Jenesis 16 - Biblia Tetun Dili

Hagar ho nia oan Ismael

¹ Bainhira Abrão fila fali ona hosi Ejitu, i hela iha Kanaán tinan sanulu ona, nia kaben Sarai seidauk iha oan.

² Nunee, iha loron ida Sarai dehan ba Abrão, “NAI Maromak la foo oan mai hau. Diak liu ita hola hau nia atan Hagar, karik liu hosi nia hau bele iha oan.” Hagar nee ema Ejitu.

³ Entaun Abrão halo tuir nia kaben nia liafuan. I Sarai foo Hagar para sai Abrão nia kaben kiik.

⁴ Nunee Abrão baa toba hamutuk ho Hagar, depois feto nee isin rua. Maibee bainhira Hagar hatene ona nia isin rua, nia komesa foti aan, i la respeita ona Sarai.

⁵ Entaun Sarai dehan ba Abrão, “Hau mak foo atan nee ba o, para sai o nia kaben kiik. Maibee bainhira nia hatene nia isin rua ona, nia foti aan i la respeita fali hau. Nee hotu o nia sala! Husik NAI Maromak mak tesi ita nain rua nia lia!”

⁶ Abrão hataan, “O mak kaben boot. Nia o nia atan, o mak manda nia. O hakarak halo saida deit ba nia, konformi o.” Entaun Sarai komesa halo aat ona ba Hagar, too nia halai tiha.

⁷ Nia halai too iha rai fuik maran. I NAI Maromak nia anju ida hetan nia besik bee matan ida iha dalan ba Sur.

⁸ Anju nee hatete, “Hagar, Sarai nia atan. Nusaa mak o iha nee? O mai hosi nebee, i o atu baa nebee?” Hagar hataan, “Hau halai sai hosi hau nia senhora.”

⁹ Depois NAI Maromak nia anju hamaus nia hodi hatete, “Diak liu o fila fali ba o nia senhora. I saida mak nia halo ba o, o simu deit.

¹⁰ O lalika tauk. Hau sei halo o nia jerasaun sai barak teb-tebes, too ema sura la hatene.

¹¹ Agora o isin rua. La kleur tan o sei hetan oan mane ida. O tenki tau nia naran Ismael, tanba NAI Maromak rona ona o nia halerik.

¹² Maibee bainhira labarik nee boot ona, nia sei hela dook hosi nia maluk sira. Tanba nia hanesan kuda buru fuik, nebee lakohi rona ema nia orden. Nia sei kontra ema hotu-hotu, i ema hotu-hotu mos sei kontra nia.”

¹³ Rona tiha hotu nunee, Hagar dehan ba nia aan, “Hau haree ona NAI Maromak, ida nebee haree ho kuidadu hau.” Nunee nia komesa bolu NAI Maromak nia naran “Maromak nebee tau matan mai hau.”

¹⁴ Nee mak ema tau naran ba bee matan nee, Beer-Laai-Roi, nee dehan katak, ‘Bee matan hosi Maromak moris, nebee tau matan mai hau.’ Nia fatin iha aldeia Kades ho aldeia Berede nia klaran. Bee matan nee sei iha too agora.

¹⁵ Entaun Hagar fila. Nia tuur ahi, oan mane ida. Abrão tau nia naran Ismael.

¹⁶ Tempu Hagar hetan Ismael, Abrão iha ona tinan 86.