Jenesis 24 - Biblia Tetun Dili

Abraão nia atan buka noiva ba Isac

¹ Abraão katuas liu ona. NAI Maromak sempre kuidadu nia, i foo bensaun ba nia iha saida deit.

^2-3 Abraão iha atan ida hodi toma konta nia rikusoin hotu. Katuas nee mak boot liu nia atan sira seluk. Iha loron ida, Abraão bolu nia i dehan, “Rona didiak! Hau husu o jura hodi NAI Maromak nia naran. Nai Maromak ida nebee halo lalehan ho rai. O jura dehan, o keta buka feto raan hosi ema Kanaán sira, foo mai hau nia oan hodi kaben.

⁴ Maibee o tenki baa iha hau nia rain, iha hau nia maluk sira. O buka iha nebaa, feto raan ida para kaben ho hau nia oan Isac.”

⁵ I katuas nee hataan, “Diak, amu! Maibee halo nusaa se feto raan nee lakohi mai iha nee? Hau tenki lori amu nia oan baa kaben iha nebaa ka, oinsaa?”

⁶ Abraão hataan, “Bele halo nusaa mos, o la bele lori hau nia oan ba iha nebaa.

⁷ Tan NAI Maromak nebee kaer ukun iha lalehan mak lori hau sai hosi hau nia aman sira nia uma iha hau nia rain, too hau mai iha nee. I Nia jura ona mai hau dehan, ‘Hau sei foo rai nee hotu ba o nia jerasaun.’ Nee duni o lalikan laran rurua! O baa deit. Tanba Maromak sei haruka Nia anju mai loke dalan ba o, atu o hetan feto raan ida, para sai hau nia oan nia kaben.

⁸ Maibee se feto raan nee lakohi tuir o mai iha nee, o livre hosi juramentu nee. Biar halo nusaa mos, o la bele lori hau nia oan ba iha nebaa.”

⁹ Entaun, katuas nee jura ba Abraão katak nia sei kumpri Abraão nia hakarak hotu.

¹⁰ Tuir mai, katuas nee hili kuda kamelu sanulu, i tula sasaan diak oi-oin ba kuda kamelu sira nee. Nunee nia baa ona Naor nia sidade iha rai Mezopotámia.

¹¹ Ikus mai, katuas nee too iha sidade nee. Nia paara besik bee posu ida iha sidade ninin hodi kuda kamelu sira deskansa. Momentu nee, lokraik ona, feto raan sira mai kuru bee iha posu nee.

¹² I katuas nee halo orasaun dehan, “NAI Maromak nebee hau nia patraun Abraão adora. Hatudu Ita nia laran diak mai hau nia patraun Abraão. Nunee tulun loke dalan, para hau nia viajen nee bele hetan rezultadu diak.

¹³ Maromak, hau hamriik besik posu nee. I feto raan sira mai hosi sidade atu kuru bee iha nee.

¹⁴ Nee duni hau husu nunee: Se hau koalia ho feto raan ida, dehan, ‘Anoi! Halo favor hatuun o nia sana rai ho bee, para hau hemu ituan lai.’ Se nia hataan, ‘Senhor hemu deit baa! I hau sei foo hemu mos senhor nia kuda kamelu sira.’ Nee sinal katak, feto raan nee mak Maromak hili ona sai Isac nia kaben. Ho sinal hanesan nee, hau hatene katak, Maromak hatudu ona Maromak nia laran diak ba hau nia patraun Abraão.”

Abraão nia atan hasoru Rebeca

^15-16 Katuas seidauk ramata halo orasaun, feto raan ida mai, naran Rebeca. Nia Abraão nia alin Naor ho nia kaben Milka sira nia bei oan. Nia aman naran Betuél. Nia oin kapaas teb-tebes i sei virjen hela. Nia tuun ba posu hodi kuru bee tau ba nia sana rai, depois sae fila fali.

¹⁷ Entaun, Abraão nia atan halai ba nia hodi husu, “Anoi, favor ida foo bee ituan hau hemu lai.”

¹⁸ I nia hataan, “Senhor, hemu deit baa!” Nia hatuun lalais nia sana hodi foo hemu katuas nee.

¹⁹ Hemu tiha hotu, feto raan nee dehan, “Husik hau kuru bee foo ba senhor nia kuda kamelu sira hemu too la hamrook ona.”

²⁰ Depois nia baa lalais fui bee restu iha animal sira nia hemu fatin. I nia halai baa-mai kuru bee iha posu nee, hodi foo hemu ba kuda kamelu sira hotu, too la hamrook ona.

²¹ Katuas nee hamriik nonook, hodi haree nia serbisu. Nia hanoin dehan, “Feto raan nee mak Maromak hili ka?”

