Jenesis 33 - Biblia Tetun Dili

Jacó hasoru malu ho nia maun Esaú

¹ Iha loron nee, Jacó haree Esaú mai ho ema nain 400. Entaun Jacó fahe nia oan sira, ida-idak ho nia inan.

² Nia tau nia kaben kiik rua nee ho sira nia oan sira lao iha oin. Depois Lea ho nia oan sira, foin Raquel ho nia oan José iha kotuk liu.

³ Maibee Jacó lao iha sira hotu nia oin. Bainhira atu besik ona nia maun, nia hakneak no hakruuk too rai, dala hitu.

⁴ Bainhira Esaú haree nia alin Jacó, nia halai baa hasoru, i nia hakuak no rei nia. I sira nain rua tanis.

⁵ Bainhira Esaú haree feto sira ho labarik sira, nia husu, “Ema sira nee see?” Jacó hataan, “Sira nee mak Nai Maromak foo ona ba maun nia atan, hau.”

⁶ Depois nia kaben kiik sira, ho sira nia oan sira mai hakruuk ba Esaú.

⁷ Tuir mai, Lea ho nia oan sira mai hakruuk ba Esaú. Ikus liu, José ho nia inan Raquel mos mai hakruuk ba Esaú.

⁸ I Esaú husu, “Animal sira nebee ohin o haruka mai nee, hodi halo saida?” Jacó hataan, “Hau foo animal sira nee, para senhor bele simu hau ho laran diak.”

⁹ Maibee Esaú hataan, “Alin Jacó! Hau nia riku mos barak. Nunee o lalika foo buat ida mai hau.”

¹⁰ I Jacó hataan, “Maun, keta halo nunee! Maun tenki simu, para hatudu katak maun simu ona hau ho liman rua. Tan ohin hau haree maun nia oin hamnasa, hanesan hau haree Nai Maromak.

¹¹ Nunee, hau husu ho respeitu, atu maun simu hau nia prezenti nee. Tan Nai Maromak diak teb-tebes ba hau, nee mak Nia foo mai hau buat hotu nebee hau presiza.” Jacó hamaus nafatin Esaú, too nia simu duni prezenti sira nee.

¹² Depois Esaú hatete, “Entaun, ita lao ona! Hau akompanha imi.”

¹³ Maibee Jacó hataan, “Lalika, maun! Maun haree rasik baa, labarik sira nee sei kiik, i seidauk bele lao lalais. I animal sira nebee foin oan mos barak. Se ita obriga sira lao lalais, iha loron ida deit, animal sira nee bele mate mohu.

¹⁴ Nunee diak liu maun sira baa uluk deit. Mak ami lao neineik hosi kotuk. Depois mak hau baa hasoru maun iha Seir.”

¹⁵ I Esaú hatete, “Se nunee, hau husik hela hau nia ema balu ho o, para sira hatudu dalan ba imi.” Maibee Jacó hataan, “Maun, lalika fadigadu! Naran katak, hau hatene, maun simu ona hau.”

¹⁶ Depois Esaú sira fila fali ba Seir.

¹⁷ I Jacó sira baa iha Sukot. Iha nee, nia halo uma, no halo luhan hodi sulan nia animal sira. Nee mak fatin nee, sira tau naran Sukot. (Nee dehan katak ‘baraka’.)

¹⁸ Nunee Jacó sira fila ho diak hosi Mezopotámia. Ikus mai, sira baa too iha aldeia Sikem iha rai Kanaán. I sira halo tenda hodi hela besik aldeia nee.

¹⁹ Rai nebee Jacó sira hodi halo tenda nee, nia hola kotu hosi Hamór, Sikem nia aman. Nia selu ho osan mutin atus ida.

²⁰ Iha fatin nee, nia hada fatuk halo altar hodi halo sakrifisiu. I nia tau fatin nee naran El-Elohe-Israel, nee dehan katak, ‘Maromak nebee Israel adora’.