Galasia 6 - Biblia Tetun Dili

Tulun malu

¹ Maun-alin sira, se ema sarani ida monu ona ba sala, entaun imi nebee moris tuir Espiritu Santu nia hakarak, tenki baa koalia didiak ho nia ho laran maus no haraik aan hodi lori nia fila fali ba dalan loos. Maibee kuidadu imi nia aan, para la bele monu ba sala.

² Se imi ruma hetan susar, imi tenki ajuda malu, i nunee imi halo tuir Kristu nia lei.

³ Se ema ruma foti aan dehan, nia diak liu ema seluk, afinal lae, nia bosok nia aan.

⁴ Diak liu ema ida-idak haree ba nia hahalok rasik. Se nia halo diak, haksolok baa. Maibee la bele haree ema seluk nia atitude.

⁵ Tanba ema ida-idak tenki responsabiliza ba nia aan rasik.

⁶ See mak hanorin Maromak nia Liafuan ba imi, imi tenki foo ba nia saida mak imi iha.

⁷ Keta lao sala dalan dehan Maromak la hatene buat nebee mak imi halo. Keta halimar ho Maromak. Tanba buat nebee ema kuda agora, ida nee mak aban-bainrua nia sei kuu.

⁸ Nunee mos, saida mak nia halo agora, aban-bainrua nia sei simu nia rezultadu. See mak halo tuir isin hakarak, nia sei rahun. Maibee see mak moris tuir Maromak nia Espiritu nia hakarak, nia sei simu moris rohan laek.

⁹ Nee duni la bele baruk halo buat nebee diak. Tanba too iha nia loron, ita sei simu rezultadu diak, naran katak ita halo diak nafatin.

¹⁰ Tanba nee, bainhira ita hetan oportunidade hodi ajuda ema seluk, ajuda deit baa. Liu-liu sarani sira nebee fiar ba Kristu.

Paulo taka nia surat

¹¹ Haree baa! Liafuan sira nee, hau rasik mak hakerek, ho letra boboot.

¹² Ema sira nebee hakarak obriga imi tuir sunat, sira mos fiar ba Jesus Kristu. Maibee sira buka oin para ema Judeu sira seluk bele simu sira. Sira tauk, se sira hanorin dehan, Nai Maromak mos simu ema nebee la tuir lei sunat, entaun ema Judeu bele halo terus sira.

¹³ Maski sira sunat ona mos, sira rasik la tuir lei relijiaun hotu. Maibee sira hakarak atu imi sunat, para sira bele gaba aan dehan, imi halo tuir ona lei nee.

¹⁴ Maibee ba hau, hau lakohi gaba buat ida, hau so gaba deit kona ba Nai Jesus Kristu nia mate iha krus. Tanba Nia mate ona iha krus, maka buat mundu nian la iha tan folin mai hau. I tuir ema mundu nia hanoin, hau mos hanesan mate tiha ona.

¹⁵ Sunat ka la sunat, nee la importante. Maibee importante mak Maromak halo foun ona ita nia moris.

¹⁶ Ema hotu-hotu nebee tuir hau nia hanorin nee, sira sai ona Nai Maromak nia povu loloos. Maromak mos sei hatudu Nia grasa ba sira i foo paz ho hakmatek ba sira.

¹⁷ Hau lakohi para ema halo tan problema ho hau. Tanba fitar sira iha hau nia isin nee hatudu katak hau Jesus nia ema.

¹⁸ Maun-alin sira, Nai Jesus Kristu nia grasa hamutuk ho imi hotu. Amen.