²² Kuda kamelu sira hotu hemu too la hamrook ona. Depois katuas nee foti brinkus mean tau ba feto raan nia inus, ho kelu mean rua, tau ba nia liman rua.

²³ I katuas nee husu, “Anoi nia aman naran saa? Se bele karik, ami baa toba lai iha anoi nia aman nia uma.”

²⁴ Anoi hataan, “Hau nia aman naran Betuél, Naor ho Milka nia oan.

²⁵ Iha ami nia uma iha fatin ba senhor sira. Iha mos duut barak foo ba senhor nia animal sira.”

²⁶ I katuas nee hakruuk hodi adora NAI Maromak.

²⁷ Nia dehan, “Hahii ba Maromak! Maromak hatudu ona Ita Boot nia laran diak mai hau nia patraun Abraão, i hanoin ona Ita nia promesa ho nia. Nunee, Maromak loke ona dalan ba hau hetan kedas patraun Abraão nia maluk iha nee.”

²⁸ I feto raan nee halai fila lalais, hodi konta ba sira iha uma laran tomak, saida mak akontese.

^29-30 Rebeca nia maun naran Labão. Nia haree brinkus mean nee, ho kelu mean iha nia feton nia liman, i rona hosi nia buat nebee katuas nee hatete ba nia. Nunee nia sai kedas ba liur, hodi baa lalais hasoru katuas nebee sei hamriik hela ho nia kuda kamelu besik bee posu.

³¹ Labão dehan, “Senhor, NAI Maromak foo bensaun duni ba ita. Keta hamriik iha liur! Mai ita baa iha ami nia uma. Ami prepara tiha ona fatin. Hahaan ba senhor nia kuda kamelu sira mos iha.”

Abraão nia atan tama baa husu Rebeca

³² Nee liu tiha, Abraão nia atan tuir Labão baa tama iha Betuél nia uma. Depois Labão sira ajuda hatuun naha hosi kuda kamelu sira. I sira foo duut ba kuda kamelu sira haan. Sira mos lori bee ba katuas nee ho nia ema sira fasi ain.

³³ Bainhira sira tau hahaan iha meza, katuas nee hatete, “Molok ita atu haan, hau husu lisensa atu foo sai lai liafuan ruma.” Labão hataan, “Senhor, koalia deit baa.”

³⁴ Entaun katuas dehan, “Hau Abraão nia atan.

³⁵ NAI Maromak foo ona bensaun barak teb-tebes ba hau nia patraun, too nia sai ema riku boot. Maromak foo ona ba nia osan mean, osan mutin, atan mane, atan feto, ho animal barak, hanesan karau vaka, kuda kamelu, kuda buru, ho bibi.

³⁶ Bainhira hau nia patraun sira katuas ho ferik liu ona, senhora Sara tuur ahi oan mane ida. Nia mak sei hetan patraun Abraão nia rikusoin hotu.

³⁷ I patraun haruka hau jura dehan, ‘O la bele hili feto ida hosi rai Kanaán nee para kaben ho hau nia oan Isac.

³⁸ Maibee o tenki buka feto hosi hau nia maluk rasik, para sai nia kaben.’

³⁹ I hau husu ba patraun, ‘Oinsaa se feto nee lakohi tuir hau?’

⁴⁰ Nia hataan, ‘NAI Maromak nebee hau sempre tuir no serbii, sei haruka Nia anju mai loke dalan ba o, para o bele hetan feto ida hosi hau nia maluk rasik para kaben ho hau nia oan.

⁴¹ Maibee se hau nia maluk sira lakohi husik feto raan nee mai iha nee, foin o livre hosi juramentu nee.’

⁴² Nunee, ohin too iha bee posu, hau harohan nunee: ‘NAI Maromak nebee hau nia patraun Abraão adora. Tulun loke dalan atu hau nia viajen nee hetan rezultadu diak.

⁴³ Maromak, hau hamriik besik bee posu nee, i feto raan sira mai hosi sidade atu kuru bee iha nee. Hau husu nunee: se hau koalia ho feto raan ida, dehan, “Anoi! Favor ida foo bee ituan mai hau hemu lai.”

⁴⁴ Se nia hataan, “Senhor, hemu deit baa! I hau mos sei foo hemu ba senhor nia kuda kamelu sira.” Nee sinal katak, feto nee mak Maromak hili ona atu kaben ho hau nia patraun nia oan.’

⁴⁵ Hau halo orasaun seidauk hotu, Rebeca sai dadauk mai ho sana iha nia kabaas. Nia tuun ba posu hodi kuru bee. Bainhira nia sae fali mai leten, hau mos husu ‘Anoi, foo bee ituan mai hau hemu lai.’

