Jenesis 1 - Biblia Tetun Dili

Nai Maromak halo lalehan, rai ho buat hotu-hotu iha nia laran

¹ Hahuu fofoun, Nai Maromak halo lalehan ho rai.

² Iha tempu nebaa, mundu seidauk iha forma i buat ida seidauk iha. Bee deit mak iha. I nakukun taka metin bee nee. Maromak nia Espiritu book-aan baa-mai iha bee nia leten.

³ Nai Maromak hatete, “Iha naroman baa.” Koalia tiha nunee, naroman iha kedas.

⁴ Maromak nia laran haksolok, tanba Nia haree naroman nee diak duni. I Nia haketak naroman nee hosi nakukun, para ida-idak ho nia oras rasik.

⁵ Nia foo naran ba naroman nee ‘loron’, i nakukun nee ‘kalan’. Nee mak loron ida.

⁶ Nai Maromak hatete, “Iha fatin mamuk baa hodi haketak bee.

⁷ Nee para iha bee iha parte leten, ho bee iha parte kraik.” Koalia tiha nunee, bee nee fahe ba rua.

⁸ I Nia foo naran ba fatin mamuk nee ‘loro leten’. Nee mak loron rua.

⁹ Nai Maromak hatete, “Bee iha parte okos nee baa hamutuk iha fatin ida, para bele iha rai maran.” Koalia tiha nunee, rai maran iha ona.

¹⁰ Parte maran nee, Nia tau naran ‘rai’, i bee nebee halibur hamutuk nee, Nia tau naran ‘tasi’. Nai Maromak nia laran haksolok, tanba haree buat sira nee hotu diak duni.

¹¹ Nai Maromak hatete, “Rai sei foo moris duut ho ai. Ai sei foo fuan, duut sei foo musan, tuir ida-idak nia modelu.” Koalia tiha nunee, duut oi-oin ho ai oi-oin iha kedas.

¹² Iha rai maran, duut ho ai sira foo musan ho fuan tuir ida-idak nia modelu. Nai Maromak nia laran haksolok, tanba Nia haree buat sira nee hotu diak duni.

¹³ Nee mak loron tolu.

¹⁴ Nai Maromak hatete, “Iha parte leten, tenki iha buat oi-oin para foo naroman ba rai. Tenki iha buat nebee foo naroman ba loron, ho buat nebee foo naroman ba kalan. Nee hanesan sinal hodi sura tempu, loron, ho tinan.”

¹⁵ Koalia tiha nunee, buat naroman sira nee hotu iha kedas.

¹⁶ Nunee Nai Maromak halo buat naroman boot tipu rua. Ida boot liu foo naroman ba loron; ida kiik liu foo naroman ba kalan. I Nia mos halo fitun sira hotu.

¹⁷ Nia tau buat sira nee iha loro leten, hodi foo naroman mai rai,

¹⁸ iha tempu loron, no iha tempu kalan. Nunee, buat sira nee haketak naroman hosi nakukun. Nai Maromak nia laran haksolok, tanba Nia haree buat sira nee hotu diak duni.

¹⁹ Nee mak loron haat.

²⁰ Nai Maromak hatete, “Iha ikan bara-barak baa ho buat oi-oin tan nebee moris iha bee laran. Iha manu fuik bara-barak baa hodi semo iha loro leten.”

²¹ Nai Maromak halo ikan oi-oin, animal boboot nebee moris iha tasi laran, ho buat oi-oin tan nebee moris iha bee laran. Nia mos halo manu fuik oi-oin. Nai Maromak nia laran haksolok, tanba haree buat sira nee hotu diak duni.

²² I Nai Maromak foo bensaun ba animal sira nee hotu dehan, “Ikan sira amenta barak baa para halo nakonu iha nebee-nebee. I manu fuik sira mos amenta barak baa.”

²³ Nee mak loron lima.

²⁴ I Nai Maromak hatete, “Iha animal oi-oin baa hodi moris iha rai maran. Hanesan animal hakiak, animal fuik, i animal nebee dolar iha rai, ida-idak hahoris tuir nia modelu.”

²⁵ Koalia tiha nunee, animal sira nee iha. Nai Maromak nia laran haksolok, tanba Nia haree buat sira nee hotu, diak duni.

²⁶ Nai Maromak hatete, “Mai Ita halo ema hanesan Ita nia Aan. Para sira domina ikan hotu-hotu iha tasi, manu fuik hotu-hotu iha loro leten, animal hakiak hotu, ho animal sira seluk nebee moris iha rai.”

²⁷ Nunee Nai Maromak halo ema hanesan Nia Aan. Nia halo sira mane ho feto.

²⁸ I Nia foo bensaun ba sira dehan, “Imi iha oan bara-barak baa, hodi halo mundu nakonu, i tau matan baa. Imi mos tenki domina ikan, manu fuik, ho animal hotu nebee moris iha rai.

²⁹ Rona didiak mai! Hau foo ba imi ai haan oi-oin iha rai nee, hanesan ai nebee foo fuan ho ai nebee foo musan.

³⁰ Hau mos foo ai tahan ho duut oi-oin, ba animal sira nia hahaan. Hahaan ba animal fuik sira, animal sira dolar iha rai, ho manu fuik sira.” Koalia tiha nunee, hahaan oi-oin mos iha.

³¹ Nai Maromak haree buat sira hotu nebee nia halo ona nee, i Nia laran haksolok, tanba buat sira nee diak teb-tebes. Nee mak loron neen.