Ester 9 - Biblia Tetun Dili

Ema Judeu harahun sira nia inimigu

¹ Tuir mai, iha loron 7 fulan Marsu iha orden rua mak iha liurai nia naran, nebee legal iha loron nee. Nunee iha loron nee ema Judeu nia inimigu sira laran metin katak sira bele halo rahun ema Judeu sira. Afinal iha loron nee, sai oin seluk fali, tan loron nee nakfilak sai fali loron nebee ema Judeu sira halakon sira nia funu maluk sira.

² Iha sidade hotu-hotu, iha provinsia 127 nebee liurai Ahasuweros ukun, ema Judeu sira halibur hodi ataka fila fali sira nia inimigu nebee hakarak halo rahun sira. La iha ema ida mak brani atu hasoru sira, tanba ema hosi rai seluk tauk atu mate ho ema Judeu sira.

³ I ema boot sira hotu iha provinsia 127, hanesan: Funsionariu iha palasiu, governador, liurai nia reprezentante sira, buka dalan hodi tulun ema Judeu sira, tanba sira tauk ona ho Mordekai.

⁴ Ema iha provinsia 127 hatene ona katak, liurai foti ona Mordekai iha nia palasiu, i Mordekai nia naran mos lemo rai iha fatin ba fatin. I nia podeer aumenta liu tan.

⁵ Nunee iha loron nee ema Judeu sira foti sira nia surik, i oho hotu sira nia inimigu. Sira halo sira nia inimigu tuir sira nia hakarak.

⁶ Iha kapital sidade Suzan deit, sira oho ema 500.

^7-10 Sira mos oho Amaan nia oan mane sanulu. Hanesan: Parsandata, Dalfaun, Aspata, Porata, Adalya, Aridata, Parmasta, Arizai, Aridai i Vaizata. (Amaan nee, Hamedata nia oan, nebee inimigu ho povu Judeu.) Maibee ema Judeu sira la hadau inimigu sira nia riku-soin, ituan deit mos.

¹¹ Iha loron nee ema mos foo hatene ba liurai dehan, “Ema Judeu sira oho tiha ema balu iha sidade Suzan nee.”

¹² Entaun liurai hatete ba Ester dehan, “Hau rona ona dehan, ema Judeu sira oho tiha ona ema 500 iha sidade Suzan. Sira mos oho hotu Amaan nia oan mane sanulu. Hau la hatene sira halo saida loos iha provinsia sira seluk. Maibee hau hakarak husu, liurai feto hakarak husu saida? Liurai feto husu saida deit, hau sei halo tuir. Entaun hatete deit mai!”

¹³ I Ester hataan, “Se amu liurai bele simu, hau husu nunee: aban ema Judeu sira nebee hela iha sidade Suzan nee halao nafatin surat dekretu nebee halao ona horiseik. I husik ema tara Amaan nia oan mane sanulu nia mate isin para ema hotu bele haree. Ida nee deit mak hau husu.”

¹⁴ Liurai simu Ester nia pedidu ho diak, i nia foo orden iha sidade Suzan para ema tara tiha Amaan nia oan mane nain sanulu nee nia mate isin.

¹⁵ Nunee iha aban, loron 8 fulan Marsu, ema Judeu sira iha sidade Suzan oho tan ema 300. Maibee sira la foti ema sira nee nia riku-soin ida mos.

^16-17 Iha tempu nee, loron 7 fulan Marsu, ema Judeu sira nebee hela iha liurai nia provinsia 127 halibur hodi defende aan hosi inimigu sira. Sira manaan sira nia inimigu no oho mate ema 75.000 nebee odi sira. Ho nunee, sira bele senti hakmatek, tanba la iha tan ema ruma atu ameasa sira. Maibee sira la foti ema sira nee nia riku-soin ida mos. Iha fali aban, loron 8 fulan Marsu, sira halo festa rame-rame, tanba kontenti.

Ema Judeu sira halo festa Purim ba dala uluk

¹⁸ Ho nunee, iha loron 7 no loron 8 fulan Marsu iha sidade Suzan, ema Judeu sira halibur hamutuk loron rua hodi funu hasoru ema sira nebee inimigu ho sira. Maibee iha loron 9 fulan Marsu, sira para, i sira halibur hodi halo festa rame-rame.

¹⁹ Maibee ema Judeu sira nebee hela iha aldeia-aldeia iha sidade seluk, sira halo funu loron ida deit. Nee mak too ohin loron mos, tinan-tinan, iha loron 8 fulan Marsu, sira halibur hodi halo festa rame-rame. Iha loron boot nee, sira foo hahaan ba malu.

