Efezu 3 - Biblia Tetun Dili

Maromak bolu ema nebee laos Judeu

¹ Hau, Paulo, agora dadauk dadur hela iha komarka tanba hau halao serbisu nebee Kristu Jesus foo mai hau. Serbisu nee mak foo sai Nia Novidade Diak ba imi nebee laos ema Judeu.

² Imi rona ona katak, Nai Maromak foo fiar mai hau halo serbisu nee ba imi tanba Nia laran diak mai hau.

³ Nia foo sai ona Nia planu segredu mai hau, hanesan hau hakerek tiha ona ituan iha leten.

⁴ Bainhira imi lee ona ida nee, imi bele komprende Nai Maromak nia planu kona ba Jesus Kristu, tuir buat nebee Nia foo sai ona mai hau.

⁵ Uluk segredu nee seidauk foo sai ba ema ida. Maibee agora Maromak foo sai ona liu hosi Nia Espiritu ba Jesus nia apostolu sira ho Maromak nia profeta sira nebee tatoli Nia liafuan.

⁶ Segredu nee mak nee: se ema nebee laos Judeu fiar ba Maromak nia Novidade Diak, entaun sira sei simu bensaun nebee Maromak foo ba Nia oan sira, hanesan mos Nia foo ema Judeu. Sira ho ema Judeu hamutuk sai povu ida. Nee hanesan sira halo parte iha isin lolon ida deit. I sira simu mos buat nebee Maromak promete ona ba Nia povu tanba sira laran ida ho Kristu Jesus.

⁷ Nai Maromak hatudu Nia grasa mai hau hodi hili hau foo sai Nia Novidade Diak. I Nia foo Nia kbiit mai hau para halao serbisu nee.

⁸ Hosi Maromak nia povu santu hotu-hotu nebee fiar, hau mak kiik liu. Maski nunee, Maromak foo fiar mai hau para foo hatene ba ema nebee laos Judeu, kona ba Kristu nia laran diak mai ita nebee ita sukat la too.

⁹ Komesa hosi Nai Maromak halo mundu, Maromak nia planu nee segredu hela. Maibee agora Nia haruka hau esplika ba ema hotu-hotu kona ba oinsaa mak Nia atu halao Nia planu.

¹⁰ Maromak nia objetivu nee matenek liu. Nia hakarak uza nia povu hodi hatudu nia matenek ba kbiit nain sira no ukun nain sira iha loro leten.

¹¹ Nai Maromak sei halo buat sira nee hotu tuir planu nebee Nia desidi tiha ona molok Nia halo mundu nee. I Nia foo planu nee ba ita nia Nai Jesus Kristu mak halao.

¹² Ita nebee fiar ona ba Kristu Jesus, i laran ida ho Nia, la bele tauk atu hakbesik aan ba iha Maromak nia futar oin.

¹³ Tanba nee hau husu ba imi, la bele laran susar bainhira haree terus nebee hau simu tanba serbii imi nebee laos Judeu. Hau nia terus nee lori onra boot ba imi.

Paulo halo orasaun ba sarani sira iha Efezu

¹⁴ Bainhira hau hanoin Maromak nia planu furak nee, hau hakneak hodi halo orasaun ba Aman Maromak.

¹⁵ Nia mak Aman ba familia hotu-hotu iha lalehan ho rai.

¹⁶ Maromak nia kbiit boot teb-tebes, i Nia laran diak teb-tebes. Nunee Hau harohan atu Nia Espiritu foo kbiit ba imi hodi hametin imi nia laran.

¹⁷ Hau harohan atu Jesus Kristu hela metin iha imi nia laran, liu hosi fiar ba Nia. Hau mos halo orasaun para imi metin iha Nia domin hanesan ai huun nebee hamriik metin tanba nia abut tama klean ba rai.

¹⁸ Hau mos halo orasaun para imi hamutuk ho Maromak nia povu santu sira hotu, bele komprende Kristu nia domin. Tanba Nia domin nee boot teb-tebes, luan teb-tebes, klean teb-tebes, i aas teb-tebes.

¹⁹ Hau halo orasaun atu imi bele hatene loloos Kristu nia domin nee, maski ita ema nia matenek la too. Nunee imi bele hatudu Maromak nia diak ho Nia domin iha imi nia moris tomak.

²⁰ Nai Maromak nia kbiit makaas teb-tebes. Nia bele halo liu fali saida deit mak ita husu ba Nia, no saida mak ita hanoin. Hodi Nia kbiit boot nee mak Nia serbisu iha ita nia laran.

²¹ Mai ita foti aas Nia naran, tanba Nia kbiit nebee Nia hatudu ba Nia povu liu hosi Kristu Jesus. Mai ita hahii Nia, hosi jerasaun ba jerasaun, too tinan ba tinan. Amen.