Jenesis 19 - Biblia Tetun Dili

Ema Sodoma sira hakarak hola malu ho bainaka mane nain rua

¹ Loro matan besik atu monu ona, Maromak nia anju nain rua nee too baa iha sidade Sodoma. Tempu nee, Lo sei tuur hela iha portaun sidade nian. Nia haree ema nain rua nee, nia baa kedas simu sira. I nia hakneak i hakruuk iha sira nain rua nia oin.

² I nia koalia dehan, “Senhor sira! Mai tuur lai iha hau ata nia uma, para senhor sira fasi ain, i toba iha nebaa. Aban dadeer-saan, mak senhor sira kontinua imi nia viajen.” Maibee sira hataan, “Obrigadu. Lalikan fadigadu! Ami baa toba iha kampu deit.”

³ Maibee Lo husu bebeik, too sira mos baa tama duni iha nia uma. Lo haruka ema prepara hahaan kalan no tunu paun nebee la tau fermentu, depois sira haan hamutuk.

⁴ Bainaka sira seidauk baa toba, mane Sodoma sira, kiik-boot hotu, mai haleu Lo nia uma.

⁵ Sira hakilar ba Lo, dehan, “Lo! Mane nain rua ohin nee iha nebee? Hasai sira mai, ami atu hola malu ho sira.”

⁶ Depois Lo sai baa hasoru sira, i taka tiha odamatan.

⁷ Nia dehan, “Maluk sira! Imi la bele halo aat ba hau nia bainaka sira.

⁸ Imi rona lai. Hau iha oan feto nain rua, sira sei feto raan. Hau bele foo sira nain rua ba imi. Imi atu halo saida deit ba sira, konformi imi. Maibee imi keta halo buat ida ba hau nia bainaka sira, tanba tuir ita nia lisan, hau tenki haree sira didiak.”

⁹ Maibee ema Sodoma sira hakilar dehan, “O keta tama iha klaran! O nee ema lao rai. O la iha direitu atu manda ami. Diak liu o sai hosi nee! Se lae, ami halo o aat liu fali ema nain rua nee.” Sira dudu sees tiha Lo i nadodon baa atu baku rahun tiha odamatan.

¹⁰ Maibee bainaka nain rua nee lolo liman hodi dada tama tiha Lo ba uma laran, i sira taka metin tiha odamatan.

¹¹ I sira nain rua halo ema Sodoma sira nee matan delek hotu, too sira lamas buka odamatan, la hetan.

Nai Maromak hasai Lo sira hosi Sodoma

^12-13 Entaun bainaka nain rua nee hatete, “Lo! NAI Maromak hatene ona sidade nee nia aat. Nee duni, Nia haruka ami mai harahun tiha hotu sidade nee. Nunee, o sei iha maluk ruma iha sidade nee ka lae? Se o iha oan mane ka oan feto, ka mane foun, ka see deit, baa bolu sira hodi sai ona hosi sidade nee.”

¹⁴ Entaun Lo baa foo hatene ba mane nain rua nebee atu kaben ho nia oan feto sira, dehan, “Rona didiak mai! Agora imi sai lalais hosi nee ona, tanba NAI Maromak atu harahun sidade nee.” Maibee sira hanoin nia koalia halimar ho sira.

¹⁵ Iha aban dadeer-saan, Maromak nia anju nain rua nee, obriga Lo sira sai lalais. Sira dehan, “Lo! Baa ona! Lori o nia kaben ho o nia oan sira, halai sai ona. Husik hela sidade nee. Keta halo be imi mate saugati.”

¹⁶ Maibee Lo sei demora. Nunee mak bainaka nain rua nee kaer sira nia liman hodi rasta Lo, nia kaben, ho nia oan feto rua nee, hodi lori sira sai hosi sidade. Tanba NAI Maromak hakarak duni atu salva sira.

¹⁷ Depois bainaka nee ida foo orden dehan, “Halai lalais hodi salva aan. La bele haree ba kotuk, i keta para iha rai tetuk. Halai nafatin ba iha foho nebaa, atu imi la mate.”