⁴⁶ Nia hatuun lalais nia sana, hodi dehan, ‘Senhor, hemu baa! I hau sei foo hemu mos senhor nia kuda kamelu sira.’ Nunee hau hemu, ho mos hau nia kuda kamelu sira.

⁴⁷ Entaun hau husu, ‘Anoi nia aman naran saa?’ Nia hataan, ‘Hau nia aman naran Betuél. Hau nia avoo mane naran Naor, i hau nia avoo feto naran Milka.’ Nunee hau tau brinkus ba nia inus, i tau mos kelu rua ba nia liman.

⁴⁸ Depois hau hakruuk adora Maromak hodi dehan, ‘Obrigadu Nai Maromak! Ita Boot loke ona dalan mai hau, too hau hasoru rasik ho patraun Abraão nia maluk sira iha nee. I hau mos bele hasoru ho senhor Isac nia noiva.’

⁴⁹ Nunee agora, se senhor sira atu hatudu domin ba hau nia patraun Abraão, dehan momoos deit mai hau. I se lae, foo sai loloos deit, para hau bele hatene saida mak hau tenki halo.”

Rebeca nia familia simu prenda

⁵⁰ Bainhira katuas nee koalia hotu ona, Labão ho Betuél hataan, “NAI Maromak desidi ona nunee, ami atu dehan tan saida?

⁵¹ Rebeca mak nee. Bele lori nia baa ona, para nia sai ita nia patraun nia feto foun, tuir buat nebee mak NAI Maromak desidi ona.”

⁵² Rona nunee, katuas nee hakruuk too rai hodi agradese ba NAI Maromak.

⁵³ Tuir mai, nia hasai osan mean ho osan mutin, ho hena didiak foo ba Rebeca. Nia mos foo ba nia maun ho nia inan, prezenti mesak karu deit.

⁵⁴ Liu tiha nee, katuas nee ho nia ema sira tuur, hodi haan-hemu hamutuk. I sira mos toba iha nee. Aban dadeer-saan, sira hadeer ona, katuas nee foo hatene ba uma nain, dehan, “Hau husu lisensa, se bele, ami fila agora ba hau nia patraun.”

⁵⁵ Maibee Rebeca nia maun ho nia inan hataan, “Husik Rebeca hela lai ho ami loron sanulu hanesan nee. Depois foin lori nia baa.”

⁵⁶ Maibee katuas nee hataan, “Keta halo demora hau! NAI Maromak tulun ona hau, too hau hasoru ona ho hau nia patraun nia feto foun. Nee duni, senhora sira husik ona ami fila ba hau nia patraun.”

⁵⁷ Sira hataan nunee, “Mai ita husu rasik ba Rebeca deit. Nia hakarak halo oinsaa?”

⁵⁸ Entaun sira bolu nia, hodi husu dehan, “O hakarak baa ona ho senhor nee ka, oinsaa?” Rebeca hataan, “Hau hakarak baa ona.”

Isac ho Rebeca kaben

^59-60 Depois sira husik Rebeca ho nia atan feto nebee hein nia dezde kiik nee baa ho Abraão nia atan sira. Sira mos foo bensaun ba Rebeca dehan, “Alin! Ami hein katak Maromak sei foo ba o, oan barak teb-tebes, i o nia jerasaun sei sai tookon ba tookon. I ami mos hein katak o nia jerasaun sira sei manaan funu hasoru sira nia inimigu sira hotu.”

⁶¹ Liu tiha nee, Rebeca ho nia atan feto sira haloot sira nia sasaan, i sira sae kuda kamelu, hodi baa kedas ho Abraão nia atan.

⁶² Iha tempu nebaa, Isac foin fila hosi bee posu iha Beer-Laai-Roi ba nia hela fatin iha rai Negebe.

⁶³ Iha lokraik ida, nia sai hosi tenda hodi hola anin. Nia lao-lao, foti oin nia haree kuda kamelu sira mai.

⁶⁴ Bainhira Rebeca haree Isac, nia tuun hosi nia kuda kamelu.

⁶⁵ Nia husu ba Abraão nia atan, “Tiu! Senhor ida lao mai nebaa nee, see?” Katuas nee hataan, “Nee mak hau nia patraun kiik.” Rebeca foti nia veo hodi taka tiha nia oin.

⁶⁶ I katuas nee konta ba Isac buat hotu-hotu nebee akontese.

⁶⁷ Depois Isac lori Rebeca tama ba nia inan matebian Sara nia tenda, i sira nain rua kaben. Nia hadomi Rebeca teb-tebes, nee mak nia la tristi tan ho nia inan nia mate.