Efezu 4 - Biblia Tetun Dili

Kristu nia povu moris iha unidade

¹ Hau dadur hela tanba serbii ita nia Nai. Nunee hau husu boot atu imi bele moris tuir Maromak nia hakarak, tanba Nia bolu ona imi sai Nia ema.

² Imi tenki moris haraik aan, laran maus, pasiensia ba malu, i hadomi malu. Se ema ruma halo sala hasoru imi, lalika tau moruk nee iha fuan-laran.

³ Espiritu Santu halo ona imi moris iha unidade. Nee duni hakaas aan atu moris iha dame nia laran, para imi nia unidade nee bele metin nafatin.

⁴ Ita hamutuk sai isin lolon ida deit, no Espiritu ida deit. Nunee mos, Maromak bolu ona ita hotu sai Nia ema no laran metin deit ba Nia.

⁵ Ita nia Nai ida deit; ita nia fiar ida deit, i ita nia batizmu ida deit.

⁶ Nai Maromak ida deit; Nia mak ita hotu nia Aman. Nia ukun ita hotu, halao Nia serbisu liu hosi ita hotu, i Nia domina ita hotu nia fuan-laran.

Kristu foo knaar oi-oin ba Nia povu para sai forti

⁷ Maski ita hotu ida deit, maibee Kristu fahe kbiit mai ita ida-idak tuir nia grasa, para bele halao Nia serbisu.

⁸ Nee tuir buat nebee hakerek tiha ona iha Livru Sagradu dehan, “Bainhira Nia sae ba iha fatin aas, Nia lori inimigu sira nebee Nia hadau iha funu laran, i Nia fahe prezenti oi-oin ba ema.”

⁹ Liafuan “Nia sae” nee dehan saida? Nee dehan katak, uluk Nia tuun ona mai iha mundu nee, iha fatin nebee kraik liu.

¹⁰ Ida nebee tuun mai nee, Nia duni mak sae fila fali ba lalehan, iha fatin nebee aas liu hodi ukun buat hotu-hotu iha lalehan ho rai. Nia nee mak Kristu.

¹¹ Kristu mak foo kbiit ba Nia ema, atu sira halao serbisu nebee Nia fahe ba sira. Nia foti balu sai Nia apostolu, balu Nia foti sai Nia profeta para tatoli Nia liafuan, balu sai ema nebee foo sai Nia Novidade Diak ba ema nebee seidauk rona, i balu fali sai bibi atan i mestri hodi tau matan i hanorin Nia povu.

¹² Nia foti sira nee para sira bele prepara Maromak nia povu atu ita hotu halao Nia serbisu. Ho nunee ita hotu, nudar Kristu nia isin lolon, sai forti ba bebeik,

¹³ too ita hotu neon ida laran ida fiar ba Maromak nia Oan i konhese didiak Nia. Iha ikus, ita laos hanesan labarik tan, maibee sai boot ona, too ita sai hanesan Kristu.

¹⁴ Entaun, ita nia fiar la nakdoko ona hanesan laloran nebee anin huu ba-mai. Ema bosok-teen mai inventa tuun-sae hanorin nebee la loos, ita la tuir, ita la monu ba sira nia lia falsu.

¹⁵ Maibee ita so koalia lia loos hodi hatudu domin ba malu. Se ita halo nunee, neneik-neneik ita sai hanesan Kristu iha ita nia moris tomak. Kristu nee mak ita nia Ulun.

¹⁶ I ita hanesan Nia isin lolon. Bainhira ema nia liman-ain sira nee ida-idak halo tuir nia knaar rasik, entaun isin lolon nee forti ba bebeik. Nunee mos Kristu nia povu. Kristu halo ita hotu sai ida. Se ita hadomi malu i ida-idak halao nia knaar, mak ita hamutuk boot ba dadauk i sai forti.

Husik tiha moris uluk nian hodi moris tuir Kristu

¹⁷ Rona didiak saida mak hau hatete agora ba nee, tanba hau koalia hodi Nai Jesus nia naran. Imi la bele moris tan hanesan ema nebee la konhese Nai Maromak. Tanba sira nia hanoin arbiru deit.

¹⁸ Sira nia neon nakukun hela. Sira moris dook hosi Maromak, tanba sira ulun toos, i lakohi hatene Maromak nia dalan.

¹⁹ Sira la iha ona moe. Nee mak sira nia moris hanesan animal. Sira foo sira nia aan ba hahalok aat, i sempre hakarak atu halo sala tan.

²⁰ Maibee bainhira imi aprende kona ba Kristu, imi nunka aprende atu moris aat hanesan nee!

²¹ Tanba hau hatene katak, ema nebee uluk hanorin imi kona ba Kristu, hanorin buat nebee mak loos.

²² Uluk imi hakarak halo buat aat oi-oin, i imi nia hakarak nee lohi imi, too estraga imi nia aan. Maibee ema nebee hanorin imi kona ba Kristu, sira haruka imi husik tiha imi nia moris uluk nee,

²³ i foo fatin ba Nai Maromak para Nia halo foun imi nia neon no laran.

²⁴ Nia halo ona imi sai ema nebee moris foun, tuir Maromak halo ona ita, para imi moris loos ho laran moos.

²⁵ Nee duni, la bele bosok tan. Imi koalia ba malu, tenki koalia loos, tanba ita hotu hanesan isin lolon ida.

²⁶ Se imi hirus, keta husik hirus nee lori imi ba sala, i la bele rai hirus too loro matan monu,

²⁷ atu nunee imi la foo oportunidade ba diabu.

²⁸ Ema nebee naok-teen, la bele naok tan ona. Maibee nia tenki serbisu makaas ho nia liman rasik hodi sustenta nia aan ho mos hodi foo tulun ba ema sira nebee presiza.

²⁹ Bainhira imi koalia, la bele koalia liafuan tolok no aat. Maibee koalia deit liafuan diak nebee ema presiza rona, para hametin sira nia laran. Liafuan hanesan nee sei ajuda sira.

³⁰ La bele halo tristi Nai Maromak nia Espiritu Santu. Tanba Maromak foo Nia Espiritu nee ba imi hanesan marka ida hodi hatudu katak, imi nee Maromak nia ema. I Nia Espiritu mos halo imi laran metin katak Maromak sei salva imi bainhira mundu nee remata.

³¹ La bele ona rai odi ba ema. La bele hirus. La bele tolok no hakilar ema. La bele istori malu. La bele hatete aat ema. I la bele halo buat aat saida deit.

³² Maibee imi tenki hadomi malu, i halo diak ba malu. Imi tenki foo perdaun ba malu, hanesan Nai Maromak mos foo ona perdaun ba imi liu hosi Kristu nia mate.