Jenesis 31 - Biblia Tetun Dili

Jacó sira halai husik hela Labão

¹ Iha loron ida, Jacó rona Labão nia oan sira koalia nunee, “Jacó sai riku boot tiha ona, tanba nia hadau ita nia aman nia riku hotu.”

² Jacó mos haree nia banin mane oin toos hela deit, i la diak ho nia hanesan uluk.

³ Tuir mai NAI Maromak hatete ba Jacó nunee, “O tenki fila ona ba o nia maluk sira, iha o nia aman sira nia rain. I Hau sei hamutuk ho o.”

⁴ Entaun Jacó haruka bolu Raquel ho Lea, atu hasoru malu ho nia iha kampu nebee bibi sira haan hela ba.

⁵ I nia hatete ba sira, “Ikus-ikus nee, hau haree imi nia aman nia oin totoos deit mai hau. I nia la diak ona ho hau hanesan uluk. Maibee Nai Maromak ida nebee hau nia aman adora nee, hamutuk ho hau.

⁶ Imi nain rua hatene, durante nee hau serbisu mate aan ba imi nia aman.

⁷ Maibee bele nunee, nia hamatak hau bebeik, i hau nia salariu nia muda dala sanulu ona. Biar nunee mos, Nai Maromak tau matan nafatin mai hau.

⁸ Bainhira imi nia aman koalia dehan, ‘Animal makerek funan-funan sira hodi selu o nia kole,’ maka animal sira nee mos hahoris oan funan-funan hotu. Loron seluk nia dehan fali, ‘Animal makerek riska-riska sira hodi selu o nia kole,’ maka animal sira nee hahoris fali oan riska-riska hotu.

⁹ Nunee Nai Maromak hasai imi nia aman nia animal sira, hodi foo mai hau.

¹⁰ Dala ida, tempu bibi aman ho bibi inan tuir malu, hau mehi, haree bibi aman sira nebee hola bibi inan sira nee, makerek hotu.

¹¹ I Nai Maromak nia anju hatete mai hau liu hosi mehi dehan, ‘Jacó!’ I hau hataan, ‘Nai, hau mak nee?’

¹² Anju nee hatete, ‘Haree took! Bibi aman sira nebee hola malu ho o nia bibi inan sira nee, so iha deit makerek. Hau mak halo nunee, tanba Hau haree ona saida mak Labão halo ba o.

¹³ Hau, Nai Maromak ida nebee hatudu Aan ba o iha Betel. Iha nebaa o hada fatuk, i o fui mina azeiti baa, hodi adora Hau. Iha fatin nee mos o halo promesa ho Hau. Agora o tenki husik tiha rai ida nee, hodi fila ba o nia inan-aman sira nia rain iha nebaa.’ ”

¹⁴ Entaun Raquel ho Lea hataan, “Diak! Ami tuir deit! Tanba ami la hetan ona rikusoin hosi ami nia aman.

¹⁵ Kleur ona nia konsidera ami hanesan ema fuik. Nia faan hotu ona ami i osan nebee nia simu nee nia haan tiha hotu ona.

¹⁶ Riku hotu nebee Nai Maromak hasai hosi apaa, agora ami nian, ho ami nia oan sira nian. Nunee saida mak Maromak hatete ona, halo tuir deit.”

^17-18 Liu tiha nee, Jacó haloot nia sasaan hotu. Nia mos hasae nia kaben sira ho nia oan sira ba kuda kamelu. I nia lori nia animal hotu, ho nia riku hotu nebee nia hetan iha Mezopotámia, hodi fila ba Kanaán.

¹⁹ Momentu nee Labão sai tiha baa tesi nia bibi malae nia fulun. I Raquel naok tiha nia aman nia estatua lulik sira.

²⁰ Jacó sira sai baa nonook deit, la foo hatene ba nia banin mane.

²¹ Nia lori nia riku sira nee hotu, i sira halai deit, hakur mota Eufrates, hodi lao ba iha foho Gileade.

Labão duni tuir Jacó

²² Liu tiha loron tolu mak foin Labão rona dehan, Jacó sira halai tiha ona.

²³ Entaun nia halibur nia ema sira, hodi duni tuir nia mane foun. Sira duni tuir durante loron hitu nia laran, foin hetan sira iha foho Gileade.

²⁴ Kalan nee, Maromak hatudu Aan ba Labão iha mehi, hodi hatete, “Orsida se o koalia ho Jacó, o kuidadu ho o nia liafuan.”

²⁵ Momentu nee, Jacó halo tenda iha foho Gileade. Labão sira mos halo tenda la dook hosi sira.

²⁶ I Labão baa hasoru Jacó. Nia hatete, “Nusaa mak o lori hau nia oan feto sira halai nonook nunee? Hanesan o kaer sira iha funu laran!

²⁷ Nusaa mak o halai nonook, la despede tan hau! Se o foo hatene didiak mai hau, maka hau sei halo festa, akompanha imi ho muzika, foin husik imi baa.

²⁸ O nia sala ida tan mak nee, o la foo tempu mai hau hodi rei hau nia bei oan sira, mak husik sira baa. Hanesan nee, o beik-teen liu.

²⁹ La susar buat ida hau halo aat ba o! Maibee hori-kalan, Nai Maromak, ida nebee o nia aman adora nee, foo hatene mai hau dehan, bainhira hau koalia ho o, hau tenki kuidadu didiak ho hau nia liafuan.

³⁰ Hau komprende katak o hadomi o nia aman, nee mak o hakarak fila lalais. Maibee nusaa mak o naok fali hau nia estatua lulik sira?”

³¹ I Jacó hataan nunee, “Tiu keta hirus hau! Hau sai nonook deit, tanba hau tauk, keta halo be tiu hadau fali tiu nia oan feto sira.”

