Filemon 1 - Biblia Tetun Dili

Paulo hahuu nia surat

¹ Surat nee hosi hau, Paulo, hamutuk ho ita nia irmaun Timóteo. Hau dadur hela iha komarka laran tanba hau tuir Kristu Jesus. Ami hakerek surat nee ba ami nia belun diak Filemon nebee serbii Nai Maromak hanesan ami.

² Surat nee foo mos ba irman Afia, nebee ita konsidera hanesan ita nia irman. Foo mos ba Arkipu nebee hakaas aan hamutuk ho ita iha serbisu nee. I foo mos ba sarani sira nebee baibain halibur malu hodi halo orasaun iha ita nia uma

³ Grasa no paz hosi ita nia Aman Maromak ho Nai Jesus Kristu hamutuk ho imi.

Paulo agradese ba Maromak

⁴ Senhor Filemon, bainhira hau halo orasaun, hau sempre temi ita nia naran, i foo agradese ba Maromak.

⁵ Tanba hau rona katak ita hadomi Maromak nia povu santu hotu i ita mos fiar loloos ba Nai Jesus.

⁶ Senhor nia fiar nee halo ita moris neon ida laran ida ho sarani sira seluk. Hau harohan atu liu hosi imi nia domin nee, imi bele komprende klean liu tan bensaun hotu-hotu nebee Maromak foo mai ita tanba ita laran ida ho Kristu.

⁷ Irmaun hadomi Maromak nia povu santu hodi halo sira nia laran haksolok. Hahalok nee halo hau nia laran mos haksolok teb-tebes, i foo forsa mai hau.

Paulo husu Filemon simu fali nia atan Onésimu nebee uluk halai sai hosi uma

^8-9 Tanba nee hau hakarak husu buat ida. Nudar Kristu Jesus nia apostolu, hau iha direitu atu haruka ita halo buat nebee mak loos. Maibee hau lakohi manda, so husu deit, tanba ita hadomi Maromak nia povu santu. Hau mos katuas ona, i hau dadur hela iha kadeia laran tanba hau tuir Kristu Jesus.

¹⁰ Nee mak hau husu atu senhor simu fali ita nia atan Onésimu ho diak. Iha komarka nee nia sai hanesan hau nia oan rasik, tanba hau mak lori nia fiar ba Jesus.

¹¹ Uluk Onésimu nee la iha folin ba ita, maibee agora nia iha folin, laos ba ita deit, maibee iha folin mos mai hau.

¹² Hau hadomi teb-tebes nia, maibee la iha buat ida, agora hau haruka nia fila fali ba ita.

¹³ Hau iha komarka laran nee tanba hau foo sai Maromak nia Novidade Diak. Tuir loloos hau hakarak atu Onésimu hela nafatin ho hau para bele ajuda hau hodi ita nia fatin.

¹⁴ Maibee hau lakohi foti desizaun se senhor seidauk hataan. Tulun nebee ita foo mai hau nee, hau hakarak sai hosi ita nia laran, laos tanba hau mak obriga.

¹⁵ Uluk Onésimu halai sai tiha hosi ita nia uma. Dala ruma Maromak husik nia halai sai iha tempu badak para agora nia bele fila fali baa hela metin ho ita.

¹⁶ Uluk nia ita nia atan deit. Maibee agora nia fila fali, nia mos sai ona ita nia irmaun nebee ita hadomi. Hau mos hadomi teb-tebes nia, maibee ita sei hadomi liu tan nia, tanba agora nia laos deit ita nia atan, maibee nia mos tuir Nai Jesus hanesan mos ita.

¹⁷ Nee duni, se ita konsidera hau nudar ita nia kolega serbisu, entaun hau husu ba ita simu Onésimu hanesan mos ita simu hau.

¹⁸ Se Onésimu uluk halo sala ruma hasoru ita, ka nia iha tusan ruma, hau mak selu.

¹⁹ Hau hakerek ho hau nia liman rasik: Hau, Paulo, promete atu selu hotu Onésimu nia tusan ba Filemon. Maibee keta haluha katak, ita nia tusan iha hau nee boot liu, tanba ita fiar ba Maromak liu hosi hau.

²⁰ Entaun irmaun, halo ida nee para ajuda hau, tanba ita nain rua laran ida ona ho ita nia Nai Jesus Kristu. Nunee ita sei halo hau nia laran haksolok.

Paulo taka nia surat

²¹ Hau hakerek surat nee ho fiar katak ita sei halo tuir, i sei halo liu fali buat nebee mak hau husu.

²² Iha tan buat ida. Prepara fatin ida mai hau, tanba hau hein katak Maromak sei rona imi nia orasaun hodi loke dalan atu hau bele baa fali haree imi.

²³ Epafras dadur hela hamutuk ho hau tanba nia mos foo sai kona ba Kristu Jesus. Nia haruka kumprimentus ba ita.

²⁴ Marcos, Aristarco, Demas, ho Lucas serbisu hamutuk ho hau, i sira mos foo kumprimentus.

²⁵ Hau harohan atu Nai Jesus Kristu hatudu Nia grasa ba imi hotu.