Jenesis 28 - Biblia Tetun Dili

¹ Entaun Isac halo tuir Rebeca nia hakarak. Nia bolu Jacó, i foo bensaun ho konselhu dehan, “Rona didiak! O la bele kaben ho feto Kanaán.

² Maibee o baa iha Mezopotámia, iha avoo Betuél nia uma. O baa kaben ho tiu Labão nia oan feto ida.

³ Nai Maromak ida nebee forsa teb-tebes sei foo bensaun ba o i amenta o nia oan halo barak, para nia jerasaun mos sai nasaun boot barak.

⁴ I Nai Maromak nia promesa ho avoo Abraão tuun ba o ho o nia jerasaun. Rai nee sai o nian, tuir Nai Maromak promete ona ba Abraão.”

⁵ Koalia hotu nunee, Isac haruka Jacó ba Mezopotámia, iha nia tiun Labão ho avoo Betuél nia uma.

Esaú kaben ho Ismael nia oan feto

⁶ Esaú rona dehan Isac foo tiha ona bensaun ba Jacó, i bandu nia la bele kaben ho feto Kanaán. I Isac haruka nia baa kaben ho nia tiun nia oan feto ida iha Mezopotámia.

⁷ Esaú mos hatene katak Jacó halo tuir nia inan-aman nia haruka, i baa ona Mezopotámia.

⁸ Depois nia hatene katak nia aman la foo valor ba nia kaben, ema Kanaán sira.

⁹ Nunee nia baa iha nia aman boot Ismael, Abraão nia oan, i nia kaben tan ho Ismael nia oan, naran Maalate. Maalate nee Nabaiote nia alin feto.

Jacó mehi iha Betel

¹⁰ Nunee Jacó sai hosi Berseba, baa iha Haran.

¹¹ Bainhira loro tuun ona, nia too iha fatin ida, nia foti fatuk ida hodi tau ulun hanesan sumasu. Depois nia toba.

¹² Bainhira nia toba, nia iha mehi ida. Iha mehi nia haree eskada ida aas too iha lalehan. I Nai Maromak nia anju sira hosi lalehan tuun-sae eskada nee.

¹³ Iha mehi nee, Jacó haree NAI Maromak hamriik iha nia sorin, hodi hatete, “Hau nee NAI Maromak, o nia avoo Abraão ho o nia aman Isac nia Maromak. Hau sei foo rai ida nee ba o, ho o nia jerasaun sira.

¹⁴ O nia jerasaun sei barak hanesan rai-henek, i sira sei namkari ba iha loro-sae too loro-monu, rai ulun too rai ikun. Liu hosi o nia jerasaun, nasaun hotu-hotu iha mundu sei hetan bensaun.

¹⁵ O baa iha nebee deit, Hau hamutuk ho o, i tau matan ba o. I Hau sei lori fila fali o mai iha rai nee. Hau la husik o mesak. Hau sei halo sai duni buat nebee mak Hau promete ona.”

¹⁶ Jacó hadeer, i dehan, “Afinal, NAI Maromak iha fatin ida nee. Agora mak hau foin hatene!”

¹⁷ Nia tauk i nia hanoin dehan, “Fatin ida nee halo hau nia isin fulun hamriik. Tebes duni Nai Maromak nia uma iha nee! I nee odamatan ba lalehan.”

¹⁸ Iha aban dadeer-saan, Jacó hadeer, nia foti fatuk nebee hodi tau nia ulun nee, nia tidin tiha fatuk nee halo hamriik. Depois nia fui mina azeiti ba fatuk nee, hodi adora Maromak.

¹⁹ Nia foo naran ba fatin nee, Betel, nee dehan katak ‘Maromak nia uma’. (Uluk fatin nee naran Lus.)

²⁰ Depois Jacó jura dehan, “Se Nai Maromak hamutuk ho hau, i tau matan mai hau iha hau nia viajen, i foo hahaan ho hena mai hau,

²¹ too hau fila ho diak, NAI Maromak sei sai hau nia Maromak.

²² Fatuk nebee hau harii nee, sai fatin hodi adora Nai Maromak. I buat hotu-hotu nebee Maromak foo mai hau, hau sei fahe ba parte sanulu; parte ida hau sei foo fila fali ba Maromak. Fatuk nebee hau harii nee, sai fatin hodi adora Nai Maromak. I buat hotu-hotu nebee Maromak foo mai hau, hau sei fahe ba parte sanulu; parte ida hau sei foo fila fali ba Maromak - nee mak dizimu.”