Jenesis 27 - Biblia Tetun Dili

Rebeca haruka Jacó bosok nia aman hodi simu bensaun

¹ Bainhira Isac katuas ona i nia matan mos malahuk liu ona, nia bolu nia oan mane boot, ida nebee nia hadomi liu, hodi dehan, “Esaú, mai lai iha nee!” Esaú hataan, “Saida, apaa?”

² Isac foo hatene dehan, “Hau katuas ona. Hau la hatene bainhira mak hau mate.

³ Nee duni, baa foti o nia rama, baa kasa animal fuik ruma mai hau.

⁴ I o tein halo didiak tuir hau nia hakarak, hodi mai hau haan. Haan tiha hotu, hau foo bensaun ba o, molok hau mate.”

⁵ Entaun Esaú sai ona baa kasa. Maibee Rebeca rona hela Isac nia koalia nee.

⁶ Nunee nia baa foo hatene ba Jacó dehan, “Hau nia oan! Ohin hau rona o nia aman koalia ho o nia maun dehan,

⁷ ‘O baa kasa animal fuik ida, tein halo didiak, lori mai hau haan. Hau haan hotu ona, mak hau foo bensaun ba o, iha NAI Maromak nia oin, molok hau mate.’

⁸ Nee duni, o rona didiak! I tuir deit buat nebee hau haruka.

⁹ O baa kaer bibi malae bokur oan rua, lori mai hau tein tuir o nia aman nia hakarak.

¹⁰ Depois o lori baa foo o nia aman haan. I nia sei foo bensaun ba o, molok nia mate. Nunee o mak hetan bensaun, laos o nia maun.”

¹¹ Jacó hataan, “Maibee, amaa! Hau nia maun nia isin fulun, hau nia isin kabeer.

¹² Keta halo be apaa lamas kona hau nia isin, nia hatene kedas katak hau bosok nia. Nunee nia bele foo fali malisan mai hau.”

¹³ Nia inan hatete, “Jacó! O keta laran rurua. Se o nia aman foo malisan ba o, kona mak amaa. Agora o baa kaer ona bibi nee foo mai hau tein ona.”

¹⁴ Jacó baa kaer bibi sira nee, oho tiha, lori baa foo nia inan. I Rebeca tein halo didiak tuir Isac nia hakarak.

¹⁵ Depois nia baa foti Esaú nia hena diak ida foo ba Jacó hatais.

¹⁶ Nia mos falun Jacó nia liman ho nia kakorok, ho bibi nee nia kulit.

¹⁷ Depois nia foo hahaan furak nee ho paun nebee nia foin tunu ba Jacó.

¹⁸ I Jacó lori hahaan nee baa foo nia aman, i dehan, “Apaa! Hau mai ona.” Isac husu, “O nee see?”

¹⁹ Jacó hataan, “Hau apaa nia oan mane boot, Esaú! Hau halo tuir tiha ona saida mak apaa haruka nee. Hadeer baa haan ona. Hau tein tiha ona naan nebee hau baa kasa nee. Apaa haan ona baa, para foo ona bensaun mai hau.”

²⁰ I Isac dehan, “O nee makaas duni. Halo nusaa mak o bele hetan naan lalais nunee?” Jacó hataan dehan, “Tanba NAI Maromak ida nebee apaa adora nee, mak tulun hau.”

²¹ I Isac dehan, “O bes-besik mai hau lamas took. O nee Esaú tebes ka lae?”

²² I Jacó baa besik nia aman. Katuas komesa lamas nia, i hatete, “Lian nee hanesan Jacó nia lian. Maibee liman nee Esaú nia liman.”

²³ I nia la konhese Jacó, tanba nia liman fulun hanesan Esaú. Bainhira nia atu foo bensaun,

²⁴ nia husu fali tan, “O nee Esaú tebes ka?” Jacó hataan, “Tebes apaa!”

²⁵ Isac hatete, “O foo naan nee mai hau haan. Depois hau foo bensaun ba o.” Nunee Jacó foo hahaan nee ba nia haan, ho tua ba nia hemu.

²⁶ I nia aman dehan, “Hau nia oan! Mai besik iha nee, hodi rei hau.”

