Ester 10 - Biblia Tetun Dili

Liurai Ahasuweros no Mordekai sira nia naran sae boot

¹ Liurai Ahasuweros foo orden para haruka ema hotu iha nia reinu selu impostu hosi kosar been toos nian, hodi serbisu. Orden nee mos too iha tasi sorin balu baa.

² Buat hotu nebee liurai halo, buat hotu nebee hatudu nia kbiit, buat hotu nebee akontese, kona ba ema Judeu sira nia asuntu nebee halo liurai Ahasuweros foti Mordekai sai ema boot nee, funsionariu sira iha palasiu hakerek hotu iha Livru Istoria Liurai Ema Media ho Ema Persia sira nian.

³ Tanba ema Judeu Mordekai nee, sai liurai Ahasuweros nia liman loos. Mordekai mos sai ema boot iha ema Judeu sira nia leet. Sira respeita nia, tanba nia buka halo diak ba nia ema rasik. Bainhira iha problema ka, oportunidade, Mordekai buka nafatin dalan atu buat hotu sai diak ba nia ema Judeu sira.