Jenesis 34 - Biblia Tetun Dili

Sikem halo violensia seksual ba Jacó nia oan feto Diná

¹ Iha loron ida, Lea nia oan feto, Diná, baa vizita feto klosan sira nebee hela iha rai nee.

² Rai nee nia liurai naran Hamór, hosi suku Heveu. Bainhira Hamór nia oan mane Sikem haree Diná, nia kaer lori halai i halo violensia seksual ba nia.

³ Sikem matan monu ba Diná, nia gosta teb-tebes. Nunee nia hamaus Diná para feto nee mos bele gosta nia.

⁴ Sikem foo hatene ba nia aman, dehan, “Apaa! Baa husu Diná para hau kaben ho nia.”

⁵ Jacó rona dehan ema halo violensia seksual tiha ba nia oan feto. Maibee nia seidauk halo buat ida, tanba nia oan mane sira sei hein hela bibi iha kampu. Nunee nia hein too sira hotu fila.

⁶ Momentu nee, Sikem nia aman Hamór mai hasoru Jacó, atu husu Diná.

⁷ Natoon sira nain rua koalia hela, Jacó nia oan mane sira too mai hosi kampu. Bainhira sira rona dehan Sikem halo tiha ona violensia seksual ba sira nia alin feto, sira nia fuan moras, i hirus atu-mate. I sira dehan, “Buat ida nunee la bele akontese ba ita povu Israel. Ita la bele simu ema halo buat aat nunee.”

⁸ Hamór hamaus Jacó sira dehan, “Senhor Jacó! Hau nia oan Sikem gosta teb-tebes ita nia oan feto. Nee duni, hau husu para foo lisensa ba hau nia oan kaben ho nia.

⁹ Se bele, ita nia oan sira kaben malu. Imi nia oan mane kaben ho ami nia oan feto. Nunee mos ami nia oan mane kaben ho imi nia oan feto.

¹⁰ Imi mos bele hela hamutuk ho ami iha nee. Imi bele hela iha nebee deit, konformi imi nia hakarak. Imi mos bele kontratu ho livre, i bele hetan rikusoin iha nee.”

^11-12 Depois Sikem koalia ho Diná nia aman ho nia maun sira dehan, “Imi hakarak husu saida deit, hau foo. Imi hakarak husu hira hodi taka moe nian, ho selu hira mos, hau foo. Naran katak imi foo lisensa para hau kaben ho imi nia alin feto.”

¹³ Maibee Jacó nia oan sira hatene ona katak Sikem estraga tiha ona sira nia alin Diná. Nee duni, sira finji hataan ba Sikem ho nia aman Hamór,

¹⁴ “Ami la foo kaben ami nia alin ho ema nebee la sunat. Nee halo moe deit ami!

¹⁵ Maibee imi tenki halo nunee: Imi mane sira hotu, kiik-boot, tenki sunat hanesan ami.

¹⁶ Imi halo nunee, foin ita bele kaben malu. I ami mos bele hela hamutuk ho imi iha nee, para ita sai nasaun ida.

¹⁷ Maibee se imi lakohi sunat, maka ami lori fali ami nia alin, i ami baa ona.”

¹⁸ Hamór ho Sikem simu ho diak buat nebee sira husu.

¹⁹ Maibee Sikem lakohi hein tan, tanba nia gosta teb-tebes Diná. Ema hotu-hotu iha rai nee respeita Sikem.

²⁰ Nunee Hamór ho Sikem baa iha fatin tesi lia nian iha portaun tama ba aldeia, i koalia ho ema hotu iha rai nee dehan,

²¹ “Maun-alin sira hotu! Ema Israel sira nee hakarak moris dame ho ita, nunee husik sira hela hamutuk ho ita iha rai nee. Rai nee luan ba ita hotu. Nunee ita bele kaben ho sira nia oan feto, i sira mos bele kaben ho ita nia oan feto sira.

²² Sira husu buat kiik-oan ida deit hosi ita, mak nee: ita mane hotu-hotu tenki sunat hanesan sira.

²³ Se ita moris hamutuk ona, maka sira nia animal, ho sira nia riku hotu sai ita nia rikusoin. Nee duni, diak liu ita simu deit sira nia hakarak. Mai ita sunat hamutuk. Maun-alin sira hataan ka?”

²⁴ I ema hotu nebee halibur iha fatin nee, konkorda ho Hamór no Sikem. Entaun mane hotu-hotu iha rai nee sunat rame-rame.

²⁵ Liu tiha loron tolu, sira nebee sunat nee kanek sei moras, Diná nia maun Simeão ho Levi foti sira nia surik, sira baa tama nonook ba sidade, i sira oho tiha mane sira hotu.

²⁶ Hamór ho Sikem mos sira oho. Depois sira hasai Diná hosi Sikem nia uma, i sira fila.

²⁷ Nee liu tiha, Jacó nia oan sira seluk tama ba sidade nee, hadau sasaan hotu, tanba ema halo violensia seksual tiha ona ba sira nia alin iha nebaa.

²⁸ Sira hadau ema nia sasaan uma laran hotu, i sira lori mos ema nia animal iha kampu hotu.

²⁹ Sira lori hotu feto ho labarik sira, i hadau hotu sasaan sira folin karun iha sidade nee.

³⁰ Bainhira Jacó hatene tiha buat nee, nia hatete ba Simeão ho Levi, “Imi halo saida mak nee? Imi halo susar hau deit! Orsida ema Kanaán, ema Peris, ho ema hotu iha rai nee, odi mate ita. Sira ema barak, maibee ita ema ituan deit. Se sira ataka ita, ita rahun kedas.”

³¹ Maibee sira hataan ho hirus dehan, “Apaa! Ami la bele husik sira halo ami nia alin hanesan feto luron!”