Filipi 4 - Biblia Tetun Dili

¹ Tanba nee, maun-alin doben sira, imi tenki hamriik metin ho Nai Jesus. Hau hakarak teb-tebes atu haree imi, tanba imi hanesan premiu ida hosi hau nia serbisu, i imi halo hau nia laran haksolok.

Paulo nia lia menon ikus

² Hau husu boot ba imi, Evódia ho Síntike, atu la bele istori malu tan, maibee tenki neon ida laran ida, tanba imi nain rua Nai Jesus nia ema.

³ Hau nia kolega serbisu nebee hau konfia, hau husu o ajuda hela senhora nain rua nee para diak malu. Tanba uluk sira nain rua serbisu makaas ajuda hau hodi foo sai Maromak nia Novidade Diak, hamutuk ho Clemente ho kolega sira seluk. Sira hotu nia naran, Maromak hakerek tiha ona iha livru ema moris rohan-laek nian.

⁴ Loron-kalan haksolok deit baa, tanba imi Nai Jesus nia ema. Dala ida tan hau hatete: haksolok nafatin baa!

⁵ Hatudu imi nia laran diak ba ema hotu-hotu, tanba Nai Jesus besik fila mai ona.

⁶ La bele preokupa kona ba saida deit. Maibee iha situasaun saida deit, halo orasaun husu Nai Maromak nia tulun. I bainhira imi husu, keta haluha foo agradese ba Nia.

⁷ Bainhira imi halo nunee, mak Maromak sei halo imi nia laran hakmatek. Hakmatek nebee Nia foo nee, ita ema sukat la too. Ho hakmatek nee, Maromak sei kuidadu imi nia neon ho laran para imi la bele preokupa ona, tanba imi Kristu Jesus nia ema.

⁸ Entaun, maun-alin sira, imi tenki kuidadu didiak imi nia hanoin. Hanoin bebeik kona ba buat nebee loos, ho buat nebee iha valór. Hanoin kona ba buat diak nebee halo haksolok Maromak nia laran ho buat furak nebee foo ksolok ba ema. Saida deit mak diak loos i saida deit mak ita bele gaba, nee mak imi tenki hanoin.

⁹ Halo tuir buat nebee imi aprende ona hosi hau, liu hosi hau nia koalia ka hau nia hahalok. Bainhira imi halo nunee mak Maromak sei akompanha imi, i foo laran hakmatek ba imi.

Paulo foo obrigadu ba sarani sira nia ajuda

¹⁰ Hau haksolok teb-tebes hodi hahii Nai Jesus, tanba dala ida tan imi ajuda hau. Hau hatene katak, uluk kedas imi hadomi hau, maibee kleur ona imi la iha oportunidade hodi tulun.

¹¹ Hau hatete nunee, laos tanba hau falta buat ruma, lae. Hau aprende ona moris kontenti ho buat nebee mak hau iha.

¹² Hau hatene ona moris ho sasaan ituan, i hatene mos moris ho sasaan kompletu . Hau aprende ona segredu nee: oinsaa bele moris ho kontenti iha situasaun saida deit. Atu kabun bosu ka hamlaha, atu iha sasaan barak ka sasaan ituan, hau kontenti nafatin.

¹³ Iha Kristu hau bele hasoru situasaun saida deit, tanba Nia mak foo kbiit mai hau.

¹⁴ Maski nunee, foin dadauk imi ajuda hau iha susar laran, nee buat diak ida.

¹⁵ Uluk mos, bainhira imi foin simu Nai Jesus nia Novidade Diak, i hau sai hosi provinsia Masedónia, so imi iha sidade Filipi deit mak foo ajuda mai hau. Sarani sira seluk lae. Maibee imi hatene ona istoria nee.

¹⁶ Bainhira hau sei iha sidade Tesalónika mos, imi haruka osan mai hau dala rua hodi suporta hau.

¹⁷ Hau koalia hanesan nee, laos tanba hau hakarak atu imi foo tan. Maibee hau hakarak para Maromak foo bensaun ba imi, tanba imi nia laran diak.

¹⁸ Hau simu ona ajuda hotu-hotu nebee imi haruka mai hau liu hosi Epafroditu. Agora hau la falta buat ida, i sei iha resin tan. Imi nia tulun nee hanesan sakrifisiu morin ida nebee imi foo ba Maromak, i Nia simu ho laran haksolok.

¹⁹ Hau nia Maromak riku teb-tebes. I Nia sei foo ba imi buat hotu nebee imi presiza, tuir nia rikusoin hosi lalehan iha Kristu Jesus.

²⁰ Mai ita foti aas ita nia Aman Maromak nia naran, too tinan ba tinan! Amen.

Paulo taka nia surat

²¹ Hatoo hau nia kumprimentus ba ema hotu-hotu nebee tuir Kristu Jesus iha nebaa. Hato mos kumprimentus hosi maluk sarani sira nebee hamutuk ho hau,

²² ho mos sarani sira iha sidade nee, liu-liu sira nebee serbisu ba liurai boot César.

²³ Hau harohan atu Nai Jesus Kristu hatudu Nia grasa ba imi hotu.