¹⁸ Maibee Lo hataan fali dehan, “Senhor, keta nunee!

¹⁹ Senhor hatudu ona ita nia laran diak mai hau ata hodi foo moris mai hau. Maibee foho nee sei dook. Keta halo be hau seidauk too iha nebaa, susar kona ona hau iha dalan klaran.

²⁰ Senhor haree lai. Iha aldeia kiik ida besik iha nee. Nunee se senhor hakarak, husik hau baa salva aan iha nebaa. Senhor rasik haree aldeia nee kiik-oan ida!”

²¹ Nia hataan, “Baa deit baa! Hau sei halo tuir o nia hakarak, i la halo rahun aldeia nee.

²² Halai lalais ona! Tanba imi too iha nebaa mak foin hau bele harahun sidade nee.” (Komesa iha tempu nee, aldeia nee ema tau naran Zoar, nee dehan katak ‘kiik’.)

Nai Maromak sunu motuk sidade Sodoma ho Gomora

²³ Oras loro matan komesa sae, Lo sira too iha Zoar.

²⁴ Derepenti deit NAI Maromak fakar ahi ho ahi klaak hosi lalehan tuun ba Sodoma ho Gomora.

²⁵ NAI Maromak sunu motuk hotu sidade ho aldeia iha area nee, ho buat hotu-hotu nebee moris, hanesan ema, animal, duut ho ai huun sira.

²⁶ Tempu sira halai nee, Lo nia kaben hateke fali ba kotuk, derepenti deit nia sai tiha masin riin ida.

²⁷ Aban dadeer-saan, Abraão baa fali iha fatin ida nebee horiseik nia hamriik hodi hamaus NAI Maromak.

²⁸ I nia hateke tuun ba Sodoma ho Gomora, ho rai tetuk nee hotu. Nia haree iha fatin-fatin deit, iha ahi suar sae.

²⁹ Hanesan nee, bainhira Nai Maromak halo rahun sidade sira nee, Nia hanoin fali Nia aliansa ho Abraão. Nunee mak Maromak hasai Lo hosi fatin nebee hetan kastigu nee.

Lo ho nia oan feto sira

³⁰ Lo tauk atu hela nafatin iha Zoar. Nee mak nia ho nia oan feto rua nee muda tiha ba foho. I sira hela iha fatuk kuak ida.

³¹ Iha loron ida, oan feto boot dehan ba nia alin, “Iha fatin nee, la iha mane ida atu hola ita. I apaa mos la kleur tan katuas ona, i la iha oan tan.

³² Nunee diak liu, ita foo tua ba apaa hemu lanu, depois ita toba hamutuk ho apaa hanesan feen ho laen, para ita bele foo jerasaun ba apaa.”

³³ Kalan nee duni, sira foo tua ba sira nia aman hemu too lanu. I nia oan feto boot baa toba hanesan feen ho laen halo sala ho nia aman. Tanba nia aman lanu todan, nia la hatene saida mak nia halo ho nia oan feto.

³⁴ Aban fali, biin foo hatene ba nia alin dehan, “Alin! Hori-kalan hau toba ona ho apaa, hanesan feen ho laen. Kalan nee, o fali. Orsida ita foo hemu apaa lanu tan, i alin tama ba toba ho nia apaa hanesan feen ho laen. Ho nunee, ita nain rua bele hetan oan, para hatutan apaa nia jerasaun.”

³⁵ Iha kalan nee duni, sira foo tan tua ba sira nia aman. I oan kiik tama baa toba ho nia aman. Tanba katuas lanu todan, nia la hatene saida mak nia halo ho nia oan feto.

³⁶ Nunee sira nain rua isin rua, hosi sira nia aman rasik.

³⁷ Depois oan feto boot tuur ahi, oan mane ida, naran Moab (nee rona atu hanesan ho liafuan ida nebee dehan katak ‘mai hosi aman’). Nia mak sai ema Moab sira agora nia bei-ala.

³⁸ I oan kiik mos tuur ahi oan mane ida, naran Ben-Ami (nee dehan katak ‘hosi hau nia ema’). Nia mak sai ema Amon sira agora nia bei-ala.