Filipi 3 - Biblia Tetun Dili

Nai Maromak simu ema tanba fiar ba Jesus Kristu

¹ Maun-alin sira, haksolok baa, tanba imi laran ida ona ho Nai Jesus. Maski hau hakerek fali buat nebee uluk hau hakerek tiha ona, maibee hau la baruk foo hanoin dala ida tan ba imi, atu imi fiar metin nafatin.

² Kuidadu ho asu sira nee. Kuidadu ho ema sira nebee halo buat aat no kuidadu ho ema sira nebee dehan, sunat mak foin Maromak simu ita.

³ Afinal ita nebee adora Maromak hodi Nia Espiritu nia tulun, mak sunat loloos. Ita foti aas Kristu Jesus nia naran, i ita la depende ba saida deit mak ita ema halo.

⁴ Se Maromak bele simu ita tanba ita nia hahalok ka ita nia huun, entaun hau rasik bele dehan, hau loos tiha ona. Se ema seluk gaba aan kona ba buat sira nee, hau bele gaba aan liu fali nia.

⁵ Hau moris mai, iha loron walu ema sunat ona hau tuir lei relijiaun nian. Hau ema Ebreu isin, hosi suku Benjamim, hosi ema Israel. Uluk hau seidauk tuir Kristu, hau nudar ema grupu Farizeu nebee badinas teb-tebes halo tuir lei relijiaun,

⁶ i la iha ema ida foo sala mai hau. Laos nee deit, iha tempu nebaa hau mos halo terus sarani sira.

⁷ Uluk hau hanoin dehan, buat sira nee folin boot mai hau. Maibee agora hau konsidera la iha folin ida, tanba hau tuir Kristu.

⁸ Ida nebee hau konsidera folin boot liu mak nee: Hau bele konhese Kristu Jesus hau nia Nai. Buat sira seluk, hau husik tiha ona, i konsidera hanesan lixu deit, para hau bele besik liu Kristu,

⁹ i bele laran ida ho Nia. Nai Maromak simu hau laos tanba hau tuir lei relijiaun, maibee tanba hau fiar ba Kristu. Tanba hau nia fiar mak Maromak simu hau.

¹⁰ Hau hakarak konhese Kristu liu tan. Hau hakarak para Maromak serbisu iha hau nia laran ho kbiit ida nebee Nia uza hodi halo Kristu moris fali hosi mate. Hau hakarak halo parte iha Kristu nia terus. Kona ba mate mos, hau hakarak sai hanesan Nia.

¹¹ Tanba hau laran metin katak, ikus mai Nia sei halo hau moris fali hosi mate.

Hakaas aan nafatin hodi tuir Kristu too rohan

¹² Hau laos dehan katak, hau hetan ona buat sira nee ka hau moris loos ona. Maibee hau hakaas aan nafatin hodi moris tuir Kristu Jesus nia hakarak, tanba ho objetivu nee mak Nia hili hau hodi tuir Nia.

¹³ Maun-alin sira, hau la hanoin katak hau too ona objetivu nee. Maibee buat nebee hau halo mak nee: hau haluha tiha buat nebee iha hau nia kotuk hodi halai makaas ba oin.

¹⁴ Hau hakaas aan ba oin nafatin too rohan para manaan premiu. Hau nia premiu mak nee: Nai Maromak bolu hau tama iha lalehan, tanba Kristu Jesus mate mai hau.

¹⁵ Tanba nee, ita hotu nebee abut metin ona iha Kristu, tenki hanoin hanesan nee. Maibee se imi balu iha hanoin ruma la hanesan maka Nai Maromak sei foo hanoin ba ema nee.

¹⁶ Bele halo nusaa mos, ita tenki halo tuir buat hotu nebee Maromak hatudu ona mai ita.

¹⁷ Maun-alin sira, imi tenki moris tuir hau nia ezemplu, i aprende didiak hosi ema seluk nebee tuir ona ezemplu nebee hau hatudu.

¹⁸ Hau dehan dala barak ona ba imi katak, iha ema barak moris hanesan inimigu ba Kristu, i la foo folin ba Nia mate iha krus. I agora ho matan been hau foo hanoin ba imi.

¹⁹ Too ikus Maromak sei soe lakon tiha ema sira nee. Sira nia maromak mak sira nia kabun. Hahalok aat nebee sira halo, halo ema moe, maibee sira tebe rai dehan, diak loos. Sira hanoin deit buat mundu nian.

²⁰ Maibee ita la bele nunee, tanba ita sai ona sidadaun lalehan nian. Agora ita hein hela ita nia Nai Jesus Kristu nudar ita nia Salvador tuun fila fali mai hosi lalehan.

²¹ Iha mundu nee, ita nia isin lolon fraku, i sei mate. Maibee bainhira Jesus Kristu mai, Nia sei troka tiha ita nia isin lolon fraku nee, sai fali forti ho furak teb-tebes hanesan Nia isin lolon rasik, i ita sei la mate tan. Nia bele halo ida nee tanba Nia iha kbiit hodi ukun buat hotu-hotu.