Galasia 1 - Biblia Tetun Dili

Paulo hahuu nia surat

^1-2 Hau Paulo, ho maluk sarani sira nebee hamutuk ho hau iha nee, haruka surat nee ba sarani sira iha provinsia Galasia. Hau Nai Jesus nia apostolu. Laos ema kriatura mak hili hau hodi halao serbisu nee, maibee Jesus Kristu ho Aman Maromak mak hili. Kristu nee mak Maromak promete kedas hori uluk atu haruka mai. Nia mate maibee Aman Maromak halo Nia moris fali ona.

³ Ami harohan ba ita nia Aman Maromak ho Nai Jesus Kristu, para hatudu Sira nia grasa ba imi, i foo paz ho hakmatek ba imi.

⁴ Kristu foo-Aan ba mate hodi hamoos ita nia sala i hasai ita hosi buat aat iha mundu nee. Nia halo nunee tuir ita nia Aman Maromak nia hakarak.

⁵ Mai ita foti aas Nai Maromak nia naran tinan ba tinan! Amen!

Paulo hirus tanba ema galasia sira fila kotuk hosi hanorin nebee loos

⁶ Hau admira! Nusaa mak imi bele fila kotuk lalais hosi Maromak, nebee bolu ona imi liu hosi Kristu nia grasa. Maibee imi tuir fali hanorin seluk

⁷ nebee la loos. Tuir loloos, Nai Jesus nia Novidade Diak ida deit, la iha tan seluk. Maibee agora iha ema balu mai bobar tuun-sae Novidade Diak kona ba Kristu.

⁸ Kuidadu! Maski ami ka anju ida mai hosi lalehan foo sai ba imi Novidade Diak nebee la hanesan ho ida nebee ami foo sai ona ba imi, Maromak sei foo malisan ba nia.

⁹ Ami hatete tiha ona, agora hau repete dala ida tan: se iha ema ruma hanorin fali oin seluk, la tuir Novidade Diak nebee uluk imi simu tiha ona nee, Maromak sei foo malisan ba nia tinan ba tinan.

¹⁰ Hau koalia hanesan nee, atu ema bele gaba hau ka? Lae! Hau hakarak atu halo haksolok Maromak nia laran, laos atu halo haksolok ema nia laran. Se hau buka atu ema gaba hau karik, entaun hau laos Kristu nia atan.

Paulo konta fila fali oinsaa nia sai Jesus nia apostulu

¹¹ Maun-alin sira, hau foo hatene loloos ba imi katak, Novidade Diak nebee hau hanorin nee, la mai hosi ema.

¹² Hau laos simu hosi ema, laos ema mak hanorin hau, maibee Jesus Kristu rasik mak hatudu mai hau.

¹³ Imi rona ona kona ba hau nia moris uluk, bainhira hau sei tuir relijiaun Judeu. Iha tempu nebaa, hau halo sarani sira terus liu, i hakaas aan para halo rahun sira.

¹⁴ Hau foo neon ho laran tomak hodi estuda relijiaun Judeu nian i halo tuir, liu fali ema Judeu sira seluk nebee idade hanesan hau. Hau mak badinas liu halo tuir ita nia bei-ala sira nia tradisaun ho lei relijiaun hotu.

^15-16 Maski nunee, Nai Maromak desidi atu hatudu Nia Oan Jesus mai hau. Bainhira hau sei iha hau nia inan nia kabun laran, Nia hatudu ona Nia grasa mai hau hodi hili hau atu baa foo sai Novidade Diak kona ba Jesus ba ema nebee laos Judeu. Bainhira Nia hatudu Nia Oan mai hau, hau la baa husu ema seluk nia hanoin.

¹⁷ Hau mos la baa iha sidade Jerusalém atu hasoru malu ho Jesus nia apostolu sira seluk nebee Nia foti uluk ona. Maibee hau baa iha rai Arabi. Hotu tiha hau fila fali mai iha sidade Damasku.

¹⁸ Liu tiha tinan tolu, foin hau baa iha Jerusalém hodi hasoru malu ho Pedro. I hau hela ho nia durante loron sanulu resin lima.

¹⁹ Iha momentu nebaa, hau mos hasoru Nai Jesus nia alin, Tiago. Maibee hau la haree Nai Jesus nia apostolu sira seluk.

²⁰ Buat nebee hau hakerek nee, loos duni. Hau koalia loloos iha Maromak nia oin.

²¹ Depois hau baa iha provinsia Síria ho Silísia.

²² Iha tempu nebaa, Kristu nia povu iha fatin-fatin iha provinsia Judeia seidauk konhese hau.

²³ Sira rona deit ema konta dehan, “Ema ida nebee uluk halo terus ita nee mak agora foo sai fali Novidade Diak kona ba Kristu. Maski uluk nia hanehan ita no buka harahun ita para la bele fiar ba Kristu.”

²⁴ I sira hahii Nai Maromak, tanba Maromak muda ona hau nia moris.