²⁷ Bainhira nia baa besik hodi rei nia aman, Isac horon Esaú nia hena iis. I nia foo bensaun ba Jacó dehan nunee, “Hau nia oan nia iis hanesan iis toos nian, nebee NAI Maromak foo bensaun ona.

²⁸ Nunee Nai Maromak sei hatuun mahobeen hosi lalehan, para halo bokur o nia toos. I Nia foo hare ho uvas barak ba o.

²⁹ Nasaun barak sei sai o nia atan. I povu sira sei hakruuk ba o. O nia familia mos, o mak manda, i sira hakneak iha o nia oin. See mak foo malisan ba o, sira sei hetan malisan. I see mak foo bensaun ba o, sira sei hetan bensaun.”

Esaú husu Isac foo bensaun ba nia

³⁰ Bainhira Isac foo bensaun tiha ona ba Jacó, i Jacó foin sai husik nia aman, nia maun Esaú fila mai hosi kasa, lori naan.

³¹ Nia baa tein naan nee, lori ba nia aman. Nia hatete, “Apaa! Hadeer ona, haan naan nee, para foo bensaun mai hau.”

³² Isac hakfodak, i husu, “O nee see tan?” Esaú hataan, “Hau Esaú! Apaa nia oan mane boot.”

³³ Isac komesa nakdedar, i nia husu, “Se nunee, ohin see mak lori naan mai hau haan nee? Hau mos foo bensaun tiha ona ba nia. I bensaun nee la bele hasai fali.”

³⁴ Rona nunee, Esaú laran moras, i tanis hakilar, “Apaa! Foo bensaun mos mai hau!”

³⁵ Isac hataan, “O nia alin mai bosok tiha hau, hodi hadau tiha ona o nia bensaun.”

³⁶ Esaú hatete, “Nia bosok hau dala rua ona. Fofoun nia bosok hau kona ba hau nia direitu hanesan oan mane boot. Agora nia bosok tan hau hodi hadau hau nia bensaun. Nia naran Jacó nee loos duni. Apaa, sei iha tan bensaun seluk foo mai hau ka?” (Naran Jacó dehan katak ‘kaer ain tuban’. Maibee dehan mos ‘bosok-teen’.)

³⁷ Isac hataan, “Hau nia oan! Hau foti tiha ona nia sai o nia xefi. I nia maun-alin sira hotu, sai ona nia atan. Hau foo ona ba nia, hare barak teb-tebes, ho tua nakonu res-resin. Agora bensaun saida tan mak hau atu foo ba o?”

³⁸ Esaú dehan, “Apaa nia bensaun ida deit ka? Apaa foo mos bensaun mai hau, bele bensaun kiik deit mos, la iha buat ida.” I nia tanis hakilar.

³⁹ Isac hataan, “O sei moris dook hosi rai bokur, i mahobeen la tuun hosi lalehan hodi habokon o nia rai.

⁴⁰ O nia surik mak sei foo moris ba o. Maibee bele halo oinsaa mos, o sai ona atan ba o nia alin. So bainhira o kontra nia, foin o bele sai hosi nia liman.”

Rebeca haruka Jacó halai

⁴¹ Esaú odi makaas Jacó, tanba nia alin hadau tiha ona nia bensaun. Maibee nia hanoin dehan, “La kleur tan, apaa mate. Nunee hein deit. Tempu hadeer mate hotu ona, hau sei oho tiha nia!”

^42-43 Bainhira Rebeca rona kona ba Esaú nia planu nee, nia bolu Jacó hodi dehan, “O rona didiak! O nia maun rai odi ba o, i hakarak oho o. Halai lalais ba o nia tiun iha Haran.

⁴⁴ Baa hela lai iha nebaa, too o nia maun laran malirin ona.

⁴⁵ Bainhira nia haluha ona buat nebee o halo ba nia, hau sei haruka ema baa bolu o. Tanba hau lakohi hau nia oan rua lakon hotu iha loron ida.”

⁴⁶ I Rebeca hatete ba Isac, “Esaú nia kaben ema Ete sira nee halo hau nia ulun fatuk moras ona. Se Jacó kaben tan ho feto Ete, diak liu hau mate deit ona.”