Jenesis 36 - Biblia Tetun Dili

Esaú nia jerasaun

¹ Nee Esaú nia jerasaun sira, nia mos naran Edom.

² Esaú kaben ho feto Kanaán nain rua. Ida ema Ete, mak Elom nia oan feto, naran Ada. Ida segundu ema Heveu, naran Oolibama. Nia aman naran Aná, i nia avoo naran Zibeaun.

³ Esaú mos kaben ho Ismael nia oan feto, naran Bazemat, Nebaiote nia biin.

⁴ Esaú nia kaben boot naran Ada, hetan oan ida naran Elifaz. Bazemat nia oan naran Reuel.

⁵ I Oolibama nia oan mak Jeús, Jalaun ho Korá. Nee mak Esaú nia oan sira nebee moris iha rai Kanaán.

⁶ Iha loron ida, Esaú muda fali ba fatin seluk, dook hosi Jacó. Nia lori nia kaben sira ho nia oan sira, nia ema serbisu sira, animal sira, ho nia rikusoin hotu.

⁷ Esaú fahe malu ho Jacó, tanba sira nia animal ho riku sira barak demais. Nunee rai nebee sira hela ba nee, hahaan la too ba sira nia animal sira haan.

⁸ Tanba nee mak Esaú (nebee mos naran Edom), baa hela iha foho iha Seir.

⁹ Tuir mai, Esaú nia jerasaun, nebee ema dehan ema Edom. Sira hela iha foho iha Seir.

^10-13 Esaú nia kaben Ada iha oan mane ida, naran Elifaz. Elifaz nia feen iha oan mane nain lima. Nee mak: Teman, Omar, Zefó, Gaetán, ho Kenaz. Elifaz nia feen kiik, naran Timna, iha oan mane ida, naran Amaleke. Esaú nia kaben Bazemat iha oan mane ida, naran Reuel. Reuel hetan oan mane nain haat. Mak nee: Naate, Zerá, Samá, ho Mizá.

¹⁴ Esaú nia kaben Oolibama, Aná nia oan, Zibeaun nia bei oan nee, iha oan mane nain tolu, mak nee: Jeús, Jalaun ho Korá.

^15-16 Esaú nia bei oan sira fahe sai suku bara-barak. Suku ida-idak ho nia liurai. Esaú nia oan boot Elifaz nia oan sira, sai liurai suku Teman, liurai suku Omar, liurai suku Zefó, liurai suku Kenaz, liurai suku Korá, liurai suku Gaetán, ho liurai suku Amaleke. Sira nee hotu Esaú ho nia kaben naran Ada nia jerasaun.

¹⁷ Esaú nia oan Reuel nia oan sira, sai liurai suku Naate, liurai suku Zerá, liurai suku Samá, ho liurai suku Mizá. Sira nee hotu Esaú ho nia kaben Bazemat nia jerasaun.

¹⁸ Esaú ho nia kaben Oolibama nia oan sira, sai liurai suku Jeús, liurai suku Jalaun, ho liurai suku Korá.

¹⁹ Suku sira nee hotu Esaú nia jerasaun.

Seir nia jerasaun

^20-21 Iha rai nee, iha ema Hori ida, naran Seir. Nia oan sira fahe sai suku bara-barak. Ida-idak ho nia liurai. I nia oan sai liurai suku Lotan, liurai suku Sobal, liurai suku Zibeaun, liurai suku Aná, liurai suku Eser, ho liurai suku Disán.

²² Lotan nia oan mak: Hori ho Homán. (Lotan nia alin feto, Timna.)

²³ Sobal nia oan mak: Alván, Manaate, Ebal, Sefó, ho Onan.

²⁴ Zibeaun nia oan mak: Aiá ho Aná. Aná nee mak hetan bee matan manas iha rai fuik maran, bainhira nia hein nia aman nia kuda buru sira.

^25-26 Aná nia oan feto mak: Oolibama, ho oan mane mak, Dizon. Dizon nia oan mak: Hendan, Esban, Itran, ho Keran.

²⁷ Eser nia oan mak: Bilan, Zaavan, ho Akan.

²⁸ Disán nia oan mak: Uz ho Aran.

^29-30 Nunee liurai ema Hori sira mak: Lotan, Sobal, Zibeaun, Aná, Dizon, Eser, ho Disán. Sira hotu hela iha rai Seir.

Edom nia liurai sira

³¹ Bainhira Israel seidauk iha liurai, rai Edom iha tiha ona liurai. Sira nia naran mak tuir mai nee:

³² Beor nia oan, Belá, ukun iha sidade Dinabá.

³³ Bainhira Belá mate, Jobabe mak troka nia sai liurai. Nia aman naran Zerá hosi aldeia Bozra.

³⁴ Bainhira Jobabe mate, Husaun mak troka nia sai liurai. Husaun hosi ema Teman sira nia rai.

³⁵ Bainhira Husaun mate, Adade mak troka nia sai liurai. Nia aman naran Bedade, hosi aldeia Avite. (Nia mak manaan funu hasoru ema Midián iha Moab.)

³⁶ Bainhira Adade mate, Samlá mak troka nia sai liurai. Samlá hosi aldeia Masreka.

³⁷ Bainhira Samlá mate, Saul mak troka nia sai liurai. Saul hosi aldeia Reobote iha mota ibun.

³⁸ Bainhira Saul mate, Baal-Hanan mak troka nia sai liurai. Nia aman naran Akbor.

³⁹ Bainhira Baal-Hanan mate, Hadar mak troka nia sai liurai. Hadar hosi aldeia Paú. Nia kaben naran Meetabel. Meetabel nia aman naran Matrede. I nia avoo, Me-Zaabe.

^40-43 Liurai sira nebee mai hosi Esaú sira mak nee: Timna, Alva, Jetete, Oolibama, Elá, Pinom, Kenas, Teman, Mibzar, Magdiel, ho Iran. Suku ida-idak foo naran ba fatin nebee sira hela, tuir sira nia naran rasik. Nee hotu Esaú nia jerasaun, ema Edom sira nia istoria.