Jenesis 21 - Biblia Tetun Dili

Sara nia oan Isac moris

¹ NAI Maromak foo bensaun ba Sara, tuir Nia promesa uluk.

² Nunee Sara mos isin rua, i nia tuur ahi oan mane ida. Labarik nee moris duni iha tempu nebee Maromak promete ona.

³ I Abraão tau naran ba labarik nee, Isac. (Nee dehan katak ‘nia hamnasa’.)

⁴ Bainhira Isac halo loron walu, Abraão sunat nia, tuir Nai Maromak nia orden.

⁵ Abraão iha tinan atus ida ona bainhira nia oan Isac moris.

^6-7 Sara hatete, “Nai Maromak halo hau hamnasa, i kontenti loos. Ema hanoin, hau ferik ona nunee, la bele hetan ona oan. Maski hau nia laen katuas liu ona, maibee hau sei foo oan ba nia. Nunee, see deit mak rona buat ida nee, sira sei hamnasa hamutuk ho hau.”

Abraão duni sai Hagar ho Ismael

⁸ Isac boot baa bebeik. Too loron haketak nia hosi susu, Abraão halo festa boot.

^9-10 Iha loron ida, Sara haree Abraão nia kaben kiik Hagar nia oan Ismael halo trosa fali Isac. Haree nunee, Sara hatete ba nia laen, “Duni sai tiha atan Ejitu nee ho nia oan. Hau lakohi labarik atan nee hetan rikusoin ida. So hau nia oan Isac deit, mak tenki hetan hotu.”

¹¹ Rona Sara nia koalia nunee, Abraão laran susar teb-tebes, tanba Ismael mos nia oan hotu.

¹² Maibee Nai Maromak hatete, “Abraão! O lalika laran susar ba labarik nee ho o nia atan Hagar. Tuir deit Sara nia hakarak baa, tanba liu hosi Isac mak o sei hetan jerasaun nebee Hau promete ona.

¹³ Maibee Hau mos foo bensaun ba o nia kaben kiik nia oan, tanba nia mos o nia oan hotu. Nia jerasaun mos sei sai nasaun ida.”

¹⁴ Aban dadeer-saan, Abraão halo bukae foo ba Hagar, ho bee botir ida ba nia lori. I nia haruka feto nee ho nia oan Ismael baa ona. Sira lao baa-mai iha rai fuik maran besik Berseba.

¹⁵ Bainhira sira nia bee hotu ona, Hagar husik hela Ismael iha ai huun kiik-oan ida nia mahon.

¹⁶ Nia hanoin dehan, “Hau la aguenta tan haree hau nia oan mate.” Entaun nia baa tuur tiha mais-ou-menus hana rama oan ida nia dook hosi labarik nee, i komesa tanis.

¹⁷ Nai Maromak rona Ismael tanis, i Nia anju bolu Hagar hosi lalehan dehan, “Hagar, nusaa mak o nia laran susar nunee? Keta tauk, tanba Maromak rona ona labarik nee nia tanis.

¹⁸ Agora o hamriik baa hiit sae labarik nee. Hamaus nia, tanba Hau sei halo nia jerasaun sai nasaun boot ida.”

¹⁹ Depois Nai Maromak halo nia matan moos, too nia bele haree bee matan ida iha nebaa. I nia baa kuru bee iha botir, lori baa foo labarik nee hemu.

²⁰ Nee liu tiha, Ismael boot ba dadauk, i Nai Maromak hamutuk ho nia. Nia ho nia inan hela iha rai fuik maran Paran. Too nia klosan ona, nia sai hanador diak ida.

²¹ Depois nia inan foo kaben nia ho feto Ejitu ida.

Abraão ho Abimelek halo akordu

²² Iha tempu nee, liurai Abimelek, ho nia komandante funu, naran Fikól, mai hasoru Abraão. Liurai hatete, “Abraão! Ami hatene ona katak Nai Maromak hamutuk ho ita. Nee mak ita halo saida deit, sempre iha rezultadu.

²³ Nee duni agora, hau husu ita jura hodi Nai Maromak nia naran katak, ita sei la bosok hau, ho hau nia oan ho bei oan sira. Hanesan hau halo diak ba ita, ita mos tenki diak ba hau ho rai nee.”

²⁴ Abraão hataan, “Diak! Hau jura.”

²⁵ Depois Abraão kesar ba liurai dehan, “Amu liurai nia ema sira hadau tiha hau nia bee posu ida.”

²⁶ Liurai hataan, “Hau foin rona kona ba ida nee. Nusaa mak ita la foo hatene antes? Hau la hatene see mak halo.”

^27-28 Tuir mai, Abraão ho Abimelek halo akordu. Abraão lori karau ho bibi malae foo ba liurai. Depois nia tau ketak bibi malae inan hitu nebee sei kiik.

²⁹ Liurai husu ba Abraão, “Nusaa mak o haketak bibi oan hitu nee?”

³⁰ Depois Abraão foo hatene, “Amu liurai simu bibi oan hitu nee baa, hodi hatudu katak amu liurai rekonhese katak hau mak kee bee posu nee.”

³¹ Tanba sira nain rua halo ona juramentu iha nebaa, maka fatin nee ema tau naran, Berseba. Nee dehan katak, ‘bee posu juramentu’.

³² Sira halo tiha juramentu hotu, liurai Abimelek ho nia komandante Fikól fila ba sira nia rain Filistin.

³³ Liu tiha nee, Abraão kuda ai tamaresta huun ida iha Berseba. I nia adora NAI Maromak Moris Rohan Laek.

³⁴ Abraão hela kleur iha ema Filistin sira nia rain.