Jenesis 11 - Biblia Tetun Dili

Uma ain aas Babél

¹ Hori uluk, ema hotu iha mundu nee koalia lian ida deit.

² Sira balu muda fatin ba iha loro-sae. Too iha rai tetuk ida iha Sinear, sira hela iha nebaa.

^3-4 Sira hotu koalia ba malu dehan, “Maun-alin sira! Mai ita harii sidade boot ida. Ita tenki halo tijolu, i sunu halo forti. Ita hada tijolu sira nee, halo metin ho alkatraun. Depois ita harii uma ain aas ida too iha loro-leten, para ita bele hetan naran boot. Nunee ita sei sai nasaun boot ida, para ita la bele namkari ba rai bara-barak.”

⁵ Tanba nee, NAI Maromak tuun mai haree sidade ho uma aas nebee sira halo nee.

⁶ I Nia hatete, “Ema sira nee hotu rai ida, i uza lian ida. Saida mak sira halo dadauk nee, foin komesa hakat ida. Aban-bainrua, se sira hotu hamutuk hanesan agora nee, sira hakarak halo saida deit, bele.

⁷ Diak liu Ita tuun baa halo sira nia lian sai keta-ketak tiha, para sira la bele komprende malu tan.”

⁸ Entaun Nai Maromak tuun para halo sira nia lian rungu-ranga tiha. Ho nunee, Nia halo ema sira nee namkari ba iha fatin hotu-hotu iha mundu nee. I sira la halo tan sidade nee ona.

⁹ Nee mak sira tau naran ba sidade nee, Babél. (Iha lian Ebreu, nee rona atu hanesan liafuan ida nebee dehan ‘rungu-ranga’). Tanba NAI Maromak halo rungu-ranga tiha sira nia lian, i halo sira namkari ba iha fatin-fatin iha mundu nee.

Husi Sem too Abrão

¹⁰ Nee Sem nia jerasaun. Bainhira rai nabeen liu tiha ona tinan rua, natoon Sem tinan 100, nia hetan oan mane ida, naran Arpaxad.

¹¹ Depois nia sei moris tan tinan 500, i nia hetan tan oan mane ho oan feto.

¹² Bainhira Arpaxad tinan 35, nia hetan oan mane ida, naran Xela.

¹³ Tuir mai, Arpaxad sei moris tan tinan 403, i nia hetan tan oan mane ho oan feto.

¹⁴ Bainhira Xela tinan 30, nia hetan oan mane ida naran Eber.

¹⁵ Tuir mai, Xela sei moris tan tinan 403, i nia hetan tan oan mane ho oan feto.

¹⁶ Bainhira Eber tinan 34, nia hetan oan mane ida, naran Peleg.

¹⁷ Tuir mai, Eber sei moris tan tinan 430, i nia hetan tan oan mane ho oan feto.

¹⁸ Bainhira Peleg tinan 30, nia hetan oan mane ida, naran Reú.

¹⁹ Tuir mai, Peleg sei moris tan tinan 209, i nia hetan tan oan mane ho oan feto.

²⁰ Bainhira Reú tinan 32, nia hetan oan mane ida, naran Seruge.

²¹ Tuir mai, Reú sei moris tan tinan 207, i nia hetan tan oan mane ho oan feto.

²² Bainhira Seruge tinan 30, nia hetan oan mane ida, naran Naor.

²³ Tuir mai, Seruge sei moris tan tinan 200, i nia hetan tan oan mane ho oan feto.

²⁴ Bainhira Naor tinan 29, nia hetan oan mane ida, naran Tera.

²⁵ Tuir mai, Naor sei moris tan tinan 119, i nia hetan tan oan mane ho oan feto.

²⁶ Komesa Tera tinan 70, nia hetan oan mane nain tolu mak, Abrão, Naor ho Aran.

Tera nia jerasaun

²⁷ Nee mak Tera nia jerasaun sira. Tera nia oan mak Abrão, Naor ho Aran. Aran hetan oan mane ida, naran Lo.

²⁸ Aran mate iha nia moris fatin, naran Ur, iha ema Kasdim sira nia rain. Bainhira nia mate, nia aman Tera sei moris.

²⁹ Abrão kaben ho Sarai. Naor kaben ho Aran nia oan feto, naran Milka. Aran mos hetan oan mane ida, naran Iská.

³⁰ Maibee Sarai la iha oan.

³¹ Iha loron ida, Tera lori nia oan Abrão, nia feto foun Sarai, ho nia bei-oan Lo, sira sai husik hela rai Ur, atu baa rai Kanaán. Maibee too iha rai Haran sira hela deit iha nebaa.

³² Iha fatin nee, Tera mate, ho tinan 205.