Galasia 4 - Biblia Tetun Dili

¹ Hau foo ezemplu ida tan. Bainhira aman ida mate, nia oan iha direitu atu simu nia rikusoin. Maibee se nia oan nee tinan seidauk too, nia seidauk bele simu, maski rikusoin hotu-hotu aban-bainrua sai ninian. Nia sei hanesan atan,

² i ema seluk mak tau matan ba nia ho nia rikusoin sira nee too tempu nebee mak nia aman desidi tiha ona.

³ Nunee mos ho ita. Bainhira Jesus seidauk mai, ita mos hanesan labarik nee. Ita sei hakruuk ba mundu nia hakarak, hanesan atan.

⁴ Maibee too nia tempu, Nai Maromak haruka Nia Oan mai. Iha feto ida mak tuur ahi Maromak nia Oan nee, i nia Oan moris tuir lei relijiaun Judeu nian.

⁵ Nia mai atu foo liberdade ba ema hotu-hotu nebee moris iha lei relijiaun nia okos, para ita mos bele sai Maromak nia oan.

⁶ Imi sai ona Nai Maromak nia oan, tanba nee mak Maromak mos haruka Nia Oan nia Espiritu mai tama iha imi nia laran. I Espiritu nee halo imi bolu Nai Maromak, "Abba", nee dehan “Apaa doben”.

⁷ Entaun agora imi laos atan ona, maibee imi sai ona Nai Maromak nia oan. Nunee imi iha direitu simu rikusoin hotu-hotu nebee Nia promete ona ba Nia oan sira.

Paulo preokupa ho sarani sira iha Galasia

⁸ Uluk imi seidauk konhese Nai Maromak, imi sai atan hodi adora maromak sira nebee laos Maromak.

⁹ Maibee agora, imi konhese ona Nai Maromak. (Tuir loloos hau dehan, Nai Maromak mak konhese uluk imi.) Entaun nusaa mak imi hakarak fila fali baa tuir espiritu mundu nian, maski espiritu nee fraku, i la bele salva ita. Imi hakarak hakruuk fali ba buat sira nee hodi sai fali atan ka?

¹⁰ Imi halao serimonia tuir loron, fulan, loron boot, no tinan, ho objetivu atu Nai Maromak simu imi.

¹¹ Nee halo hau hanoin barak! Keta halo be hau hanorin imi durante nee, saugati deit.

¹² Maun-alin sira, hau husu boot atu imi livre hosi buat sira nee, hanesan mos hau. Tanba hau moris livre ona hosi lei relijiaun Judeu, hanesan mos imi nebee laos ema Judeu. Uluk, bainhira ita sei hamutuk, imi la halo buat aat ida mai hau.

¹³ Imi hotu hatene, fofoun hau baa foo sai Nai Jesus nia Novidade Diak ba imi, hau hamutuk ho imi tanba hau moras.

¹⁴ Maski hau nia kondisaun nee foo todan ba imi, maibee imi la hakribit hau. Imi simu hau hanesan imi simu fali Nai Maromak nia anju ida. I liu tan, imi simu hau hanesan imi simu Kristu Jesus rasik.

¹⁵ Iha tempu nebaa imi hotu haksolok teb-tebes. Nusaa mak agora imi la haksolok tan? Hau hatene, iha momentu nebaa imi hadomi teb-tebes hau, too imi prontu hasai imi nia matan musan atu foo mai hau.

¹⁶ Maibee agora imi konsidera hau hanesan fali imi nia inimigu tanba hau koalia lia loos ba imi ka?

¹⁷ Ema lohi-door sira nee hakaas aan dada imi para tuir sira, laos atu halo diak ba imi. Sira hakarak halo imi dook tiha hosi ami, hodi tuir fali sira nia hakarak.

¹⁸ Imi halo buat ruma ho laran tomak, nee diak, maibee imi tenki iha objetivu nebee diak. Entaun, atu hau hamutuk ho imi ka dook hosi imi, hakaas aan hodi halo nafatin buat nebee diak.

¹⁹ Hau nia oan doben sira, agora hau hakaas aan ho terus dala ida tan ba imi, hanesan feto nebee kanotak moras atu tuur ahi. I hau sei hakaas aan nafatin, too imi nia laran sai hanesan Kristu.

²⁰ Maibee agora, hau la hatene atu halo saida tan. Tuir loloos hau hakarak atu baa koalia rasik ho imi, para hau la bele koalia makaas hanesan nee.

Komparasaun kona ba Hagar no Sara

²¹ Se imi hakarak hakruuk ba ema Judeu sira nia lei relijiaun duni, diak liu imi komprende lai, lei nee dehan saida loos.

²² Iha Livru Sagradu hakerek dehan, Abraão iha oan mane nain rua, ida hosi nia atan feto Hagar, ida hosi nia kaben Sara nebee ema livre.

²³ Atan nee hetan oan tanba ema kriatura nia hakarak. Maibee nia kaben nebee ema livre nee hetan oan tanba Nai Maromak promete ona nunee ba Abraão.

²⁴ Feto nain rua nee, ita bele kompara ho promesa rua nebee Nai Maromak halo ho ema. Promesa ida, Nia halo ho Moisés iha foho Sinai, bainhira Nia hatuun lei relijiaun ba ema Judeu sira. Ema sira nebee moris iha lei nia okos, sira mos sai atan hanesan Hagar.

²⁵ Nunee Hagar kompara ho foho Sinai iha rai Arabi. I nia mos bele kompara ho ema Jerusalém nebee agora dadauk moris hanesan atan iha lei nee nia okos.

²⁶ Maibee ita nebee fiar ba Kristu, sai hanesan ita nia inan Sara. Ita sai ema livre hanesan nia tanba ita la moris ona iha lei relijiaun nia okos. Nunee ita pertense ona ba Jerusalém foun iha lalehan.

²⁷ Kona ba Sara ho Jerusalém foun, iha Livru Sagradu hakerek dehan: “Feto sira nebee la iha oan, haksolok ona baa! Feto sira nebee la senti kanotak moras tuur ahi, haklalak ona baa! Feto nebee nia lain husik hela, sei hetan oan barak liu fali feto nebee iha lain.”

²⁸ Maun-alin sira, imi sai ona Nai Maromak nia oan, tanba Maromak mak promete nunee. Entaun imi hanesan Sara nia oan Isac, tanba nia mos moris mai tuir Maromak nia promesa.

²⁹ Iha tempu nebaa, Abraão nia oan nebee moris mai tanba ema nia hakarak, bainhira boot ona, nia halo terus fali Isac, maski Isac nee moris mai tanba Maromak nia Espiritu nia hakarak. Agora nee mos ema nebee moris iha lei nia okos halo terus ema nebee moris livre.

³⁰ Maibee iha Livru Sagradu hakerek dehan, “Duni sai tiha atan feto nee ho nia oan. Tanba atan nia oan la iha direitu simu nia aman nia rikusoin. So oan hosi nia kaben nebee livre mak iha direitu.”

³¹ Entaun, maun-alin sira, ita laos atan nee nia oan, maibee ita oan hosi Abraão nia kaben nebee livre.