³² Jacó la hatene katak nia kaben Raquel naok tiha estatua lulik sira nee. Nunee nia dehan, “Tiu! Kona ba lulik sira, tiu buka deit baa! Se hetan iha see, kastigu mate nia. Sobu sasaan hotu deit baa. Se tiu hetan tiu nia riku seluk, foti fila fali. Bele ema sira nee hotu sai sasin.”

³³ Entaun Labão baa revista sira ida-idak nia tenda. Primeiru nia baa revista iha Jacó nia tenda. Tuir mai nia baa iha Lea nia tenda. Depois baa iha atan feto rua nee nia tenda. Maibee nia la hetan lulik sira nee. Ikus mai, nia baa iha Raquel nia tenda.

³⁴ Maibee Raquel subar tiha lulik sira nee iha kuda kamelu nia sela okos. I nia tuur iha sela leten. Labão revista didiak iha Raquel nia tenda, maibee la hetan.

³⁵ Raquel hatete ba nia aman, “Apaa keta hirus. Hau la bele hamriik, tan hau nia fulan mai.” I Labão buka maibee nia la hetan lulik sira nee.

³⁶ Entaun Jacó komesa hirus. Nia protesta ho lian makaas dehan, “Hau halo aat saida ba tiu? Too tiu duni hau, hanesan fali ema aat ida.

³⁷ Tiu sobu tiha ona hau nia sasaan hotu. I tiu hetan saida? Tau took iha oin nee, para ita hotu haree. Nunee ema sira nee hotu mak tesi, sasaan sira nee see nian.

³⁸ Tinan rua-nulu ona, hau serbisu ba tiu. Uluk hau sei hein tiu nia animal, hotu-hotu moris mai ho diak. Bibi ida mos hau la haan.

³⁹ Se iha animal siak mak tata mate tiu nia bibi ida, hau la foo hatene ba tiu, maibee hau mak selu fali. I se ema naok tiu nia animal, tiu haruka hau mak troka fali, mezmu ke hau la sala.

⁴⁰ Loro-loron, loro manas sunu hau. Kalan-kalan, hau malirin nakdedar. Hau la toba, tanba hein tiu nia animal.

⁴¹ Durante tinan rua-nulu nia laran hau sempre halo nunee! Hau serbisu tinan 14, hodi hetan tiu nia oan feto sira. Liu tiha nee, hau serbisu amenta tan tinan neen, hodi hetan hau nia animal sira. Serbisu kleur teb-tebes, maibee tiu muda hau nia salariu dala sanulu.

⁴² Sorti Nai Maromak iha! Ida nebee avoo Abraão ho apaa Isac adora. Se Nia la tau matan ba hau, maka tiu duni tiha ona hau fila ho liman mamuk. Maibee Nai Maromak la taka matan ba hau nia terus, i Nia mos haree hau nia serbisu hotu. Nee mak hori-kalan, Nia mai foo hatene dehan tiu mak sala.”

Jacó ho Labão halo akordu

⁴³ Rona hotu tiha Jacó nia koalia, Labão hataan, “Feto rua nee hau nia oan. Labarik sira nebee imi hetan nee, hau nia bei oan hotu. Animal sira nee hotu hau nian. Buat hotu-hotu nebee o haree iha nee, mesak hau nian. Maibee hau atu halo saida? Atu haruka fila mos, la bele.

⁴⁴ Nunee diak liu, ita nain rua halo akordu ida. I ita tenki halo tuir akordu nee.”

⁴⁵ Depois Jacó foti fatuk boot ida hodi harii iha fatin nee, hanesan sinal ida.

⁴⁶ I nia haruka nia ema sira baa hili fatuk halo bou. Depois sira hotu tuur hodi haan besik fatuk bou nee.

⁴⁷ I Labão tau naran ba fatuk bou nee, Jegar-Saaduta. Maibee Jacó tau naran, Galeede.

⁴⁸ I Labão hatete, “Fatuk bou nee sai testemunha ba ita nain rua.” Nee mak fatin nee naran, Galeede.

⁴⁹ Labão tau naran ba fatin nee, Mispa, tanba nia dehan, “NAI Maromak mak sei tau matan ba ita nain rua, bele ita nain rua dook malu mos, ita la bele kontra akordu nee.

⁵⁰ Se o halo aat ba hau nia oan sira nee, ka kaben ho feto seluk, mezmu ke hau la hatene, maibee, Nai Maromak mak sai testemunha entre o ho hau.

^51-52 Haree took fatuk nebee hamriik nee, ho fatuk bou nee. Fatuk sira nee, sai hanesan baliza. O la bele sai liu fatuk sira nee, atu halo aat ba hau. I hau mos la bele sai liu fatuk sira nee, hodi halo aat ba o.

⁵³ Ita jura hodi Nai Maromak nebee ita nia bei-ala sira adora. Maromak nee mak o nia avoo Abraão, ho hau nia avoo Naor adora. Nia mak sai ita nia juis hodi tesi ita nia lia. Ita jura katak ita sei kumpri ita nia akordu nee.” Rona tiha nunee, Jacó jura hodi Nai Maromak nia naran, ida nebee nia aman Isac adora.

⁵⁴ Nee liu tiha, Jacó oho animal ida, nia lori baa halo sakrifisiu ba Maromak iha foho nee nia tutun. Depois nia bolu nia ema sira nee hotu hodi haan hamutuk, i sira hadeer too dadeer-saan iha fatin nee.

⁵⁵ Iha dadeer-saan nakukun, Labão baa hakuak hodi rei nia oan sira ho nia bei oan sira hotu. Nia foo bensaun ba sira, i fila fali ba nia rain.