Jenesis 30 - Biblia Tetun Dili

¹ Maibee Raquel seidauk hetan oan. Nee mak nia laran moras nia biin. Nia mos dehan ba nia laen, “Senhor! Foo ona oan mai hau! Se lae, diak liu hau mate deit.”

² Jacó hirus nia hodi dehan, “O hanoin hau nee Maromak para bele foo oan ba o ka?! Maromak mak la husik o iha oan.”

³ Raquel hataan, “Diak liu senhor hola hau nia atan Bila, para nia foo oan mai hau.”

⁴ Nunee nia foo Bila ba nia laen, i Jacó toba hamutuk ho nia.

⁵ Depois Bila isin rua, i nia tuur ahi, oan mane ida.

⁶ Raquel dehan, “Nai Maromak rona ona hau nia orasaun. Nee mak Nia foo mai hau oan mane ida. Nai Maromak tesi ona hau nia lia ho loloos.” I labarik nee nia tau naran Dan (nee dehan katak ‘tesi lia’).

⁷ Depois Bila isin rua fali, i nia tuur ahi tan oan mane ida.

⁸ I Raquel hatete, “Hau hadau malu ho hau nia biin, i hau mak manaan.” Nee mak nia tau naran ba labarik nee, Naftali. (Nee dehan katak ‘hadau malu’.)

⁹ Lea haree katak nia la hetan tan oan, entaun nia foo nia atan Zilpa ba nia laen, para kaben ho nia.

¹⁰ I Zilpa tuur ahi oan mane ida.

¹¹ Lea hatete, “Hau sorti.” I nia tau naran ba labarik nee, Gad. (Nee dehan katak ‘destinu diak’.)

¹² Depois Zilpa tuur ahi oan mane ida tan.

¹³ I Lea hatete, “Agora hau foin kontenti! Feto sira sei koalia ba malu dehan, hau sorti teb-tebes ona.” Nee mak nia tau naran ba labarik nee, Asér. (Nee dehan katak ‘haksolok’.)

¹⁴ Too tempu koa hare, Ruben baa iha ai laran, nia hetan ai-moruk ida para bele halo ema hetan oan. I nia lori mai foo ba nia inan Lea. Raquel haree i husu ba Lea dehan, “Mana! Foo ai-moruk nee ituan mai hau.”

¹⁵ Maibee Lea hataan, “O nee demais ona! O hadau tiha ona Jacó hosi hau, agora o hakarak hadau tan ai-moruk nebee hau nia oan lori mai nee?” Maibee Raquel hatete, “Entaun mana, foo ai-moruk nee mai hau, depois orsida kalan, mana mak toba hamutuk ho Jacó.” I Lea mos simu.

¹⁶ Iha lokraik Jacó fila hosi toos. Lea baa hasoru nia hodi dehan, “Jacó! Kalan nee o tenki toba ho hau! Tanba hau aluga ona o hodi hau nia oan nia ai-moruk.” Iha kalan nee, Jacó mos toba ho Lea.

¹⁷ I Nai Maromak rona Lea nia orasaun. Nee mak nia isin rua, i nia tuur ahi, oan mane numeru lima.

¹⁸ Lea tau naran ba labarik nee, Isakar (nee dehan katak ‘selu kole’). Tanba nia dehan, “Nai Maromak selu ona hau nia kole, tan hau foo ona Zilpa kaben ho hau nia laen.”

¹⁹ Tuir mai, Lea isin rua tan, i nia tuur ahi, oan mane neen ona.

²⁰ Nia hatete, “Nai Maromak foo ona prezenti diak mai hau. Nunee agora, hau nia laen tenki respeita hau, tanba hau foo ona oan mane nain neen ba nia.” Nee mak nia tau labarik nee nia naran, Zebulón. (Nee dehan katak ‘foo respeitu’.)

²¹ Nee liu tiha, Lea tuur ahi oan feto ida, i nia tau naran, Diná.

²² Depois maka Nai Maromak hanoin Raquel. Nia rona Raquel nia orasaun, i foo oan ba nia.