²⁰ Buat sira hotu nebee akontese nee, Mordekai hakerek didiak. I haruka surat ba ema Judeu sira hotu nebee hela iha provinsia 127 iha liurai Ahasuweros nia ukun, ba sira nebee iha dook ka besik.

²¹ Nia hakerek ba sira dehan: “Hosi agora ba oin, tinan-tinan imi tenki halo festa nebee monu iha loron 8 ho 9 fulan Marsu.

²² Tanba iha loron rua nee, ita ema Judeu harahun hotu ema sira nebee inimigu ho ita. Nee mak ita tenki hanoin fulan nee, tanba ita nia tristi muda ba kontenti, no ita nia susar muda ba festa rame-rame. Agora ita nia moris lalika tauk no tanis tan ona. Nee mak tinan-tinan ita tenki celebra festa nee rame-rame, no haruka hahaan ba malu, no mos foo sasaan ba ema kiak sira.”

²³ Ema Judeu sira simu Mordekai nia surat nee ho diak, i sira halo tuir, no selebra loron boot nee tinan-tinan.

^24-26 Entaun, sira foo naran ba loron boot nee “Purim”, nebee ho lian Ebreu dehan dada ‘rifa’. Ida nee tanba, uluk, iha ema Agage ida, naran Amaan, Amedata nia oan. Nia halo planu atu oho ema Judeu sira hotu. Tanba nia buka loron nebee diak hodi realiza nia hanoin aat nee, nee mak nia dada rifa hodi hili loron nebee mak diak liu para oho ema Judeu sira. Dada ‘rifa’ ho lian Ebreu dehan, ‘pur-im’. (Nia forma mesak deit, mak ‘pur’.) Maibee bainhira Ester hatene tiha, nia baa foo hatene ba liurai, i liurai mos foo orden liu hosi surat dehan, planu aat nebee Amaan halo hodi halo aat ba ema Judeu sira, sei kona fali ba Amaan nia aan rasik. Tanba nia ho nia oan mane sira hotu ema sei tara mate iha ai-riin. Nia istoria nee hanesan nee, nee mak sira tau naran ba loron boot nee dehan, “Purim”. Iha loron boot nee, sira hotu hanoin saida mak akontese ho ema Judeu sira, i sira mos hanoin kona ba surat nebee Mordekai hakerek hodi hatudu dalan ba sira.

²⁷ Hahuu hosi tempu nee, ema Judeu sira selebra loron boot durante loron rua hodi hanoin asuntu nee. Sira halo nunee tinan-tinan. Ida nee hanesan ona sira nia kostumi tinan-tinan, tuir buat nebee Mordekai hakerek ona ba sira, too sira nia oan no bei-oan sira.

²⁸ Tuir desizaun mak nee: Agora ba oin iha jerasaun ida-idak, familia Judeu ida-idak, iha sidade hotu iha provinsia ida-idak, tenki hanoin asuntu nee hodi halo tuir loron boot Purim nee. La bele kotu, maibee tenki halao nafatin nunee too oan ba bei-oan sira.

²⁹ Bainhira Mordekai hakerek nia surat segundu nee, liurai nia kaben Ester, Abiail nia oan, mos hakerek surat ida hodi nia naran rasik nudar liurai nia feen boot, nebee foo apoiu makaas ba Mordekai nia surat kona ba loron boot Purim nee.

³⁰ Surat sira nee haruka ba ema Judeu sira hotu nebee hela iha provinsia 127 nebee liurai Ahasuweros ukun dehan, “Hodi imi hotu bele moris paz, dame, no hakmatek.”

³¹ Surat sira nee mos foo hatene oinsaa sira tenki halo loron boot Purim nee tinan-tinan, tuir Mordekai ho Ester sira nia surat. Ema Judeu sira nia oan, sira nia bei-oan, ho sira nia jerasaun sira hotu tenki hanoin no selebra loron boot nee tinan-tinan nafatin, hanesan sira selebra mos ema Judeu sira nia loron boot sira seluk. Iha loron sira nee dala ruma sira haan rame-rame, dala ruma sira jejun no dala ruma sira tenki arepende sira nia sala no harohan husu tulun.

³² Liurai nia kaben Ester nia orden foo hatene kona ba maneira oinsaa halo loron boot Purim, no haruka sira halo nunee tinan-tinan. Sira mos hakerek buat sira nee hotu iha livru istoria estadu nian.