Jenesis 25 - Biblia Tetun Dili

Abraão kaben fali

¹ Abraão kaben fali ho feto ida naran Ketura.

² Ketura foo oan ba Abraão mak hanesan tuir mai nee: Zinran, Joksán, Medán, Midián, Isbake, ho Suá.

³ Joksán nia oan mak Seba, ho Dedán. Dedán nia jerasaun mak ema Asúr, ema Letus, ho ema Leum.

⁴ Midián nia oan mak nee: Efá, Efer, Enoke, Abida ho Elda. Sira nee hotu Ketura nia jerasaun.

^5-6 Bainhira Abraão sei moris, nia foo prezenti ba Hagar ho Ketura nia oan sira. Depois nia haruka sira baa hela iha rai Kanaán iha loro-sae sorin baa, dook hosi nia oan Isac. Maibee nia rikusoin hotu, nia entrega ba Isac.

Abraão mate

^7-8 Abraão moris too katuas liu ona, i nia mate ho tinan 175.

^9-10 I nia oan Isac ho Ismael hakoi nia iha fatuk kuak Makpela, besik Manre. Uluk Abraão hola rai nee hosi ema Ete, Zoar nia oan Efron. Sara mos hakoi tiha ona iha fatuk kuak nee.

¹¹ Abraão mate tiha, Nai Maromak foo bensaun ba Isac. Iha momentu nee, Isac hela besik bee posu naran Beer-Laai-Roi, nee katak ‘Bee matan hosi Maromak nebee Moris, nebee tau matan mai hau’.

Ismael nia jerasaun

¹² Nee Ismael nia istoria. Ismael nee Abraão nia kaben kiik Hagar nia oan. Hagar nee Sara nia atan hosi Ejitu.

^13-16 Ismael iha oan mane nain sanulu resin rua. Sira nia naran tutuir malu hosi oan boot too oan ikun, mak nee: Nebaiote, Kedar, Adbeel, Mibsaun, Misma, Dumá, Masá, Adade, Tema, Jetur, Nafis, ho Kedemá. Oan sira nee sai suku sanulu resin rua nia bei-ala, suku ida-idak ho nia rain rasik. Sira tau naran ba rai nee, ida-idak tuir sira nia bei-ala nia naran.

¹⁷ Ismael mate ho tinan 137.

¹⁸ Ismael nia jerasaun hela iha Havila ho Sur nia leet, iha dalan hosi Ejitu ba Asúr. Sira la hela ho Abraão nia jerasaun sira seluk.

Esaú ho Jacó

¹⁹ Abraão nia oan Isac nia istoria, hanesan tuir mai nee.

²⁰ Bainhira Isac kaben ho Rebeca, Isac tinan 40. Rebeca nia aman Betuél, nia maun Labão. Sira nee ema Aram hosi Mezopotámia.

²¹ Rebeca la iha oan. Nee mak Isac harohan ba NAI Maromak, atu foo oan ba nia. NAI Maromak rona nia orasaun, nunee Rebeca isin rua, oan kaduak.

²² Maibee labarik sira nee dudu malu bebeik iha nia inan nia kabun laran. Rebeca hanoin, “Tanba saa mak labarik rua nee nunee?” I nia husu ba NAI Maromak.

²³ NAI Maromak hataan, “Oan nain rua iha o nia kabun laran nee sei sai nasaun rua nia bei-ala. Nasaun sira nee sei funu malu bebeik. Oan ida ikun sei forti liu ida boot. I maun sei serbii ba nia alin.”

²⁴ Bainhira too ona nia loron, Rebeca mos tuur ahi, oan mane kaduak.

²⁵ Oan boot nia isin kor mean, i nia isin fulun hotu. Nee mak sira tau naran, Esaú (nee rona atu hanesan liafuan ida nebee dehan katak ‘isin fulun barak’).

²⁶ Depois nia alin moris mai, kaer hela nia maun nia ain tuban. Nee mak sira tau naran ba nia, Jacó (nee rona atu hanesan liafuan ida nebee dehan katak ‘ain tuban’). Bainhira sira moris mai, Isac tinan 60 ona.

Jacó hadau Esaú nia direitu hanesan oan mane boot

²⁷ Bainhira labarik rua nee boot ona, Esaú sai kasador diak ida. Nia sempre sai ba foho. Maibee Jacó ema hakmatek, i gosta hela iha uma deit.

²⁸ Isac hadomi liu Esaú tanba nia gosta haan naan hosi animal fuik. Maibee Rebeca hadomi liu Jacó.

²⁹ Iha loron ida, Jacó daan hela koto mean, Esaú foin fila hosi kasa mai. Nia kolen i hamlaha loos.

³⁰ Nia dehan ba Jacó, “Hau hamlaha atu mate! Foo koto nee mai hau haan lai!” (Nee mak sira bolu nia Edom. Nee rona atu hanesan liafuan ida nebee dehan katak ‘mean’.)

³¹ Jacó hataan, “Diak, maun. Maibee foo lai maun nia direitu hanesan oan mane boot mai hau.”

³² Esaú hataan dehan, “Hau la interese ho direitu oan mane boot nian! O nian deit baa. Hau hamlaha atu-mate ona nee.”

³³ Maibee Jacó dehan, “Maun jura uluk lai dehan, ita foo ona ita nia direitu nee mai hau.” Esaú mos jura nunee.

³⁴ I Jacó foo koto ho paun ba nia. Esaú haan-hemu tiha hotu, nia hamriik baa ona. Nunee Esaú despreza tiha nia direitu hanesan oan mane boot.