Jenesis 3 - Biblia Tetun Dili

Ema lakohi rona ba Nai Maromak

¹ Hosi animal sira hotu nebee NAI Maromak halo ona iha mundu, samea mak matenek hodi bobar lia tuun-sae. Iha loron ida, samea husu ba feto dehan, “NAI Maromak bandu dehan, ‘Imi la bele haan ai fuan sira iha toos nee’, loos ka lae?”

² Feto nee hataan, “Lae! Ami bele haan ai fuan hotu iha toos nee!

³ Maibee iha ai huun ida deit iha toos nia klaran, nia fuan mak Nai Maromak bandu ami la bele haan, i la bele book nia fuan. Se lae ami mate.”

⁴ Maibee samea hataan fali dehan, “Nee la loos! Imi la mate!

⁵ Nai Maromak bandu nunee, tanba Nia hatene ona, se imi haan ai fuan nee, imi nia matan sei nakloke i imi sei sai matenek hanesan Nia. Nunee imi hatene saida mak diak, i saida mak aat.”

⁶ I feto haree ai huun nee diak, i nia fuan mos furak ba haan, nia hanoin dehan, “Se hau haan ai fuan nee, hau sei sai matenek.” Entaun nia kuu ai fuan nee, nia haan. I nia mos lori baa foo nia laen, i nia laen mos haan.

⁷ Haan tiha, derepenti deit sira nain rua nia matan nakloke i hatene katak sira isin molik hela. Nee mak sira baa suku hamutuk ai tahan hodi taka sira nia isin molik.

⁸ Iha lokraik, sira rona NAI Maromak lao iha toos nee. Nunee sira baa subar tiha iha ai laran.

⁹ Maibee NAI Maromak bolu mane nee dehan, “Adão, o iha nebee?”

¹⁰ Mane nee hataan, “Hau rona Maromak nia lian iha toos. Maibee hau tauk, tanba hau isin molik hela. Nee mak hau halai baa subar.”

¹¹ I Nai Maromak hatete, “See mak foo hatene ba o dehan o molik? O haan tiha ona ai fuan nebee Hau bandu nee ka?”

¹² Adão hataan, “Feto ida nebee NAI Maromak foo mai hau nee, nia mak foo ai fuan nee mai hau haan.”

¹³ I NAI Maromak husu ba feto, “Nusaa mak o halo nunee?” Feto nee hataan, “Samea mak bosok hau. Nee mak hau haan tiha ona ai fuan nee.”

NAI Maromak foo malisan ba sira

¹⁴ Nunee NAI Maromak foo malisan ba samea nee dehan, “Tanba o halo ona nunee, Hau kastigu o todan liu animal sira seluk. Komesa agora, o sei dolar deit iha rai i haan rai rahun, iha o nia moris tomak.

¹⁵ Hau sei halo o ho feto nee inimigu bebeik. I imi nain rua nia bei oan sira mos nunee. O nia jerasaun sei tata ema nia ain tuban. Maibee feto nee nia jerasaun ida, sei sama rahun o nia ulun.”

¹⁶ I Nai Maromak foo hatene ba feto nee dehan, “Hau sei amenta o nia terus bainhira o isin rua, no amenta moras bainhira o tuur ahi. Maibee bele nunee mos, o sei hakarak nafatin o nia laen. Maski nunee, nia mak sei domina o.”

¹⁷ I Nai Maromak foo hatene ba mane nee dehan, “O la tuir Hau nia orden, maibee o tuir fali o nia kaben nia hakarak, too o haan ai fuan nebee Hau bandu nee. Tanba o nia hahalok nee, o hetan kastigu, i rai mos hetan malisan. Komesa agora too o mate, o tenki serbisu mate aan, foin o bele hetan hahaan. Ho serbisu nunee, foin o bele moris.

¹⁸ Rai sei foo duut aat ho ai tarak; maski nunee o sei hetan ai-haan hosi toos.

¹⁹ O sei serbisu too kosar metan sai foin o hetan ai-haan. O halo nunee too o mate. Hau halo o hosi rai, bainhira o mate, o sei fila fali ba rai.”

²⁰ Adão tau naran ba nia kaben ‘Eva’ (nee dehan katak ‘moris’), tanba nia ema hotu-hotu nia inan.

²¹ Depois NAI Maromak halo hena hosi animal nia kulit, foo ba sira nain rua hatais.

NAI Maromak duni sai Adão ho Eva hosi toos Eden

²² I NAI Maromak hatete, “Agora nee ema hatene ona buat diak, no buat aat, hanesan ona Ita. Keta halo be sira haan tan ai-fuan hosi ai-huun nebee foo moris, nunee sira bele moris nafatin.”

²³ Entaun NAI Maromak duni sai tiha sira hosi toos Eden, ba iha fatin seluk, atu fila rai. Ema mai hosi rai, i tenki mos moris hosi rai.

²⁴ Duni sai tiha sira, NAI Maromak haruka Nia anju nebee iha liras baa hein toos nee iha loro-sae nia sorin baa. Maromak tau surik kroat nebee dulas baa-mai, i lakan hanesan ahi. Maromak haruka sira taka tiha dalan tama ba toos nee, tan Nia lakohi ema baa kuu ai-fuan nebee bele foo moris nafatin.