetun Dili

Jacó hela iha rai Kanaán

^1-2a Jacó sira nia istoria too iha nee. Sira hela iha rai Kanaán, iha nia aman nia hela fatin uluk.

José ho nia maun-alin sira

^2b Jacó nia oan ida naran José. Bainhira nia tinan sanulu resin hitu ona, nia ho nia maun sira loro-loron hein bibi ho bibi malae. José ho nia maun sira, aman ida, maibee inan keta-ketak. José nia inan Raquel, nia maun sira nia inan mak Bila ho Zilpa. José sempre kesar ba nia aman saida mak nia maun sira halo.

³ Jacó hadomi liu José duke nia maun sira, tanba nia katuas ona mak foin hetan José. Iha loron ida nia haruka suku ropa furak ida foo ba José.

⁴ Bainhira nia maun sira haree sira nia aman hadomi liu José, sira odi loos nia, too sira mos la koalia diak tan ho nia.

^5-7 Iha kalan ida, José mehi. I nia konta nia mehi nee ba nia maun sira dehan, “Maun sira, rona lai hau nia mehi nee. Hau mehi dehan ita hotu kesi hare halo futun. Ida hau kesi nee derepenti hamriik. Depois imi nian mos hamriik haleu, hodi hakruuk ba hau nian.” Rona nunee, nia maun sira hirus nia liu tan.

⁸ I sira siak José dehan, “O mak atu ukun fali ami ka?” Nunee sira odi nia liu tan, tanba nia foo sai mehi nee.

⁹ Depois José mehi fali. Nia konta ba nia maun sira dehan, “Hau mehi tan hanesan nee. Hau haree loromatan, fulan, ho fitun sanulu resin ida. Hotu-hotu hakruuk hela mai hau.”

¹⁰ Depois nia konta ba nia aman. Maibee nia aman hirus nia hodi dehan, “Mehi saida mak nee? Hau, o nia inan, ho o nia maun-alin sira, ami atu baa rei o nia ain ka? Nee demais ona!”

¹¹ Nunee José nia maun sira laran moras liu tan. Maibee nia aman hanoin hela, mehi saida mak nee.

Sira faan José ba rai Ejitu, nudar atan

¹² Iha loron ida, José nia maun sira lori sira nia aman nia bibi ba besik aldeia ida naran Sikem.

¹³ La kleur, nia aman dehan, “José! O nia maun sira hein bibi besik iha Sikem. O tenki baa haree sira.” I José hataan, “Diak, apaa.”

¹⁴ Nia aman dehan tan, “O baa lai, haree took o nia maun sira ho hau nia bibi, diak ka lae? Depois o fila fali mai, foo hatene hau.” Entaun José lao hosi sira nia uma iha foho leet iha Hebron, baa too iha rai Sikem.

¹⁵ Too iha nebaa, José buka sira tuun-sae. Too ema ida haree nia lao baa-mai iha kampu laran, husu ba nia, “O buka saida?”

¹⁶ José hataan, “Tiu, hau buka hau nia maun sira. Sira lori bibi mai besik iha nee. Tiu keta haree sira karik?”

¹⁷ Ema nee hatete, “Sira sai tiha ona, dehan atu baa aldeia Dotan.” Rona nunee, José tuir nia maun sira baa, too nia haree hetan sira iha Dotan.

¹⁸ Maibee José sei dook, sira haree nia ona, i sira kombina atu oho nia.

¹⁹ Sira dehan ba malu, “Haree took! Ida mehidoor nee mai ona!

²⁰ Mai ita oho tiha nia! I soe tiha nia tama ba rai kuak nee. Depois ita foo hatene ba apaa dehan animal siak mak haan tiha nia. Nee mak ita haree nia mehi sira nee atu sai saida.”

²¹ Maibee nia maun Ruben lakohi, i buka atu salva José. Nia dehan ba nia alin sira, “Ita keta oho nia!

²² Diak liu ita soe tiha nia ba kuak laran nee deit. Iha nee rai fuik, la iha ema ida atu hatene. Naran katak la bele halo kanek nia.” Ruben koalia nunee, tanba nia hakarak husik José fila ba uma.

²³ Bainhira José too baa, nia maun sira kaer tiha nia, i rakut sai tiha nia ropa furak nee.

²⁴ Depois sira rasta nia soe tama ba kuak laran.

²⁵ I sira fila ba haan. Sira sei haan hela, derepenti haree ema grupu ida liu. Ema sira nee kontratu nain; sira tula sasaan iha kuda kamelu atu faan. Hanesan ai been morin, temperus, ho ai-moruk oi-oin. Afinal grupu nee ema Ismael, mai hosi aldeia Gileade halo viajen ba rai Ejitu hodi faan sira nia sasaan.

²⁶ Entaun Judá foo hatene ba nia maun-alin sira dehan, “Diak liu nunee deit! Ita lalika oho nia, ita oho nia hodi halo saida? Bele halo nusaa mos, ita subar nia raan la diak.

²⁷ Nia ita nia alin. Diak liu ita baa faan nia ba ema Ismael sira, para todan nee la bele monu ba ita.” I sira hotu tuir Judá nia koalia nee.

²⁸ Bainhira ema kontratu nain sira nee liu, José nia maun sira hasae nia hosi rai kuak. I sira faan José ba ema Ismael sira, ho folin osan mutin rua-nulu. Depois sira lori José ba Ejitu.

²⁹ Momentu sira faan José, Ruben la iha. Bainhira nia fila baa haree rai kuak nee, nia hakfodak tanba José la iha tiha ona. Nunee nia lees tiha nia ropa nebee nia hatais, tanba nia laran susar teb-tebes.

³⁰ Nia fila ba nia alin sira hodi dehan, “Labarik nee la iha tiha ona! Agora hau susar ona. Hau atu halo saida?!”

³¹ Tuir mai sira oho bibi ida, i foti José nia ropa furak nee, reta ba bibi nia raan.

³² Depois sira foti ropa nee, lori baa foo sira nia aman, hodi dehan, “Apaa! Ami hili hena ida nee. Apaa haree took. Keta José nia ropa karik.”

³³ Haree hena nee, Jacó hatene kedas. Nia hataan, “Ropa nee hau nia oan nian duni! Animal siak lees tiha nia ona. Hau nia oan mate tiha ona!”

³⁴ Haree nunee, Jacó lees tiha nia ropa, i hatais fali hena aat ida, tanba nia tristi atu-mate. Nia mos tanis lelir bebeik ba nia oan nee.

³⁵ Nia oan mane ho oan feto sira hotu mai hamaus nia, maibee nia lakohi rona. Nia dehan, “Lalika! Hau sei tristi too mate, tanba hau la bele haluha labarik nee.” Nunee Jacó laran tristi teb-tebes.

³⁶ Iha tempu nee, ema kontratu nain sira too iha rai Ejitu. Sira lori José ba faan ba ema boot ida, naran Potifar. Nia liurai Ejitu nia xefi seguransa.