Ester 1 - Biblia Tetun Dili

Liurai Ahasuweros halo festa

¹ Istoria nee akontese bainhira liurai Ahasuweros kaer ukun iha Persia. Nia ukun provinsia 127, hosi India too Etiopia.

² Tempu nebaa, nia kaer ukun hosi nia palasiu iha sidade Suzan, nebee iha muru forti.

³ Bainhira nia ukun ona tinan tolu, nia halo festa boot ida ba nia funsionariu no ema boot sira hotu. Nia mos konvida komandante militar hosi Persia no Media sira, governador hosi provinsia sira, no ema boot sira seluk. Sira hotu marka prezensa.

⁴ Iha festa nee, nia hatudu nasaun nia riku-soin hotu ho nia kbiit tomak. Sira hatais ropa mesak didiak no folin karun i sira hadiak aan ho osan mean no mutin. Festa nee durante loron 180.

⁵ Bainhira loron 180 nee hotu ona, liurai hakarak taka buat hotu ho festa loron hitu nebee boot liu tan. Ema hotu nebee hela iha muru laran, kiik ka boot halo festa rame-rame iha palasiu nia muru laran.

⁶ Iha area nee iha riin barak halo hosi fatuk marmore. Sira enfeita ho kurtina bar-barak hosi hena kabas mutin nebee iha funan azul. Sira kesi kurtina sira nee ho hena kabas finu, ho tali kor uvas tau iha riin uza argola osan mutin. Sira tau kadeira ba bainaka nebee halo ho osan mean no mutin iha rai nebee sira halo hosi buat oin haat maka: Fatuk mean nabilan, marmore mutin, perola kulit mutin nabilan, i fatuk nabilan nebee iha lakan-nabilan oi-oin.

⁷ Bainaka sira hemu hosi kopu osan mean nebee nia modelu oi-oin, i iha funan keta-ketak. I liurai nia tua res-resin para hatudu nia laran diak.

⁸ Liurai foo hatene ba bainaka sira dehan, “Hemu deit baa! Keta moe!” I nia haruka nia ema serbisu sira dehan, “Fui nafatin too nakonu. La bele para!”

⁹ Bainhira liurai Ahasuweros halo festa nee foo ba mane sira, Vasti, liurai nia feen boot, mos halo festa foo ba feto sira nebee iha liurai nia palasiu.

Liurai hirus teb-tebes no ruun nehan ba nia feen Vasti

¹⁰ Bainhira too ona loron hitu iha festa ikus ona, liurai Ahasuweros haksolok teb-tebes tanba hemu ona tua barak. Entaun nia haruka nia funsionariu nain hitu nebee serbii nia iha palasiu nee, maka: Mehuman, Bista, Harbona, Bigta, Abagta, Setar, ho Karkas,

¹¹ ba lori liurai nia feen boot Vasti mai. Nia haruka liurai feto hatais ropa kapaas no tau koroa liurai nian. Tanba liurai nia kaben nee oin kapaas teb-tebes, nee maka liurai hakarak hatudu ba bainaka sira.

¹² Maibee bainhira funsionariu sira hatoo liurai nia orden, liurai feto hataan, “Hau la baa!” Entaun, bainhira sira fila fali ba foo hatene ba liurai nunee, nia laran nakali.

^13-14 (Liurai nia kostumi, bainhira nia atu halo buat ruma, nia konsulta uluk ho nia ema sira nebee nia foo fiar, nebee hatene didiak sira nia lei no regra. Sira nee bai-bain foo konselhu ba liurai, mak: Karsena, Setar, Admata, Tarsis, Meres, Marsena, ho Memukan. Sira mak hanesan ema boot iha nasaun Persia i Media, nebee bele hasoru liurai tuir sira nia hakarak.) I liurai husu konselhu ba sira dehan:

¹⁵ “Bainhira hau haruka hau nia funsionariu sira ba lori hau nia kaben Vasti mai hasoru hau, nia lakohi mai. Oinsaa? Tuir ita nia lei no regra sira, hau tenki halo saida ba nia? Tanba nia lakohi halo tuir liurai nia orden.”

¹⁶ I Memukan hamriik iha liurai ho ema boot sira nia oin, hodi hataan, “Nunee, amu liurai. Bainhira amu nia kaben la rona ona amu, nia hatuun no halo moe liurai. I laos halo moe liurai deit, maibee nia halo moe mos funsionariu sira hotu, no povu hotu iha provinsia 127 nee.

¹⁷ Tebes duni feto hotu-hotu nebee iha liurai nia ukun rona nia hahalok nee. Nunee sira sei la rona tan sira nia laen, tanba sira sei dehan, ‘Liurai Ahasuweros haruka nia kaben mai hasoru nia, maibee nia lakohi mai.’ Entaun sira sei la respeita tan sira nia laen.

¹⁸ Favor rona mai hau. Loron ohin mos, ema boot sira hosi Persia ho Media sira nia kaben mai hotu festa iha palasiu nee, klaru ke sira rona ona nia hahalok nee. Nunee sira mos sei hasoru sira nia laen. I sira sei istori malu bebeik, la para.

¹⁹ Nunee deit amu liurai, hau nia hanoin mak nee: se amu liurai hakarak, amu asina surat dekretu ida. Tau karimbu ba surat nee para ema hatene katak, nee mai hosi lei no orden ema Persia no ema Media nian, i la bele muda no la bele dada fali. Surat nee tenki hakerek dehan, liurai nia kaben Vasti la bele mai tan iha liurai nia oin. Maski dala ida deit mos la bele. I foo nia fatin ba feto ida nebee diak liu, nebee respeita nia laen, mak liurai rasik.

²⁰ I kuandu surat dekretu hosi liurai nee haleu ona iha provinsia 127 nee, maka feto hotu-hotu, kiik ka boot, sei hatene, i sira sei rona no respeita ba sira nia laen.”

²¹ Liurai Ahasuweros ho nia funsionariu sira hotu simu ho diak Memukan nia hanoin nee.

²² Depois nia haruka nia funsionariu sira hakerek surat, tuir povu ida-idak nia lian i hakerek dehan, “Tuir buat nebee loos, maka mane ida-idak mak xefi iha nia uma kain rasik, i koalia iha sira nia uma uza sira nia lian rasik.” Depois liurai haruka surat nee ba iha provinsia 127 nebee nia ukun.