Galasia 3 - Biblia Tetun Dili

Nai Maromak deklara ita moris loos ona tanba ita fiar ba Jesus Kristu

¹ Imi ema Galasia, imi beik-teen liu! See mak bosok imi sai tiha nunee? Uluk hau foo hatene momoos tiha ona ba imi kona ba Jesus Kristu nia mate iha krus.

² Agora hatete ba imi: Nai Maromak foo Nia Espiritu Santu ba imi laos tanba imi tuir lei relijiaun. Nia foo Espiritu Santu ba imi tanba imi fiar ba Novidade Diak nebee imi rona ona.

³ Entaun nusaa mak imi beik demais nunee?! Fofoun imi moris tuir Espiritu Santu. Maibee agora imi hakarak lao ho imi nia kbiit rasik.

⁴ Imi hetan terus barak ona tanba imi fiar ba Kristu. Keta halo be imi nia terus sira nee sai saugati deit.

⁵ Nai Maromak foo Nia Espiritu Santu ba imi, i halo milagre iha imi nia leet. Imi hanoin Nia halo nunee tanba imi halo tuir lei relijiaun ka? Lae! Nia halo nunee, tanba imi fiar ba Novidade Diak nebee imi rona tiha ona.

⁶ Hanoin took ema Judeu sira nia beiala Abraão. Iha Livru Sagradu hakerek dehan, “Nia fiar ba Maromak, nee mak Maromak deklara katak nia ema moris loos ona.”

⁷ Imi tenki komprende didiak buat nee: ema nebee fiar ba Maromak, nia sai hanesan Abraão nia oan.

⁸ Livru Sagradu foo hatene nanis ona dehan, Maromak sei simu mos ema nebee laos Judeu, naran katak sira fiar ba Nia. Tanba hori uluk kedas Nia hatete ona Novidade Diak ba Abraão dehan, “Ema iha nasaun hotu-hotu iha mundu sei hetan bensaun tanba o.”

⁹ Nee duni Maromak foo bensaun ba ema hotu nebee fiar ba Nia, hanesan mos Nia foo ba Abraão tanba nia fiar.

¹⁰ Ema nebee fiar aan katak Maromak sei simu nia tanba deit nia moris tuir lei relijiaun, ema nee hetan malisan. Tanba iha Livru Sagradu hakerek dehan, “Ema nebee la kumpri hotu lei relijiaun, nia hetan malisan.”

¹¹ La iha ema ida mak bele kumpri lei nee tomak. Nunee la iha ema ida mak Nai Maromak deklara nia moris loos tanba nia moris tuir lei relijiaun. Nee klaru! Tanba hakerek ona dehan, “Ema nebee fiar ba Jesus foin mak Nai Maromak deklara nia moris loos i foo moris rohan-laek ba nia.”

¹² Se ema depende ba lei relijiaun, nia la laran metin ba Maromak. Tanba iha Livru Sagradu hakerek dehan, “Ema nebee kaer metin lei relijiaun, nia moris preokupa deit ho lei nee.”

¹³ Maibee Jesus Kristu foo nia Aan hodi hasai ita hosi malisan lei relijiaun nian. Hanesan nee Nia rasik simu fali ita nia malisan. Tanba iha Livru Sagradu hakerek dehan, “Ema nebee redi iha ai riin, nia hetan malisan.”

¹⁴ Bainhira Jesus Kristu foo liberdade mai ita, bensaun nebee Nai Maromak uluk foo ba Abraão, tuun mos ba ema nebee laos Judeu. Nunee se ita fiar ba Kristu Jesus, ita bele simu Nai Maromak nia Espiritu Santu nebee Nia promete tiha ona.

Nai Maromak kumpri nia promesa

¹⁵ Maun-alin sira, agora hau hakarak foo ezemplu hosi ita nia moris loro-loron. Se ema nain rua hakerek surat akordu ida, depois sira asina tiha, surat nee vale ona. Ema ida la bele kansela, i la bele amenta tan liafuan ruma ba iha surat nee.

¹⁶ Nunee mos bainhira Nai Maromak halo promesa ho Abraão no nia jerasaun. Iha momentu nebaa, Nai Maromak laos dehan “Hau halo promesa nee ho o nia jerasaun sira”, tanba Nia la foo promesa nee ba ema barak. Maibee Nia foo ba Abraão nia jerasaun ida deit, nee mak Kristu.

¹⁷ Buat nebee hau hakarak hatete mak nee: Nai Maromak halo promesa uluk ho Abraão. Liu tiha tinan atus haat tolu-nulu, foin Nia hatuun lei relijiaun liu hosi Moisés. Maibee Maromak la kansela Nia promesa ida uluk nee.

¹⁸ Se Maromak foo bensaun ba ita tanba ita tuir lei relijiaun, entaun ita la simu ona bensaun tuir Maromak nia promesa. Maibee laos hanesan nee! Maromak foo bensaun ba Abraão tanba Nia promete tiha ona atu foo ba nia.

¹⁹ Se nunee, Maromak foo lei relijiaun hodi halo saida? Nia foo lei relijiaun hodi hanorin katak, ita ema nee sala nain. Nia hakarak atu lei nee vale too deit Abraão nia Jerasaun ida nee too mai, Ida nebee temi tiha ona iha Maromak nia promesa nee. Bainhira Maromak foo lei relijiaun ba ema Judeu sira, Nia foo liu hosi Nia anju hodi entrega fali ba Moisés para foo tutan ba povu.

²⁰ Maibee bainhira Nia halo promesa ho Abraão, Nia la uza ema seluk, Nia rasik mak promete. Nunee ita hatene katak Maromak nia promesa boot liu fali lei relijiaun nian.

Lei relijiaun foo sai kona ba ema nia sala

²¹ Karik imi hanoin katak, Maromak nia lei relijiaun kontra fali Nia promesa. Lae liu! Se ita ema bele kumpri hotu lei nee, entaun Maromak bele simu ita i foo moris mai ita liu hosi lei. Maibee la iha lei ida mak ita bele kumpri hotu.

²² Iha Livru Sagradu hakerek dehan, sala kesi metin ema hotu-hotu iha mundu. Nee duni, so ema nebee fiar ba Jesus Kristu deit mak bele simu buat nebee Nai Maromak promete tiha ona.

²³ Uluk, Jesus Kristu seidauk mai, lei relijiaun kesi metin hela ami ema Judeu, halo ami hanesan ema dadur. Maibee bainhira Jesus mai, Maromak foo sai katak, se ami fiar ba Kristu mak ami hetan liberdade.

²⁴ Nunee, lei relijiaun eduka ami too Kristu mai. Maibee bainhira Nia mai, ami fiar ba Nia hodi moris diak malu fali ho Maromak.

²⁵ Nee mak agora, ita fiar ona ba Kristu, ita la presiza tan atu lei relijiaun ukun ita.

Ema nebee fiar ba Kristu sai Maromak nia oan

²⁶ Agora imi hotu-hotu sai ona Nai Maromak nia oan, tanba imi fiar ba Kristu Jesus.

²⁷ Imi sarani ona para sai ida deit ho Kristu, i agora imi moris tuir Nia ezemplu, bele dehan hanesan imi falun aan ho Kristu.

²⁸ Imi hotu-hotu nebee fiar ba Kristu Jesus sai ona ida ho Nia. Nunee, atu imi ema Judeu ka laos ema Judeu, atan ka ema livre, mane ka feto, imi hotu ida deit iha Kristu Jesus.

²⁹ Imi Kristu nia ema. Nunee imi mos sai ona Abraão nia jerasaun, i imi iha direitu hodi simu Nai Maromak nia promesa.