Jenesis 13 - Biblia Tetun Dili

Abrão ho Lo fahe malu

¹ Depois Abrão sai tiha hosi rai Ejitu, hodi fila fali ba iha rai Negebe. Nia baa ho nia feen ho nia rikusoin hotu. Nia alin nia oan Lo mos tuir sira.

² Abrão nee riku teb-tebes. Nia animal, ho osan mean ho osan mutin mos barak teb-tebes.

³ Hosi Negebe nia muda bebeik too fila fali ba nia hela fatin uluk, iha aldeia Betél ho aldeia Ai nia klaran.

⁴ Iha fatin nee, uluk nia halo ona altar ida. Agora nia adora fali NAI Maromak iha fatin nee.

⁵ Lo, nebee tuir Abrão nee mos iha animal barak ho ema mos barak.

⁶ Maibee rai nee laduun luan, i la too ba Abrão ho Lo sira nia animal hotu, atu moris hamutuk.

⁷ Nunee Abrão nia bibi atan ho Lo nia bibi atan sira komesa istori malu, tanba duut la too hodi foo haan sira nia animal barak nee. (Iha tempu nee, ema Kanaán ho ema Feris sei hela iha rai nee.)

⁸ Entaun Abrão hatete ba nia sobrinhu dehan, “Lo, ita nain rua mesak maluk deit. Keta halo be ita ho ita haree malu la diak, i halo ita nia ema sira istori malu bebeik.

⁹ Diak liu ita nain rua fahe malu deit. Rai nee luan. Nunee, se o hili fatin hosi parte liman karuk, hau baa iha parte liman kuana. Maibee se o hili fatin hosi parte liman kuana, hau baa iha parte liman karuk.”

¹⁰ Entaun Lo haree baa-mai, nia mos haree ba rai tetuk iha mota Jordaun nia sorin, too iha aldeia Zoar. Rai nee, bee barak. Rai nee mos bokur hanesan toos NAI Maromak nian, i diak hanesan rai Ejitu. (Iha tempu nee, NAI Maromak seidauk halo rahun sidade Sodoma ho Gomora.)

¹¹ Nee mak Lo hili hotu rai tetuk iha mota Jordaun. Depois sira nain rua fahe malu. Lo baa iha loro-sae.

¹² Nunee Abrão hela nafatin iha Kanaán. I Lo hela besik sidade Sodoma iha rai tetuk mota Jordaun nian.

¹³ Maibee ema Sodoma sira, hahalok aat teb-tebes. Sira lakohi rona ba NAI Maromak.

¹⁴ Bainhira Lo ho Abrão fahe malu tiha ona, NAI Maromak hatete ba Abrão, “Foti took o nia matan hodi haree didiak ba fatin hotu-hotu. Hateke ba oin, ba kotuk, ba liman karuk, ba liman kuana.

¹⁵ Rai hotu-hotu nebee o haree nee, Hau sei foo ba o, ho ba o nia oan no bei-oan sira, para sai imi nia rikusoin nafatin too tinan ba tinan.

¹⁶ Hau sei halo o nia jerasaun barak hanesan rai henek iha tasi ibun, too sura la bele.

¹⁷ Agora o lao haleu rai nee tuir nia naruk ho nia luan. Rai nee hotu, Hau sei foo ba o.”

¹⁸ Liu tiha nee, Abrão sira muda baa hela fali besik ai huun boot sira iha Manre, besik aldeia Hebron. I nia harii altar ida iha fatin nee, hodi adora NAI Maromak.