²³ Nunee nia isin rua, i tuur ahi oan mane ida. Nia hatete, “Nai Maromak hasai ona hau nia moe.”

²⁴ Nia tau naran ba labarik nee, José (nee dehan katak ‘husik nia amenta baa’). Tanba nia dehan, “Hau husu ba Nai Maromak para foo tan oan mane ida mai hau.”

Jacó buka meius hodi amenta nia bibi

²⁵ Bainhira José moris mai ona, Jacó dehan ba Labão, “Tiu! Se bele, hau fila ona ba hau nia rain.

²⁶ Husik hau lori fila hau nia kaben ho labarik sira. Tiu hatene ona, hau serbisu mate aan ba ita, hodi selu kotu ona sira. Nunee, agora sira hau nian ona.”

²⁷ Maibee nia tiun hataan, “O rona lai. Hau husu ona ba ema siik-nain ida i nia dehan, 'NAI Maromak foo bensaun mai hau, tanba o'.

²⁸ Agora o husu hira deit mos, hau selu. Naran katak o hela iha nee, hodi serbisu nafatin ba hau.”

²⁹ Jacó hataan, “Tiu rasik haree ona, hau serbisu mate aan. I tiu nia animal sira mos amenta barak baa bebeik.

³⁰ Uluk hau seidauk mai iha nee, tiu nia riku seidauk barak nunee. Maibee agora, tiu sai riku tiha ona. NAI Maromak foo bensaun ona ba tiu, tanba hau nia serbisu. Agora too ona tempu para hau serbisu ba hau nia kaben ho hau nia oan sira.”

³¹ Labão husu tan, “Hau tenki selu o, oinsaa?” Jacó hataan, “Tiu lalika selu buat ida. Hau sei hein nafatin tiu nia animal sira, naran katak hau bele halo buat ida.

³² Foo lisensa mai hau, atu loron nee duni hau baa haketak tiu nia bibi ho bibi malae sira. Bibi nebee makerek, bibi malae nebee makerek, ho bibi malae nebee metan, hau nian, hodi selu hau nia kole. Sira seluk hotu tiu nian.

³³ Ikus mai, tiu sei hatene hau ema moris loos ka lae. Loron saida deit, tiu bele baa revista hau nia animal sira. Se ita haree bibi nebee mak la makerek ka bibi malae mutin, tiu hatene kedas katak hau naok tiu nia animal.”

³⁴ Labão hataan, “Diak liu nunee deit ona.”

³⁵ Iha loron nee, Labão haketak tiha animal sira nebee makerek, ho bibi malae nebee metan. I nia haruka nia oan sira hein animal sira nee.

³⁶ Depois sira lori animal sira nee ba iha fatin ida dook hosi Jacó. Lao ain loron tolu nia laran. Maibee Jacó sei hein nafatin nia banin mane nia bibi ho bibi malae.

³⁷ Liu tiha nee, Jacó tesi ai sanak hosi ai huun oin tolu, i nia taa ai nia kulit halo riska makerek.

³⁸ Nia tau ai sanak makerek sira nee iha animal sira nia hemu fatin, tanba animal sira gosta hola malu iha nebaa.

³⁹ Nunee, bainhira sira hola malu iha ai sanak makerek nia oin, kuandu sira hahoris, bibi oan sira mos isin makerek.

⁴⁰ Bainhira Labão nia animal sira atu hola malu, Jacó halo see oin ba animal sira makerek nee. Nunee, bainhira oan sira moris mai sai makerek. I nunee Jacó nia animal amenta barak. I nia haketak tiha sira hosi Labão nian, tau hamutuk ho ninian rasik.

⁴¹ Bainhira animal bokur sira hola malu, Jacó baa tau ai makerek nee iha hemu fatin iha animal sira nia oin.

⁴² Maibee bainhira nia haree animal krekas mak hola malu, nia la tau ai makerek nee baa. Nunee Labão nian mak bibi krekas sira. I Jacó nian mak bibi bokur.

⁴³ Ho hanesan nee, Jacó sai riku boot. Nia bibi, bibi malae, kuda kamelu, kuda buru, ho atan mos barak.