Ester 6 - Biblia Tetun Dili

Liurai hatudu nia respeitu ba Mordekai

¹ Iha kalan nebaa, liurai toba la dukur. Entaun nia haruka dehan, “Lori mai livru nebee hakerek buat hotu-hotu nebee akontese ona, hahuu hosi sira foti hau sai liurai!” I ema baa foti livru nee, hodi lee ba liurai rona.

² Sira lee dadaun, lee mos problema nebee uluk, bainhira Mordekai hatene katak, liurai nia funsionariu nain rua nebee hein iha palasiu, Bigtan ho Teres, halo planu atu oho liurai Ahasuweros. Entaun Mordekai foo hatene ba ema, atu nunee sira la oho liurai. I ema hakerek asuntu nee iha livru, tama iha sira nia istoria.

³ Rona tiha istoria nee, liurai husu ba nia ema serbisu sira dehan, “Ita halo ona saida, hodi hatudu respeitu ba Mordekai? Tanba nia salva ona hau hosi mate!” Sira hataan, “Amu liurai keta hirus, maibee ita nunka halo buat ruma foo ba nia.”

⁴ Iha momentu nee Amaan foin tama ba iha palasiu nia oin, hodi husu ba liurai para tara mate tiha Mordekai iha ai-riin nebee nia foin harii nee. Bainhira liurai haree ema ruma hamriik iha sala vizita, nia husu, “See mak iha nebaa nee?”

⁵ Nia ema serbisu sira hataan, “Amaan mak hamriik iha sala vizita.” I liurai foo orden dehan, “Haruka nia tama mai!”

⁶ Bainhira Amaan tama, liurai husu kedas ba nia dehan, “Se liurai hakarak foo respeitu ba ema ida, liurai tenki halo oinsaa?” Amaan hanoin dehan, “Klaru ke liurai hakarak foo respeitu mai hau. Tanba la iha ema seluk tan mak boot liu hau.”

⁷ Nunee nia foo hatene ba liurai dehan, “Amu liurai! Hau nia hanoin hanesan nee: se amu liurai hakarak foo respeitu ba ema ida, entaun,

⁸ haruka ema serbisu sira lori amu liurai nia ropa ida nebee amu hatais ona. I lori mos amu liurai nia kuda ida nebee uza simbolu liurai nian iha kuda nia ulun.

⁹ I entrega ropa ho kuda nee ba liurai nia funsionariu boot ida, para nia mak hiit sae ema nebee amu liurai hakarak foo respeitu ba nia. I funsionariu nee mak tenki hasae ema nee ba liurai nia kuda. I haruka funsionariu nee lori ema nee ba iha dalan sira prinsipal iha sidade. I funsionariu nee mos tenki lao iha kuda nia oin, ho hakilar dehan, ‘Se liurai hakarak hatudu respeitu ba ema ida, nia hatudu ho maneira nunee.’ ”

¹⁰ Rona tiha nunee, liurai haruka Amaan dehan, “Loos ona! Agora o baa hili ropa nee ho kuda ida, tuir loloos buat nebee ohin o koalia nee. Iha ema Judeu ida, naran Mordekai, nebee bai-bain serbisu iha odamatan atu tama ba palasiu. Baa lalais hodi halo tuir buat nebee ohin o koalia ona para foo ba nia. Buat ida mos la bele halo menus. Tanba hau atu foo hau nia respeitu ba nia.”

¹¹ Nunee hakarak ka lakohi, Amaan baa foti ropa ho kuda nee. Nia foo hatais ba Mordekai, i hiit sae nia ba kuda nee. I Amaan mos lori nia haleu iha dalan sira prinsipal iha sidade nee, hodi hakilar dehan, “Se liurai hakarak hatudu respeitu ba ema ida, nia hatudu ho maneira hanesan nee.”

¹² Liu tiha nee, Mordekai fila fali ba halao nia serbisu iha odamatan tama ba palasiu. Maibee Amaan moe atu mate. Nee mak nia fila lalais i taka tiha nia oin ho hena.

¹³ Fila ho fila, nia konta buat hotu-hotu ba nia feen Seres, ho nia belun sira nebee nia fiar. Sira mos foo sai dehan, “Maibee Mordekai nee, ema Judeu. Agora o lakon ona. O komesa monu ona. Susar teb-tebes o kontra nia.”

¹⁴ Bainhira sira sei koalia hela, liurai nia funsionariu sira too mai, i lori nia ba lalais iha festa nebee Ester prepara tiha ona.