Jenesis 12 - Biblia Tetun Dili

Nai Maromak haruka Abrão sai hosi nia rain

¹ Depois NAI Maromak dehan ba Abrão, “O sai tiha hosi o nia familia, hosi o nia aman nia uma, no hosi o nia aldeia. Baa iha fatin ida nebee Hau sei hatudu ba o.

² Hau sei foo bensaun ba o, i halo o nia naran sai boot. O nia jerasaun sei amenta barak, i sai nasaun boot no konhesidu. Liu hosi o, ema seluk sei hetan bensaun.

³ Hau sei foo bensaun ba ema nebee foo bensaun ba o. Maibee Hau sei foo malisan ba ema nebee foo malisan ba o. Rona didiak mai! Nasaun hotu-hotu iha mundu sei hetan bensaun liu hosi o.”

^4-5 Iha tempu nee, Abrão tinan 75. Nia lori nia feen Sarai, ho nia alin nia oan Lo, ho nia rikusoin hotu, ho nia atan sira nebee nia hetan iha sidade Aran. Depois sira husik tiha Aran, tuir NAI Maromak nia orden. Nunee sira lao nafatin, too iha fatin ida naran Kanaán.

⁶ Too iha nebaa, Abrão lao haleu tiha rai nee, too besik fatin ida naran Sikem. I sira hela la kleur besik ai huun boot ida iha Moré. Iha tempu nee, ema Kanaán sira sei hela iha rai nee.

⁷ Iha fatin nee, NAI Maromak hatudu Aan ba Abrão. Nia dehan, “Hau sei foo rai nee ba o nia jerasaun sira.” Tuir mai, Abrão hada fatuk hanesan altar ida, hodi halo sakrifisiu ba NAI Maromak, ida nebee hatudu ona Aan ba nia.

⁸ Liu tiha nee, Abrão sira muda ba foho iha parte sul, i sira hela la kleur iha aldeia Betél ho aldeia Ai nia klaran. Iha fatin nee nia halo altar ida hodi adora NAI Maromak.

⁹ Nee liu tiha, nia muda hosi fatin ida ba fatin seluk, too iha rai Negebe iha Kanaán parte sul.

Abrão baa iha rai Ejitu

¹⁰ Iha tempu ida, rai Kanaán hamlaha boot. Nee mak Abrão sira lao dook tiha ba iha parte sul, too iha rai Ejitu, i sira hela provizoriu iha nebaa.

¹¹ Bainhira sira atu tama ba rai Ejitu, nia foo hatene ba nia feen Sarai, dehan, “O nee feto bonita teb-tebes.

¹² Se ema Ejitu haree o bonita nunee, sira sei oho tiha hau, tanba hau o nia laen. Nunee sira bele hadau tiha o.

¹³ Entaun, diak liu o foo hatene ba sira dehan, hau o nia maun. Nunee sira la oho hau, maibee sira sei haree hau diak, tanba o.”

¹⁴ Bainhira Abrão sira too ona iha rai Ejitu, ema sira haree feto nee bonita la-halimar.

¹⁵ Bainhira liurai nia funsionariu sira haree nia, sira baa gaba feto nee iha liurai nia oin. I sira lori feto nee ba iha liurai nia uma.

¹⁶ Nunee liurai haree Abrão diak, tanba Sarai. Nia foo ba Abrão bibi, bibi malae, karau vaka, kuda buru ho kuda kamelu. I foo mos atan mane ho atan feto.

¹⁷ Maibee tanba liurai hola fali ema nia kaben hodi baa iha nia uma, nee mak NAI Maromak kastigu nia ho nia uma kain hotu ho moras aat oi-oin.

¹⁸ Entaun liurai bolu Abrão hodi husu ba nia, “Nusaa mak o halo hanesan nee mai hau? Nusaa mak o la foo hatene mai hau katak feto nee o nia feen?!

¹⁹ Tan saida mak o dehan, nia o nia feton? Hela ituan deit hau hola nia sai hau nia kaben. O nia feen mak nee. Lori nia baa ona!”

²⁰ Tuir mai, liurai foo orden ba nia ema sira, para lori Abrão ho nia kaben, ho sira nia sasaan hotu, sai hosi rai nee.