Filipi 2 - Biblia Tetun Dili

Haraik aan hanesan Jesus Kristu

¹ Imi laran metin tanba imi sai ona ida ho Kristu. Imi nia laran hakmatek tanba Kristu hadomi imi. Maromak nia Espiritu hamutuk ho imi. Imi laran diak ba malu, i hadomi malu.

² Imi moris nunee, halo hau nia laran haksolok. Agora hau husu atu imi hanoin ida deit, hadomi malu ho espiritu ida no objetivu ida, atu nunee hau bele haksolok liu tan.

³ La bele halo saida deit hodi buka diak ba imi nia aan. La bele foti aan, maibee tenki haraik aan hodi konsidera ema seluk diak liu fali imi.

⁴ La bele serbisu deit ba imi nia interese privadu, maibee imi ida-idak mos tenki haree ba ema seluk nia interese.

⁵ Imi tenki haraik aan hanesan Kristu Jesus.

⁶ Nia Maromak. Maski nunee Nia prontu husik Nia pozisaun nudar Maromak.

⁷ Nia husik tiha buat hotu-hotu hodi sai ema i moris hanesan atan.

⁸ Nia sai tiha ema, Nia haraik Aan hodi moris tuir Nai Maromak nia hakarak too mate. Maski ema oho Nia iha krus hanesan fali ema aat ida mos, Nia simu.

⁹ Tanba nee, Nai Maromak foti aas Nia liu buat hotu-hotu, i foo ba Nia, naran ida nebee boot liu naran hotu-hotu.

¹⁰ Maromak halo nunee atu kriatura hotu-hotu iha lalehan ho iha rai, ema moris ho ema mate, hakneak hodi adora Jesus.

¹¹ Hotu-hotu sei hatete, “Jesus Kristu mak Nai!” Ho nunee sira foti aas Aman Maromak nia naran.

Moris tuir Maromak nia hakarak

¹² Maluk doben sira, uluk hau sei hamutuk ho imi, imi sempre halo tuir Maromak nia hakarak. Agora hau dook hosi imi mos, imi tenki kontinua nafatin moris nunee. Maromak salva tiha ona imi. Nee duni, esforsa aan ho tauk no respeitu ba Maromak hodi hatudu rezultadu salvasaun nian.

¹³ Tanba Nai Maromak rasik serbisu iha imi nia laran. Nia halo imi prontu hodi tuir Nia hakarak, i foo mos kbiit ba imi atu bele halo tuir.

¹⁴ Imi halo saida deit, la bele murmura, i la bele istori malu.

¹⁵ Nunee, nudar Maromak nia oan, imi bele moris ho laran moos, imi la iha sala, i la iha ema ida bele hatudu liman ba imi. Imi moris iha ema aat sira nia leet. Entaun imi tenki sai hanesan naroman hodi leno dalan ba sira, hanesan fitun iha loro leten.

¹⁶ Hatoo ba sira, Maromak nia Liafuan nebee foo moris. Se imi halo nunee, entaun aban-bainrua bainhira Jesus Kristu fila fali mai, hau nia laran sei haksolok, tanba hau nia serbisu ho hau nia kolen la saugati.

¹⁷ Tanba imi fiar ba Kristu, imi mos serbii Maromak hodi entrega imi nia aan tomak sai hanesan sakrifisiu ba Nia. Se ema oho hau tanba hau nia fiar, mak hau nia mate sai hanesan sakrifisiu ida hodi foo ba Nai Maromak. Bele nunee mos, hau nia laran haksolok hamutuk ho imi.

¹⁸ Imi mos tenki haksolok hamutuk ho hau.

Paulo hakarak haruka Timóteo ba Filipi

¹⁹ Hau hein katak, la kleur tan Nai Jesus foo dalan atu hau haruka Timóteo baa iha imi. Bainhira nia fila fali mai, nia bele konta mai hau kona ba imi, hodi halo hau nia laran haksolok.

²⁰ Iha nee la iha ema seluk hanesan Timóteo. So nia deit mak iha interese teb-tebes ho imi.

²¹ Sira seluk so hanoin deit sira nia aan. Buat nebee Jesus Kristu hakarak, sira la interese.

²² Maibee imi rasik hatene, Timóteo serbisu makaas hodi foo sai Nai Jesus nia Novidade Diak. Nia serbisu hamutuk ho hau, hanesan oan ida serbisu ho nia aman.

²³ Nee duni hau hein too hau rona hau nia kazu nee atu sai oinsaa, depois mak hau haruka kedas nia ba imi.

²⁴ I Nai Jesus halo hau laran metin katak, la kleur tan, hau bele baa vizita imi.

Paulo hakarak haruka Epafroditu ba Filipi

²⁵ Uluk imi hili Epafroditu para mai tau matan ba hau. Durante nee nia sai hanesan hau nia alin ida hodi halao Maromak nia serbisu hamutuk ho hau, i nia luta hamutuk ho hau hanesan soldadu diak ida. Maibee agora, hau hanoin hau tenki haruka nia fila fali ba imi.

²⁶ Tanba nia hanoin teb-tebes imi hotu, i nia mos preokupa hela ho imi tanba imi rona dehan nia moras.

²⁷ Loos duni, momentu nebaa, nia moras todan besik atu mate, maibee Nai Maromak hatudu Nia laran diak ba nia, i kura tiha nia moras. Hanesan nee Maromak mos hatudu Nia laran diak mai hau, para hau la bele tristi liu tan.

²⁸ Tanba nee mak hau hakarak liu tan haruka Epafroditu fila fali ba imi, para imi haree nia, imi sei haksolok, i hau mos laran hakmatek.

²⁹ Imi tenki simu nia ho haksolok, nudar imi nia maluk sarani. I imi mos tenki respeita ema seluk nebee hahalok hanesan nia.

³⁰ Tanba nia halao Kristu nia serbisu too nia besik atu mate. Nia foo aan ba mate, para bele ajuda hau hodi imi nia fatin.