Jenesis 10 - Biblia Tetun Dili

Noé ho Jafé nia jerasaun

¹ Rai nabeen hotu tiha, Noé nia oan sira mos hetan oan. Nee mak jerasaun hosi Sem, Jafé ho Kam.

^2-5 Jafé nia oan mak nee: Gomer, Magoge, Madai, Javán, Tubal, Mezeke ho Tiras. Sira ida-idak nia jerasaun ho sira nia lian, sira nia suku, ho sira nia rain rasik. Gomer nia jerasaun mak nee: Askenás, Rifate ho Togarma. Javán nia jerasaun mak Elisá, Tarsis, ema Kitim sira, ho Dodanim nebee hela iha tasi ibun.

Kam nia jerasaun

⁶ Kam nia oan mak nee: Kuse, Misraim, Pute ho Kanaán.

⁷ Kuse nia oan mak nee: Sebá, Havila, Sabtá, Raamá, ho Sabteká. Raamá nia oan mak nee: Sabá ho Dedán.

⁸ Kuse nia oan mane ida naran Nimrode. Nia funu nain primeiru iha mundu.

⁹ Ho NAI Maromak nia tulun, nia sai kasador diak ida. Tanba nee ema baibain dehan, “O nee kasador diak ida hanesan Nimrode.”

¹⁰ Fofoun nia rain komesa hosi Babel, Ereke, Akade, ho Kalné, sidade sira hotu iha Sinear.

¹¹ Depois nia ukun tan too Asíria. Iha nebaa nia harii sidade Ninive, Reobote-Ir, Kalá,

¹² ho Resén, iha Ninive ho Kalá nia klaran. Nee hotu mesak sidade boot.

¹³ Misraim nia jerasaun mak nee: ema Ludim, Anamim, Leabim, Naftuim,

¹⁴ Patrusim, Kasluim, i Kaftorim. Ema Kasluim nee mak ema Filistin sira nia bei-ala.

¹⁵ Kanaán nia oan boot mak Sidon. Kanaán mos bei-ala hosi ema Ete,

¹⁶ Jebusi, Amori, Girgasi,

¹⁷ Evi, Arki, Sini,

¹⁸ Arvadi, Zemari, ho Amati. Kanaán nia jerasaun sira namkari baa dook,

¹⁹ too sira nia rai baliza komesa hosi Sidon ba iha Gerar, too iha Gaza. Hosi nee, ba iha Sodoma, Gomora, Admá, ho Zeboím, too iha Lasa.

²⁰ Sira hotu nee Kam nia jerasaun. Ida-idak ho nia lian, nia suku, ho nia rain rasik.

Sem nia jerasaun

²¹ Jafé nia maun Sem, ema Eber sira nia bei-ala.

²² Sem nia oan, mak Elam, Asúr, Arpaxad, Lude ho Aram.

²³ Aram nia jerasaun mak ema Us, Hul, Geter ho Mas.

²⁴ Arpaxad nia oan, Xela. Xela nia oan Eber.

²⁵ Eber iha oan mane nain rua. Ida boot naran Peleg (nee dehan katak ‘fahe’), tanba iha tempu nee, ema sira fahe malu iha mundu. Nia alin naran Joktan.

²⁶ Joktan nia jerasaun mak Almodá, Selefe, Azár-Mavé, Jerá,

²⁷ Adoraun, Uzál, Dikla,

²⁸ Obal, Abimael, Sabá,

²⁹ Ofir, Havila, ho Jobabe. Sira hotu nee Joktan nia jerasaun.

³⁰ Sira nia hela fatin nee, komesa hosi Mesá, too iha Sefar, nee mak iha foho sira iha loro-sae.

³¹ Sira nee hotu, Sem nia jerasaun. Ida-idak ho nia lian, nia suku, ho nia rain rasik.

³² Sira nee hotu, Noé nia jerasaun, ida-idak ho nia suku rasik. Tempu rai nabeen hotu ona, sira nee mak fahe namkari halo nakonu mundu.