Efezu 2 - Biblia Tetun Dili

Nai Maromak salva ita liu hosi Nia grasa

¹ Uluk, kona ba moris espiritual, imi mate tiha ona, tanba imi kontra Nai Maromak nia lei i halo sala oi-oin.

² Iha tempu nebaa imi moris tuir mundu nia hakarak, i tuir mos diabu nia hakarak. Diabu mak ukun espiritu aat sira, i nia mak agora serbisu hela iha ema sira nebee lakohi tuir Nai Maromak.

³ Uluk ita hotu moris nunee. Ita halo buat aat saida deit mak ita kaan atu halo, i tuir deit ita nia isin nia hakarak ho hanoin nebee aat. Tanba nee Maromak atu kastigu ona ita, hanesan mos Nia atu kastigu ema aat sira seluk.

⁴ Maibee Maromak laran diak loos no hadomi teb-tebes ita.

⁵ Maski ita hanesan mate tiha ona tanba ita nia sala, maibee Nia halo moris fali ita hamutuk ho Kristu. Tanba Maromak salva ita liu hosi Nia grasa.

⁶ Maromak halo moris fila fali ita hamutuk ho Kristu i foo ona fatin ba ita hamutuk ho Nia iha lalehan.

⁷ Maromak halo nunee para iha tempu oin mai, ema bele haree Nia domin ida nebee boot liu hotu-hotu, i bele hatene Nia grasa nebee Nia hatudu mai ita liu hosi Kristu Jesus.

⁸ Nai Maromak salva imi liu hosi Nia grasa deit, bainhira imi fiar ba Kristu. Nia halo nunee, laos tanba imi merese. Salvasaun nee, Maromak mak foo deit,

⁹ laos tanba imi nia hahalok diak. Entaun imi la bele gaba aan.

¹⁰ Ita ema Nai Maromak nia liman fatin. I Kristu Jesus foo moris foun mai ita para ita bele halao buat diak iha ita nia moris loro-loron. Buat diak sira nee, Maromak prepara tiha ona ba ita hori uluk kedas.

Iha Kristu ita sai ida deit

¹¹ Imi nebee laos ema Judeu, imi hatene, uluk ema Judeu sira la konsidera imi tanba imi la sunat tuir sira nia lei relijiaun. Afinal sunat nee, ema mak halo iha isin lolon deit; nee la muda ema nia moris.

¹² Iha tempu nebaa, imi dook hosi Kristu. Imi hanesan ema lao rai, la iha direitu atu halo parte iha Nai Maromak nia povu Israel, i la tama iha promesa nebee Maromak halo ba sira. Imi hela iha mundu nee, la iha relasaun ida ho Maromak, i esperansa ba moris rohan-laek mos la iha.

¹³ Maski iha tempu nebaa imi dook hosi Maromak, maibee agora imi laran ida ho Kristu Jesus. Nunee Maromak halo ona imi besik ba Nia, tanba Kristu Jesus nia raan fakar too mate ba imi.

¹⁴ Uluk ami ema Judeu ho imi nebee laos Judeu odi malu; nee hanesan muru ida haketak ita. Maibee agora Kristu rasik halo ita dame malu ona. Liu hosi Nia mate, Nia halo rahun tiha muru nee hodi halo ita hotu sai povu ida.

¹⁵ Uluk, lei relijiaun Judeu ho nia regra bar-barak haketak ema Judeu hosi ema nebee laos Judeu. Maibee ho Kristu nia mate, Nia hakotu lei no regra sira seluk nee, atu nunee ema Judeu ho ema nebee laos Judeu hamutuk laran ida ho Nia. Ho nunee Kristu halo povu rua nee sai povu ida nebee moris iha dame nia laran.

¹⁶ Entaun Kristu mate iha krus halo povu rua nee sai ida deit, i halo ita mos dame malu ho Nai Maromak, tanba Kristu harahun tiha ona buat hotu-hotu nebee uluk halo ita odi malu.

¹⁷ Kristu mai iha mundu hodi foo sai kona ba dame. Nia foo sai nunee ba imi nebee uluk dook hosi Maromak, ho mos ba ami ema Judeu nebee besik Nia.

¹⁸ Kristu loke ona dalan ba ita hotu too ba iha Nai Maromak nia futar oin. Atu ita ema Judeu ka ema nebee laos Judeu, ita hotu bele tama ba Maromak tanba Nia Espiritu Santu nia tulun.

Kristu nia povu hanesan uma ida ba Maromak

¹⁹ Entaun, maski uluk imi hanesan ema lao rai nebee la halo parte iha Nai Maromak nia povu, maibee agora imi sai ona ema rai nain hamutuk ho Nia povu santu sira seluk. I imi mos sai ona Maromak nia familia.

²⁰ Nee hanesan Nai Maromak harii uma ida. Kristu Jesus hanesan fatuk prinsipal liu iha uma nee. Depois Nia apostolu sira ho profeta sira nebee tatoli Nia liafuan, mak hanesan fatuk nebee Maromak hada uluk. Depois Nia hada mos imi hamutuk iha fatuk sira nee nia leten.

²¹ Tanba Kristu sai uma nee nia aliserse, nee mak uma nee hamriik metin, i sae ba bebeik, too sai uma santu ida ba ita nia Nai.

²² Entaun, tanba imi laran ida ona ho Kristu, Maromak hada mos imi nebee laos Judeu hamutuk ho Nia ema sira seluk para ita hotu sai Maromak nia Espiritu nia hela fatin.