Galasia 2 - Biblia Tetun Dili

Nai Jesus nia apostolu sira simu Paulo nia hanorin

¹ Liu tiha tinan sanulu resin haat, hau fila fali ba Jerusalém, hamutuk ho Barnabé. Ami lori mos Tito.

² Hau baa tanba Nai Maromak mak haruka. Iha nebaa hau hasoru malu ho lideransa sarani sira hodi konta ba sira Novidade Diak nebee durante nee hau foo sai ba ema nebee laos Judeu. Hau koalia ho lideransa sira deit, atu sira bele tetu didiak hau nia hanorin nee loos ka lae. Tanba se sira la simu karik, entaun hau nia serbisu saugati deit.

³ Lideransa sira simu hau nia liafuan ho diak. Sira simu mos Tito. Maski nia ema Gregu, laos ema Judeu, maibee sira la obriga nia sunat.

⁴ Maibee iha tempu nee, iha sarani balu la konkorda tanba sira nia hanorin oin seluk. Ema sira nee finju fiar ba Jesus hodi tama iha sarani sira nia leet. Sira nee obriga kristaun sira nebee laos Judeu hodi halo tuir ema Judeu nia lei relijiaun hotu. Afinal, Jesus Kristu foo ona liberdade mai ita. Nee mak ita la moris tan tuir regra sira nee, hanesan atan ba lei relijiaun Judeu.

⁵ Maski nunee, ami nunka halo tuir, para imi bele fiar nafatin Novidade Diak nebee imi simu ona hosi ami. Tanba Novidade Diak nee mak loos.

⁶ Lider sira nee mak ema nebee hamriik iha sarani sira nia oin. Maibee mai hau, atu ema boot ka ema kiik, hau la interese, tanba Maromak la haree ba ida nee. Bainhira hau hatoo hau nia hanorin ba sira, sira simu ho diak, i la aumenta liafuan ida.

⁷ Laos nee deit, sira mos rekonhese katak Nai Maromak foo fiar ona mai hau para foo sai Novidade Diak ba ema nebee laos Judeu, hanesan mos Nia foo fiar ba Pedro lori Novidade Diak ba ema Judeu.

⁸ Sira haree katak Nai Maromak foo kbiit ba Pedro hodi halao nia serbisu nudar Nai Jesus nia apostolu ba ema Judeu. Nunee mos Nia foo kbiit mai hau nudar Nia apostolu ba ema nebee laos Judeu.

⁹ Tiago, Pedro, ho João rekonhese katak, Nai Maromak foo ona knaar nee mai hau. Sira nain tolu nee, sarani sira respeita nudar lideransa igreja nian. Sira kaer liman ho hau ho Barnabé, hanesan sinal katak, ami hotu laran ida. Sira konkorda para ami lori nafatin Novidade Diak ba ema nebee laos Judeu, i sira mak lori ba ema Judeu.

¹⁰ So buat ida deit mak sira husu mai ami, atu ami tulun ema kiak sira iha Jerusalém. I hau mos hakarak duni halo ida nee.

Paulo hasala Pedro nia atitude

¹¹ Depois iha loron ida, Pedro mai iha sidade Antiokia, hau siak nia iha sarani sira nia oin, tanba nia atitude sala.

¹² Bainhira Pedro foin too mai, nia kontenti haan hamutuk ho sarani sira nebee laos Judeu. Maibee bainhira Tiago nia kolega Judeu sira too mai, Pedro sees aan tiha hosi sira nebee laos Judeu, i lakohi haan hamutuk tan ho sira. Nia tauk nia maluk Judeu sira nee, tanba sira hanorin dehan, Kristu nia ema tenki kaer metin ema Judeu sira nia lei relijiaun hotu, i tenki moris haketak aan hosi ema nebee laos Judeu.

¹³ Ema Judeu sira seluk mos komesa halo tuir Pedro nia hahalok finjidu nee, too Barnabé mos halo tuir i lakohi haan tan ho ema nebee laos Judeu.

¹⁴ Bainhira hau haree sira la tuir ona Nai Jesus nia Novidade Diak nebee loos, hau siak Pedro iha sira hotu nia oin dehan, “Irmaun moris mai ema Judeu. Maibee irmaun rasik la moris ona tuir lei relijiaun Judeu nian. Nusaa mak agora ita hakarak obriga ema laos Judeu nebee la sunat, atu sira tuir fali lei nee hotu?”

¹⁵ Loos duni, hau ho Pedro moris mai ema Judeu. Ami ema Judeu uluk kedas hatene Maromak nia lei; ema nebee laos Judeu la hatene.

¹⁶ Maibee agora ami hatene katak, la iha ema ida mak Maromak deklara moris loos ona tanba nia tuir lei relijiaun. Nai Maromak deklara ema ida moris loos ona tanba nia fiar ba Kristu Jesus, laos tanba halo tuir lei nee. Nee mak ami mos fiar ba Kristu, para Maromak bele deklara ami moris loos ona.

¹⁷ Ami fiar katak Maromak deklara ami moris loos ona tanba ami fiar ba Kristu. Maibee too ikus ema Judeu balu foo sala mai ami dehan, ami halo sala tanba la tuir ona lei relijiaun. Se nunee, Kristu mak halo ami sala ka? Lae liu!

¹⁸ Hau husik tiha ona sistema lei relijiaun nian, entaun hau la bele halo tuir fali. Se hau halo tuir fila fali mak hau sala.

¹⁹ Maibee hau mate tiha ona ba lei relijiaun nian, para hau bele foo hau nia moris tomak ba Maromak.

²⁰ Bele dehan, hanesan hau mate tiha ona iha krus hamutuk ho Kristu. Agora laos hau mak moris tan, maibee Kristu mak moris iha hau. I hau moris iha mundu nee, hau fiar deit ba Nai Maromak nia Oan. Nia hadomi teb-tebes hau, too foo nia Aan ba mate iha hau nia fatin.

²¹ Nai Maromak simu hau tanba Nia grasa. Se karik Nai Maromak simu ita tanba ita halo tuir lei relijiaun, entaun Kristu nia mate la iha folin.